http://toti7.123.is/ - flestar óþarfar is Tue, 14 Apr 2026 00:00:00 GMT Tue, 14 Apr 2026 00:25:46 GMT www.123.is http://toti7.123.is/blog/record/818009/ Vikan 2. - 8. febrúar var að mestu góð fyrir utan að kvefpestin sem hafði verið að plaga mig og trufla söngröddina varð þausætnari en ég hugði. Fór því til læknis í upphafi vikunnar og fékk steraúða til að vinna á kvikindu, skánaði mér töluvert eftir því sem leið á vikuna sem var gott því enn eitt þorrablótið var á dagskránni í lok hennar. Þetta þorrablót var í Tjarnarborg á Ólafsfirði fyrir aldurshópinn 60+ og var þar mikil gleði. Við Stulli stýrðum fjöldasöng að venju og reyndum að vera sniðugir, ég steig á stokk með Vorboðakórnum, kór eldri borgara, því fámennt var karlamegin og svo lékum fyrir dansi fram undir miðnætti. Vel heppnað og góð mæting heldra fólks í Fjallabyggð og úr nágrannasveitum. Í vikunni var einnig afhending menningarstyrkja frá sveitarfélaginu Fjallabyggð vegna viðburða og rekstrar safna og setra árið 2026. Tók ég við þremur styrkjum að þessu sinni. Vegna reksturs Ljóðaseturs Íslands, vegna ljóðahátíðarinnar Haustglæður sem haldin verður í tuttugasta skipti og svo vegna Síldarævintýrisins sem verður haldið um verslunarmannahelgina að venju. Skipta þessir styrkir geysilega mikli máli svo hægt sé að punta upp á mannlífið í sveitarfélaginu. Renndum einnig inn á Akureyri til að heilsa upp á börnin og gistum eina nótt. Mon, 13 Apr 2026 16:26:00 GMT http://toti7.123.is/blog/record/817994/ Vikan 26. jan - 1. feb var ljómandi góð að mestu, náði mér að vísu í kvefpest sem hafði áhrif á sönggetuna, annað gott. Kennslan í Menntaskólanum á Tröllaskaga gengur að óskum; alltaf einhver spennandi verkefni þar að fást við. Auk kennslunnar skrifa ég fréttir á heimasíðu skólans, sé um menningarmál og fleira skemmtilegt. Svo var eitt og annað skrifað og skráð m.a. fréttir í Helluna, héraðsfréttablað hér í Fjallabyggð, og fréttir á fésbókarsíður verkefna sem ég tengist. Þetta var líka góð fjölskylduvika. Einkasonurinn, Patrekur, átti 29 ára afmæli og svo kom yngsta dóttirin, Amalía, og kærasti hennar í heimsókn á Sigló og gistu hjá okkur yfir helgina. Frúin byrjaði með Krílaskóla fyrir yngstu skíðaiðkendurna á skíðasvæðinu og Amalía aðstoðaði. Báðar eins og ballettdansarar á skíðunum! Við Stulli lékum aðeins á einu þorrablóti þessa viku, en þau voru þrjú í vikunni á undan, að þessu sinni í Skagaseli út á Skaga. Þar sáum við um fjöldasöng milli skemmtiatriða og svo lékum við fyrir dansi fram á nótt. Vegna kvefpestarinnar var röddin frekar tæp og Stulli þurfti að syngja mun meira en venjulega en hann komst vel frá því kallinn. Heilmikið stuð á dansgólfinu að venju og að loknum dansleik var pakkað saman og rennt heim. Veðrið eins og best verður á kosið og var snjókorn á vegum á miðjum þorra, líkt og síðustu tvö ár. Frúin dansar á skíðum Wed, 08 Apr 2026 09:20:00 GMT http://toti7.123.is/blog/record/817981/ Vikan 19. - 25. janúar einkenndist af því að Þorrinn var að ganga í garð. Nóg um að vera næstu vikurnar hjá okkur spilafélögunum Stulla og Tóta og byrjað með trukki því við spiluðum á hvorki fleiri né færri en þremur þorrablótum þessa vikuna. Á fimmtudagskvöldi á dvalarheimilinu Hornbrekku á Ólafsfirði þar sem var einstaklega góð stemning. Á föstudegi var haldið í Bárðardal og spilað fyrir sprellfjörugum dansi þar um kvöldið auk þess sem við sáum um fjöldasöng. Þetta var þvílíka fjörið og einn magnaðasti fjöldasöngur sem ég hef heyrt, svei mér þá. Á laugardeginum var svo haldið út á Tjörnes þar sem áfram var haldið; fjöldasöngur milli fjölbreyttra skemmtiatriða og svo spilað fyrir dansi fram á nótt. Það var gott að hvíla röddina á sunnudeginum! Auk þess var kennslunni að sjálfsögðu sinnt og haft gaman af lífinu. Fyrsta karlakórsæfing ársins var líka á dagskrá og eitt og annað fleira skemmtilegt. Mynd: Stulli og Tóti á Trilludegi á Sigló Thu, 02 Apr 2026 16:59:00 GMT http://toti7.123.is/blog/record/817810/ Vikan 12. - 18. janúar var alveg ljómandi. Kennslan komin í fullan gang aftur í MTR (Menntaskólanum á Tröllaskaga), hugað að daglegri hreyfingu og áttum svo góða fjölskylduhelgi, þó með félagsmálaívafi. Skelltum okkur inn á Akureyri eftir kennslu á fimmtudegi og gistum hjá Patreki syni okkar en hann fór svo í rafvirkjanámið sitt á Sauðárkróki á föstudeginum meðan við Stína renndum á Mývatn þar sem við sátum mjög áhugaverðan fund íþróttahéraða á Norðurlandi eystra sem fulltrúar UÍF (Ungmenna- og íþróttasambands Fjallabyggðar). Gistum svo þar um nóttina. En þetta var nú ekki allt því þennan sama dag skrifaði Elín Helga, dóttir okkar, og Dabbi hennar undir kaup á íbúð í raðhúsi á Hauganesi. Þeirra fyrsta íbúð og hamingjan í algleymi enda erfingi á leiðinni! Íbúðina fá þau afhenta í sumarbyrjun. Þegar komið var aftur á Akureyri á laugardeginum var hent í matarveislu til að fagna íbúðakaupum og lífinu þar sem dætur okkar, Elín Helga og Amalía, og þeirra unnustar fögnuðu með okkur. Gistum svo enn á Akureyri og síðan haldið heim á Sigló á sunnudeginum eftir góða daga. Mynd: Lukkulegir nýir íbúðareigendur. Wed, 25 Feb 2026 15:08:00 GMT http://toti7.123.is/blog/record/817689/ Ætla að halda því að skrifa hér um viðfangsefni hverrar viku fyrir sig í því sem ég er að taka mér fyrir hendur og því sem gengur á í kringum mig. Verður vonandi skemmtileg heimild þegar frá líður og mögulega hafa einhverjir gaman af að fylgjast með því sem maður er að sýsla í einu og öðru. Ýmis heit sett fyrir nýtt ár á sviðum tónlistar, ritlistar, ljóðlistar, heilsu og íþrótta en síðast en ekki síst með fjölskylduna í huga og að reyna að inna verk af hendi sem gagnast mínum nánustu sem samfélaginu. Árið byrjaði af krafti og fyrstu tíu dagana voru tvær framkomur í tónlistinni. Óskað var eftir Karlakór Fjallabyggðar til að syngja í jarðarför eins stofenda kórsins og að sjálfsögðu var brugðist vel við því og sungið í fallegri athöfn. Við Stulli stýrðum svo fjöldasöng við þrettándabrennu Kiwanismanna á Siglufirði með 10. bekkinga í jólasveinabúningum og álfakónginn og drottninguna okkur til halds og trausts. Flott brenna og góð mæting bæjarbúa í blíðviðri. Framundan er svo góð törn á þorrablótavertíðinni hjá okkur Stulla. Svo var maður náttúrulega upptekinn við að undirbúa kennslu fyrir næstu önn í Menntaskólanum á Tröllaskaga, þessum magnaða vinnustað sem ég tilheyri. Alltaf eitthvað nýtt og spennandi í gangi þar og áhugaverð verkefni að takast á við. Auk kennslunnar stýri ég þar menningarmálum, rita fréttir á heimasíðu skólans og er í heilsu- og forvarnarteymi svo eitthvað sé nefnt. Frábær skóli og frábært samstarfsfólk. Félagsmálin fengu einnig sinn skerf: Sat fyrsta fund stjórnar Ungmenna- og íþróttasambands Fjallabyggðar á nýju ári í vikunni og hugaði að Ljóðasetrinu auk þess sem ritaðar voru fréttir af íþrótta- og féalgsmálum á ýmsa miðla. Mynd: Ég og Stína mín Wed, 21 Jan 2026 16:48:00 GMT http://toti7.123.is/blog/record/817640/ Síðustu vikur ársins voru aldeilis gleðilegar og hátíðlegar með dassi af ýmiskonar fjöri. Sunnudaginn 14. desember brugðum við Stína okkur á stórskemmtilega tónleika á Akureyri þar sem vitringarnir þrír og gestir þeirra rúlluðu í gegnum ýmis jólalög með góðum skammti af gríni og glensi. Í vikunni þar á eftir var síðasti viðburður ljóðahátíðarinnar sem ég stýrði en þá afhenti ég verðlaun í ljóðasamkeppni 8. - 10. bekkjar Grunnskóla Fjallabyggðar en sú keppni er fastur liður í hátíðinni. Einnig voru skrifaðar fjölmargar fréttir þessa viku í ýmsa miðla. Föstudaginn 19. des. brunuðum við í borgina í ýmsa snúninga en ekki síst til að hitta Hrefnu dóttur mína og fjölskyldu sem voru í heimsókn á landinu góða, Pálu elstu dóttur mína og hennar fólk og svo að taka á móti Amalíu okkar sem var að koma til landsins eftir ævintýradvöl í lýðháskóla úti í Danmörku. Urðu aldeilis fagnaðarfundir með öllum þessum elskum og meira að segja var haldið upp á afmælið mitt með öllum hópnum í borginni á afmælisdaginn, 21. des. Svo var brunað heim aftur til að undirbúa jólin og allt það. Yndisleg fjölskyldujól, börnin okkar Stínu og tveir tengdasynir hjá okkur megnið af jólahátíðinni sem og tengdaforeldrarnir. Matarboð með 8 - 10 manns í nokkra daga; fyrst hin árlega Þorláksmessuskata sem ég sýð í bílskúrnum, svo fimmréttað á aðfangadag, afgangar á jóladag, hangikjöt og tilheyrandi á annan í jólum og kalkúnn á gamlársdag. Tengdamamma sá um eitt og annað, að sjálfsögðu, og Stína mín eins og Michelin-kokkur svo allt smakkaðist upp á 10. Ég var helst nothæfur í uppvaskið. Yndisleg jól og áramót með hópnum okkar. Allir kátir og glaðir og taka nýju ári með tilhlökkun. Mynd: Afmælishittingur í borginni. Fri, 09 Jan 2026 17:03:00 GMT http://toti7.123.is/blog/record/817616/ Fyrstu tvær vikur desember voru annansamar og skemmtilegar. Allt á fullu hjá okkur í Karlakór Fjallabyggðar við að undirbúa jólatónleika sem voru þann 11. des í Siglufjarðarkirkju. Fimm æfingar þessa 10 daga áður en að tónleikunum kom svo allt small þetta vel saman þegar á hólminn var komið. Fengum kvennakórinn Hytturnar með okkur, stofnaður í haust, svo úr urðu hátíðlegir og skemmtilegir jólatónleikar og aðsóknin frábær. Við Stína renndum inn á Akureyri og sóttum bráðskemmtilegan hausthitting safnafólks á Norðurlandi eystra. Byrjað í Minjasafninu og svo haldið í Flugsafnið, gott spjall, skemmtilegt hópefli, sögustundir og góður matur auk áhugaverðra safngripa og samstarfsaðila. Sat einnig fund hjá stjórn UÍF, Ungmenna- og íþróttasambands Fjallabyggðar. Í ljóðadeildinni voru nokkur verkefni. Heimsótti 1. bekk Grunnskóla Fjallabyggðar og flutti nemendum Æskumyndir mínar með myndastuðningi að vestan og svo komu nemendur 8. - 10. bekkjar í heimsókn í Menntaskólann á Tröllaskaga til að taka þátt í hinni árlegu ljóðasamkeppni ljóðahátíðarinnar Haustglæður. Þar var ég búinn að stilla upp málverkum eftir nemendur MTR og grunnskólanemarnir notuðu þau sem kveikjur að ljóðum eftir að ég hafði gefið þeim góð ráð í ljóðasmíðinni. Hver bekkur stoppaði í s.s. 45 mínútur og úr urðu 70 ljóð sem dómnefnd fer svo yfir og þau bestu verða verðlaunuðu. Endapunkturinn í ljóðamálunum var að fylgjast með rafrænni úthlutunarhátíð þar sem fjármagni úr Sóknaráætlun Norðurlands eystra var úthlutað og fékk Ljóðasetrið þar 1.7 milljón til rekstarins á næsta ári. Frábærar fréttir og hæsti rekstarstyrkur sem setrið hefur fengið í gegnum þessa áætlun. Í skólamálunum var einnig nóg um að vera. Annasamir síðustu kennsludagar annarinnar, þó veður hafi sett nokkuð strik í reikninginn, síðasti kennsludagur var 11. desember og við tók námsmat næstu daga og glæsileg sýning á verkum nemenda var svo laugardaginn 13. des. Var hún vel sótt. Einnig fór starfsfólk skólans saman á jólahlaðborð. Endapunkturinn á seinni vikunni var laufabrauðsgerð og kleinubakstur heima hjá okkur á Hafnargötunni með Elínu Helgu dóttur okkar og tengdamömmu. Skemmtileg samverustund. Tue, 30 Dec 2025 12:53:00 GMT http://toti7.123.is/blog/record/817611/ Vikurnar 16. - 29. nóvember voru skemmtilegar, tónlistin allsráðandi og mikið verið inn á Akureyri vegna hennar og til að hitta börnin. Hefðbundin kennsla í Menntaskólanum á Tröllaskaga báðar vikurnar, æfingar með Karlakór Fjallabyggðar á mánudögum og með Stulla spilafélaga mínum á föstudögum og svo skrifaðar fréttir á ýmsa miðla flesta daga. Við Stulli spiluðum inn á Akureyri báðar vikurnar; í þeirri fyrri á balli hjá 60+, einu sinni sem oftar, mikið fjör þar að vanda og í seinni vikunni í þrítugsafmæli og þar ver heilmikið fjör líka. Í seinni vikunni skelltum við í Jólatríó í MTR, ég og tveir nemendur, og spiluðum jólalög í einu hádeginu fyrir nemendur og starfsfólk. Frúin átti afmæli í seinni vikunni og áttum við góðar stundir með börnunum okkar inn á Akureyri í tilefni þess, fórum út að borða og gistum. Fórum einnig á jólahlaðborð á Kaffi Rauðku á Sigló með Síldarævintýristeyminu þar sem mér voru þökkuð góð störf þar sem ég hef ákveðið að láta gott heita með að koma að undirbúningi og skipulagi þeirrar hátíðar. Mun þó nokkuð örugglega koma fram á hátíðinni nokkur ár í viðbót. Rifjaði það upp í einhverri færslu hér að ég hef komið fram á 20 Síldarævintýrum alls rúmlega 100 sinnum. Sat, 27 Dec 2025 13:41:00 GMT http://toti7.123.is/blog/record/817567/ Vikurnar 2. - 15. nóvember voru þéttar af ævintýrum og fjöri, svei mér þá. Hefðbundnar vinnuvikur í Menntaskólanum á Tröllaskaga, ef svo má að orði komast því enginn dagur er jú eins í kennslunni, en allt gengur vel hjá okkur á þessum líflega og frjóa vinnustað þar sem nemendur sem starfsfólk er alltaf að læra eitthvað nýtt. Í fyrri vikunni tók ég á móti nemendum úr 2. og 3. bekk Grunnskóla Fjallabyggðar á Ljóðasetrinu og fræddi þá um íslenska ljóðlist og nokkur ljóða- og tóndæmi fylgdu með. Flottir krakkar og áhugasamir sem allir voru leystir út með bókagjöf til að ýta undir lestur. Voru þessar heimsóknir liður í ljóðahátíðinni Haustglæður sem ég stýri nú 19. árið í röð. Að lokinni kennslu á fimmtudegi renndum við Stína svo til Reykjavíkur þar sem við Stulli spiluðum fyrir dansi á sprellfjörugu balli hjá Félagi harmonikkuunnenda og á laugardagskvöldinu vorum við í skemmtilegu matarboði hjá vinafólki okkar. Svo var verslað í borginni og heilsað upp á afkomendur og ættingja. Að lokinni kennslu seinni vikuna var brunað á Akureyri þar sem við komum okkur fyrir í herbergi hjá Patreki syni okkar sem leigir íbúð þar. Verður það athvarf okkar í höfuðborg norðursins næstu mánuðina þar sem dvalartími okkar þar er sífellt að lengjast. Stafar það af því að börnin okkar Stínu eru nú öll búsett þar og verkefnum mínum í ljóða- og tónlistardeildinni hefur einnig fjölgað töluvert á þeim slóðum seinustu árin. Áttum þar góðar fjölskyldustundir og aðrar, kannski ekki alveg eins ánægjulegar, í verslunum; byrjað að huga að jólagjöfum og slíku. Í ritunardeildinni var einnig eitthvað að gera. Skrifaði nokkrar blaðsíður í handritið að sögu íþróttalífs í Arnarfirði, skemmtilegt grúsk og ýmislegt áhugavert sem kemur upp úr dúrnum, svo var fréttavaktin á sínum stað varðandi íþrótta- og skólamál. Á myndinni má sjá nemendur 2. bekkjar Grunnskóla Fjallabyggðar með bækurnar að lokinni heimsókn á Ljóðasetrið Wed, 17 Dec 2025 10:47:00 GMT http://toti7.123.is/blog/record/817556/ Vikurnar 19. okt. - 1. nóv. voru nokkuð hefðbundnar þannig séð. Sinna vinnunni í Menntaskólanum á Tröllaskaga og svo ýmsum verkefnum á menningar- og félagsmálahliðinni. Ljóðasetrið nokkuð tímafrekt fyrri vikuna þ.s. ég var að vinna að stórri umsókn um rekstrarstyrk og svo kom skemmtilegur hópur Veraldarvina í heimsókn og fékk fræðslu um íslenska ljóðlist og einhverja skemmtun með. Sat einnig formannafund félaga innan Ungmenna- og íþróttasambands Fjallabyggðar þessa viku og gerði grein fyrir ferð okkar hjóna á Sambandsþing UMFÍ sem við sátum fyrir hönd UÍF í Stykkishólmi. Tónlistin á sínum stað að venju; æfingar með Karlakór Fjallabyggðar á mánudögum og á föstudögum með Stulla spilafélaga mínum. Við Stulli skemmtum á grillkvöldi eldri borgara í Fjallabyggð sem haldið var í Tjarnarborg á Ólafsfirði. Ég flutti nokkrar vísur og limrur meðan á borðhaldi stóð, við Stulli stýrðum fjöldasöng og lékum svo fyrir dansi. Eitthvað var skrifað að venju; fréttir á síður UÍF, Ljóðasetursins og mína eigin á fésbókinni og einnig á heimasíðu MTR og í héraðsfréttablaðið Helluna, samtals 14 fréttir. Svo dustaði ég rykið af handriti um íþróttalíf í Arnarfirði sem ég var kominn ágætlega af stað með fyrir nokkru og ætla nú að setja endurnýjaðan kraft í að klára og stefni að bókarútgáfu árið 2027. Sun, 14 Dec 2025 12:40:00 GMT http://toti7.123.is/blog/record/817545/ Vikurnar 5. - 18. okt. voru annasamar og land lagt undir fót. Í skólanum þar sem ég kenni, Menntaskólanum á Tröllaskaga, var svokölluð miðannarvika dagana 6. - 10. okt. þar sem hefðbundin kennsla er sett til hliðar meðan kennarar vinna að námsmati og nemendur sinna öðrum verkefnum. Að þessu sinni tókum við að okkur þrír kennarar að búa til og kenna vikuáfanga um hatursorðræðu, ekki vanþörf á á þessum síðustu og verstu. Nemendur stóðu sig frábærlega þessa viku og skiluðu innhaldsríkum og metnaðarfullum úrlausnum um þetta samfélagsmein sem hatursorðræða er. Á fimmtudeginum heimsótti ég vinnustofu Sjálfsbjargar á Siglufirði og flutti þeim góða hópi sem þar var nokkur ljóð og lög við góðar undirtektir. Að lokinni kennslu á föstudegi var svo brunað í Stykkishólm þar sem við hjónin sátum Sambandsþing Ungmennafélags Íslands sem fulltrúar Ungmenna- og íþróttasambands Fjallabyggðar. Þetta var nokkuð átakaþing þar sem deilt var um skiptingu lottótekna en önnur mál leyst í bróðerni. Alltaf gaman að hitta félaga úr hreyfingunni og rifja upp góðar stundir á keppnisvellinum sem og úr starfinu. Svo var brunað heim aftur á sunnudegi og við tók ný hefðbundin kennsluvika. Fimmtudaginn 16. okt. var svo haldið til Akureyrar þar sem ég tók þátt í skemmtilegu ljóðakvöldi á fimmtudagskvöldinu og næstu tveir dagar voru nýttir inn á Akureyri til að vera með afkomendum, versla og vinna. Að auki voru þessr tvær vikur hefðbundnar vikulegar æfingar með Karlakór Fjallabyggðar og svo með Stulla spilafélaga mínum. Skrifaðar á annan tug frétta á ýmsar síður og eitthvað var reynt að rækta kroppinn. Myndin er frá ljóðakvöldi á Akureyri Sun, 07 Dec 2025 14:00:00 GMT http://toti7.123.is/blog/record/817512/ Þá er það vikan 28. sept - 4. okt og líkt og fleiri vikur hófst hún á rúnti heim til Sigló á leið frá spilamennsku. Sunnudagurinn fór sem sagt að mestu í ferðalag að sunnan eftir ball í borginni en það var sumarfæri og allt í besta. Svo tók við hefðbundin kennsluvika í MTR, svona eins og hægt er að tala um "hefðbundar" vikur í kennslu yfir höfuð, og svo var tónlistin og ljóðlistin ekki langt undan. Heimsótti dvalarheimilið Dalbæ á Dalvík með gítarinn í hönd og flutti þar bæði eigin ljóð og lög fyrir heimilisfólk og gesti. Ljúf og góð stund sem var vel sótt. Var þessi heimsókn fyrsti liðurinn í ljóðahátíðinni Haustglæður sem ég setti á fót og hef stýrt hér á Tröllaskaganum hvert haust síðan árið 2007. Það er tvö félög sem ég er í forsvari fyrir sem standa að hátíðinni þ.e. Umf Glói og Félag um Ljóðasetur Íslands. Hafa rúmlega 5500 manns notið þeirra viðburða sem þar hafa verið á dagskrá sl. 18 ár og fjölmargt listafólk hefur komið fram á þeim. Á laugardagskvöldinu var svo komið að næsta dansleik; stóðréttaball á Rimum í Svarfaðardal og var mikið líf og fjör á dansgólfinu. Við Stulli í góðum gír á sviðinu og lékum lög af ýmsu tagi. Lagalistinn hjá okkur telur tæplega 300 lög svo það er hægt að aðlaga lagasafnið að ýmsum hópum og það er nú galdurinn; að spila lög sem fólk þekkir og getur sungið og dansað með. Mynd frá góðri stund á Dalbæ. Mon, 24 Nov 2025 10:29:00 GMT http://toti7.123.is/blog/record/817508/ Vikan 21. - 27. september var lituð af tónlist, eins og flestar vikur í lífi mínu síðustu áratugina svo sem, sem sagt engar nýjar fréttir. Vikan hófst þó á rólegum sunnudegi þar sem verið var að undirbúa næstu kennsluviku og dudda við eitt og annað eins og að skrifa fréttir og vinna að skrásetningu, huga að heimilinu og svona þessu hefðbundna. Svo tók skólalífið við á mánudegi og á þriðjudegi vorum við með dagskrá í Menntaskólanum á Tröllaskaga í tilefni af Alþjóðadegi friðar. Þar steig Hamingjubandið á stokk og ég sem fyrr sá sem stýrði lagavali, sem var í takti við þema dagsins, og sá um söng, kynningar og gítarspil með flott fólk með mér úr röðum kennara og nemenda. Á föstudeginum sátum við, kennarar í MTR, haustþing og ýmsa fræðslu á Sauðárkróki og að henni lokinni renndum við Stína til Reykjavíkur því fyrir höndum var dansleikur hjá mér og Stulla í Danshöllinni í Mjóddinni. Þar var mikið fjör og dansað frá fyrsta tóni. Alltaf gaman að syngja fyrir fólk sem vill dansa. Svo var rennt heim á Sigló á sunnudeginum. Á myndinni má sjá Hamingjubandið troða upp í MTR. Sat, 22 Nov 2025 18:55:00 GMT http://toti7.123.is/blog/record/817462/ Vikan 14. - 20. september var stútfull af tónlist og svo var líka verið að vinna fyrir saltinu í grautinn í kennslunni. Fyrri hluti vikunnar helgarðu kennarastarfinu þar sem allt er komið í fastar skorður og rennur ljúft hjá okkur í Menntaskólanum á Tröllaskaga. Við hjónin líka dugleg að rækta kroppana í ræktinni okkar, hjóla í blíðunni og sinna haustverkum í garðinum. Tónlistin tók svo yfir seinni part vikunnar. Við Stulli komum fram á Kráarkvöldi á dvalarheimilinu Hornbrekku á Ólafsfirði, fórum með vísur og limrur, stjórnuðum fjöldasöng og lékum svo fyrir dansi. Í hádeginu á föstudag var ég með tónleika í menningatrhúsinu Bergi á Dalvík þar sem ég flutti eigin lög við ljóð norðlenskra skálda. Var vel mætt og stemningin notaleg. Á föstudagskvöldinu lékum við Stulli svo fyrir dansi hjá hressu fólki 60+ í félagsmiðstöð þess aldurshóps á Akureyri. Þar var mikið fjör og dansað frá fyrsta tóni. Við Stína gistum svo á Akureyri og notuðum laugardaginn í ýmsa snúninga. - Myndin er frá tónleikunum í Bergi á Dalvík. Mon, 10 Nov 2025 12:42:00 GMT http://toti7.123.is/blog/record/817419/ Vikan 7. - 13. september hófst með því að við Stína brunuðum að sunnan og norður á Sigló á sunnudeginum. Svo tók við hefðbundin kennsluvika og daglegt líf í bland við smá fréttaskrif, garðvinnu og annað stúss. Á föstudeginum brunuðum við nokkur úr Menntaskólanum á Tröllaskaga á Sauðárkrók og kynntum okkur starfið á starfsbraut skólans, ánægjuleg og fróðleg heimsókn. Seinni part föstudags kom Patrekur sonur okkar frá Akureyri og við svifum í að setja upp sturtuklefa í íbúðinni hans hér á Sigló svo hún yrði sölu/leigu vænni. Tengdapabbi betri en enginn í að koma öllu heim og saman. Patrekur gisti og daginn eftir kom svo Elín Helga okkar og Dabbi hennar einnig og grillað var ofan í mannskapinn. Góð fjölskyldustund. - Mynd: Patrekur Thu, 30 Oct 2025 17:50:00 GMT http://toti7.123.is/blog/record/817412/ Fyrsta vikan í september var heldur tíðindaríkari en sú síðasta í ágúst. Hófst með rólegum sunnudegi og svo kennslu í MTR fram að föstudegi, einnig unnið að fréttaskrifum og ýmiskonar skráningu að vanda. Heimsótti einnig ljóðaklúbb á dvalarheimilinu Hornbrekku á Ólafsfirði á mánudeginum (sjá mynd) og flutti þeim eigin lög við ljóð ýmissa skálda, var það fyrsti viðburðurinn í ljóðahátíðinni Haustglæður sem ég stýri nítjánda árið í röð. Eftir kennslu á fimmtudegi brunuðum við Stína svo suður. Erindið var aðallega að spila og syngja á dansleik en eitt og annað gert í leiðinni. Á föstudeginum héldum við á Selfoss og gistum næstu tvær nætur hjá Kristínu systur og Nonna. Brá mér á annað frjálsíþróttamót, að þessu sinni Kastþraut Óla Guðmunds, sem ég þjálfaði á sínum tíma, fór það fram á Selfossi. Keppt í 5 kastgreinum og samanlagður árangur réði sætum. Gekk mjög vel í spjótinu, bætti mið þar töluvert frá því vikunni áður og á sem fyrr langbesta árangur Íslendings í mínum aldursflokki með 800gr spjótinu, kúlan fór líka ásættanlega langt, kringlan síður og sleggjukastið og lóðkastið gekk eins og við var að búast í fyrstu tilraun svona á gamals aldri. Mjög skemmtilegt og félagsskapurinn góður. Dansleikurinn fór svo fram í Goðalandi í Fljótshlíð. Við Stulli kallaðir til yfir þvert landið til að skemmta frábærum hópi og var fjörið allsráðandi. Goðaland félagsheimili nr. 57 sem ég spila í og staður nr. 226 á um 47 ára ferli í músikinni. Tue, 28 Oct 2025 16:29:00 GMT http://toti7.123.is/blog/record/817405/ Vikan 24. - 30. ágúst var frekar tíðindalítil, svei mér þá. Kennsla og skipulag hennar í aðalhlutverki, svona í upphafi skólaárs. Flottir nemendur og gott starf í Menntaskólanum á Tröllaskaga, starfsandi afbragðs góður og verkefnin mín í starfi fjölbreytt. Einmitt eins og ég vil hafa þau. Önnur verkefni vikunnar voru fyrsti fundur nýrrar stjórnar UÍF, Ungmenna- og íþróttasambands Fjallabyggðar, þar sem ég á nú aftur sæti eftir nokkurra ára hlé, að skrifa fréttir á ýmsa miðla sem fyrr og að rækta kroppinn í ræktinni í bílskúrnum. Svo tók ég mig til og mætti á frjálsíþróttamót á Akureyri og rifjaði upp gamla takta, Landsmót 50+ sem við héldum hér í Fjallabyggð síðasta sumar kveikti neistann til að taka upp þráðinn á því sviði. Ég keppti í kringlu og spjóti og keppt var með hefðbundinni þyngd áhalda, þ.e. 2kg kringlu og 800gr spjóti. Ég náði 6. besta árangri Íslendings frá upphafi í mínum aldursflokki í kringlunni og langbesta árangrinum í spjótinu. Gaman að því! Á mótinu hitti ég fyrir systursyni mína, þá Nóa og Frosta, sem einnig unnu til verðlauna á mótinu. Sun, 26 Oct 2025 15:03:00 GMT http://toti7.123.is/blog/record/817357/ Vikan 17. - 23. ágúst leið hratt og eitt og annað gert. Kennsla hófst í Menntaskólanum á Tröllaskaga, þar sem við hjónin störfum bæði. Þessa önn kenni ég tvo áfanga á starfsbraut, sé um fréttaskrif á heimasíðu skólans, er sérlegur menningarfulltrúi hans og sé um verkefnið Heilsueflandi framhaldsskóli, sem sagt í ýmis horn að líta. Stína mín starfar svo sem þroskaþjálfi á starfsbraut. Alltaf gott þegar lífið dettur í rútínu þó frjálsræðið sé auðvitað dásamlegt líka. Dyttaði að Ljóðasetrinu einn seinni part, var duglegur í bílskúrsræktinni okkar og tók líka eina spjótkastsæfingu, skrifaði 8 fréttir á ýmsa miðla, renndum inn á Akureyri með bílinn í viðgerð og til að hitta börnin okkar þar og versla. Skiptum einnig um tvær rúður hjá okkur í Hafnargötunni, Patrekur smiður, sonur okkar kom og veitti hjálparhönd og helgin endaði svo með því að við Stulli spiluðum á fjörugum dansleik fyrir hressan hóp húsbílaeigenda og var hann í Ljósvetningabúð í Þingeyjarsýslunni, fyrsta skipti sem ég kem fram í því félagsheimili. Alltaf gaman að koma fram á nýjum stöðum. Wed, 15 Oct 2025 14:44:00 GMT http://toti7.123.is/blog/record/817310/ Vikan 10. - 16. ágúst var svona í rólegri kantinum. Keyrðum heim á Sigló á sunnudeginum og næstu dagar fóru í að ná áttum eftir Ameríkuferðina, sinna garðvinnu, undirbúa sig fyrir haustönnina í Menntaskólanum á Tröllaskaga, þar sem ég kenni, og ýmsum hugðarefnum öðrum. Svo var bara allt í einu komið að því að skólastarf hæfist að nýju. Tveir vinnudagar í MTR í lok vikunnar þar sem allt starfsfólk mætti til skrafs og ráðagerða og lagði línurnar fyrir veturinn. Að loknum skólapælingum á föstudeginum var brunað með honum Stulla inn á Ársskógsströnd og þaðan siglt út í Hrísey þar sem við lékum fyrir dansi um kvöldið á skemmtilegri danshátíð sem þar var haldin þessa helgi. Frábær hópur að spila fyrir sem dansaði frá fyrsta tóni til þess síðasta. Tókum líka nokkur lög með Rúnari Þór Péturssyni sem var með tónleika áður en við byrjuðum að spila og lukkaðist það ljómandi vel. Dansleikir helgarinnar fóru fram í hinu sögufræga félagsheimili Sæborg þar sem Lilla, amma hennar Stínu minnar, kom í heiminn árið 1927! Thu, 09 Oct 2025 08:54:00 GMT http://toti7.123.is/blog/record/817237/ Vikan 3. - 9 . ágúst var ljúf og eitt og annað gert. Skrýtið þó að vera ekki heima á Siglufirði þessa helgi, verslunarmannahelgina, þegar Síldarævintýri er í gangi. Ég bjargaði því líklega frá glötun árið 2019 þegar það hafði ekki verið haldið í 2 ár og ýmsir, m.a. bæjaryfirvöld vildu það út af borðinu. En mér rann blóðið til skyldunnar og talaði fyrir hugmynd að nýrri nálgun á ævintýrið og fékk til liðs við mig kappa sem voru til í að láta slag standa. Úr varð þetta fína Síldarævintýri sem bæjarbúar tóku virkan þátt í og haldnir voru um 40 viðburðir frá fimmtudegi til sunnudags. Hef svo verið í stýrihópi ævintýrisins síðan og tók þátt í undirbúningi og uppgjöri í ár en var ekki við framkvæmdina sjálfa. Það var undarleg tilfinning, en engin eftirsjá, og líklega fyrsta Síldarævintýrið í 30 ár þar sem ég er ekki heima og hef komið fram rúmlega 100 sinnum í heildina á þessum ævintýrum. En nóg um það. Vikan hófst úti í Minneapolis í Ameríkunni þar sem ævintýrin héldu áfram. Héldum upp á afmæli Orra tengdasonar á sunnudeginum og við Stína tókum að okkur að líta eftir barnabörnunum svo turtildúfurnar gætu farið út að borða í tilefni dagsins. Næstu dagar einkenndust svo af ýmiskonar æðislegri samveru þar sem var verið að leika og sprikla, versla og fara út að borða að ógleymdri heimsókn í Mall of America. Svo var bara allt í einu komið að heimferð. Flogið heim til Ísalands og hittum þar fyrir elsku Amalíu dóttur okkar sem var á leiðinni í lýðháskóla í Danmörku. Skutluðum henni út á Keflavíkurvöll rúmum sólarhring eftir að við lentum þar og sáum á eftir henni á vit ævintýranna. Já, mikið um ævintýri hjá fjölskyldunni! Tue, 23 Sep 2025 18:49:00 GMT http://toti7.123.is/blog/record/817234/ Vikan 27. júlí - 2. ágúst var sannarlega viðburðarík og eftirminnileg. Rennt var til Reykjavíkur á sunnudegi og dvalið þar fram á þriðjudag. Hittum þar pabba sem var kominn að vestan til að skipta um bil, Kristínu systur og Nonna og svo Pálu dóttur mína, Þóru og Fíu nýstúdent og fórum út að borða með þeim í tilefni áfangans. Svo var komið að stóru stundinni að heimsækja Ameríku í fyrsta sinn. Flugum út með Hrefnu og hennar fjölskyldu, sem er nú búsett í Minneapolis, og ferðalagið gekk að óskum. Næstu dagar voru afskaplega ljúfir fjölskyldudagar þar sem við skoðuðum nágrennið, fengum okkur gott að borða, lékum okkur í saman í ýmiskonar leikjum og íþróttum og skemmtum okkur vel. Föstudagurinn var sérlega eftirminnilegur en þá höfðu Hrefna og co skipulagt afmælisfögnuð fyrir mig vegna 60 áranna í desember. Byrjuðum á hádegishlaðborði á glæsilegum golfvelli og svo var farið í siglingu um fallegt vatn í nágrennninu þar sem við syntum, sulluðum, vorum dregin um á blöðru og fengum okkur gott að borða. Þriðja sinn sem haldið er upp á 60 árin! Mon, 22 Sep 2025 14:18:00 GMT http://toti7.123.is/blog/record/817197/ Vikan 20. - 26. júlí var Ævintýravika í orðsins fyllstu merkingu því þá var ég með seinni Ævintýraviku Umf Glóa á Siglufirði þetta sumarið. Eins og komið hefur fram í fyrri færslum var ég í hópi stofnenda félagsins árið 1994 og hef þjálfað hjá því síðan og formennsku hef ég gegnt síðan 1995, eða í 30 ár. Ævintýravikan var vel sótt af hressum ungmennum og ýmislegt skemmtilegt brallað að veju eins og t.d. að fara í fjöruna, skógræktina og á söfn. Einnig var farið í leiki, þrautir og fjallgöngu. Allt til að efla ungviðið, auka víðsýni og kynni af nærsamfélaginu. Laugardagurinn var svo helgaður tónlistinni. Við Stulli sungum og spiluðum á frábærum Trilludegi á Siglufirði, lékum þá lög sem allir þekkja og geta sungið með í rúmar 4 klukkustundir á smábátabryggjunni á Sigló meðan gestir sigldu út á fjörðinn og sóttu fisk á grillið sem Kiwanismenn sáu um. Mikill mannfjöldi og veðrið lék við okkur að mestu. Að lokinni gleðinni á bryggjunni var pakkað niður og haldið upp í Skagafjörð þar sem við lékum og sungum áfram í 4 klukkustundir til viðbótar á eldhressri árshátíð sem fór fram í hátíðartjaldi og tóku Skagfirðingarnir hressilega undir í söngnum. Það var gott að leggjast á koddann þegar heim var komið. Sun, 14 Sep 2025 15:55:00 GMT http://toti7.123.is/blog/record/817194/ Vikan 13. - 19. júlí var að mestu helguð rekstri og umsjón Ljóðaseturs Íslands, sem ég stofnaði árið 2011 og hef rekið síðan. Komið var að málningarvinnu utanhúss eina ferðina enn á þessu um 100 ára gamla steinhúsi. Fóru allnokkrir klukkutímar í að skafa og mála og svo var setrið einnig opið fyrir gesti og gangandi sem vildu forvitnast um þennan merka arf okkar ljóðlistina. Setrið vel sótt og ég tók upp gítarinn og flutti gestum eigin lög við ljóð ýmissa skálda tvisvar sinnum þessa daga. Um miðja vikuna skelltum við Stína okkur í skemmtilegt ævintýri; hjóluðum inn í Fljót og gistum á sveitahótelinu Sóta. Vorum um 2,5 klst. á leiðinni, ekki á rafmagnshjólum og margar brekkur á leiðinni sem tóku vel í lærin. Þegar komið var í Fljótin var látið líða úr sér í heita pottinum og sundlauginni á Sólgörðum og svo var ljúffeng þriggja rétta máltið áður en lagst var til svefns og svo hjólað heim á leið um hádegi næsta dag. Ljómandi skemmtilegt ævintýri. Á fimmtudegi brunaði Stína mín svo í Laxárdal í Þingeyjarsýslu þar sem hún var næstu vikuna að vinna í veiðihúsi og hafði bara gaman af meðan ég sinnti ljóðlistinni. Sat, 13 Sep 2025 19:10:00 GMT http://toti7.123.is/blog/record/817150/ Vikan 6. - 12. júlí var óvenju einföld og tiltölulega róleg. Fyrri hlutinn fór í að klára að taka bílskúrinn í gegn. Klára að skrapa, mála og sparsla veggi og gólf og koma svo fyrir líkamsræktartækjum svo við Stína getum ræktað kroppana næstu misserin. Leit bara ljómandi vel út þegar verki var lokið á miðvikudegi. Fimmtudagurinn var fyrsti formlegi opnunardagurinn á Ljóðasetrinu, sem ég stofnaði og rek hér á Siglufirði, þetta sumarið. Ágætis rennerí þar og á laugardeginum vorum við með útimarkað í blíðunni við setrið og fjöldi fólk leit við og keypti varning af ýmsu tagi til styrktar rekstri Ljóðasetursins. Svo var að sjálfsögðu unnið við fréttaskrif á ýmsar síður, skráningu af ýmsu tagi og hugað að undirbúningi fyrir Síldarævintýrið 2025. Tue, 02 Sep 2025 21:46:00 GMT http://toti7.123.is/blog/record/817146/ Vikan 29. júní - 5. júlí var viðburðarík eins og fyrri vikur sumarsins. Lokadagur Landsmóts 50+, hjá okkur hér í Fjallabyggð, var á sunnudeginum og ég stýrði áfram frjálsíþróttakeppni, sem nú var innanhúss, og svo hinni stórskemmtilegu grein stígvélakasti. Það gekk vel að fá starfsfólk svo ég gat tekið þátt sjálfur og náði mér í 3 gullverðlaun og svo silfur í frumraun í stígvélakastinu. Gaman, gaman og framkvæmd mótsins í heild gekk að óskum. Næstu tveir dagar fóru svo í frágang á velli og búnaði og skráningu úrslita. Þá var tekið til hendinni í bílskúrnum, penslar og rúlla á loft og veggi og skrapa gólf, áður en lagt var í hann vestur á firði á fimmtudeginum því bæjarhátíðin okkar Bílddælinga, Bíldudals grænar ..., var yfirvofandi og þá lætur maður sig nú ekki vanta. Við hjónin brunuðum vestur og Amalía, yngsta dóttir okkar með. Hittum þar fyrir ættingja og vini í stórum bunkum á frábærri, fjölbreyttri og fjölmennri hátíð sem fór mjög vel fram. Kom aðeins fram á einum viðburði á hátíðinni að þessu sinni en þó í þremur atriðum. Þetta var liðurinn Í túninu heima sem náði nýjum hæðum við æskuheimilið Birkihlíð þetta árið. Ég hóf leik með nokkrum æskumyndaljóðum og tveimur frumsömdum lögum, þá tók Óliver Logi systursonur minn við með þremur frumsömdum rapplögum og svo sungum við Amalía saman tvö lög og fengum hina fjölmörgu gesti til að syngja með okkur. Þá var komið að Loga bróður með gamanmál áður en bílddælskir söngvasveinar, og ég með, sungu nokkur bílddælsk lög. Þá færðist nú heldur fjör í leikinn og enn meir þegar nokkrir Fjallabræður drösluðu píanóinu úr stofunni og út á pall þar sem leikið var og sungið af hjartans list við undirleik Halldórs Gunnars. Stundin endaði með því að Logi bróðir klifraði upp á píanóið og söng All of me í anda Megasar og þá áttu margir erfitt með sig. Eftirminnilegt! Mon, 01 Sep 2025 20:45:00 GMT http://toti7.123.is/blog/record/817132/ Vikan 22. - 28. júní var undirlögð af tveimur krefjandi en skemmtilegum verkefnum. Í þó nokkur ár hef ég verið með svokallaðar Ævintýravikur fyrir ung börn á Siglufirði. Þetta eru nokkurs konar leikjanámskeið en þó er áherslan nokkuð önnur en á hefðbundnum leikjanámskeiðum. Aðaláherslan er á útiveru, menningu og sköpun og að kynnast sínu nærumhverfi og hvað það hefur upp á að bjóða. Þessa viku var sem sagt fyrri Ævintýravika sumarsins hjá Umf Glóa, sem ég stýri og þjálfa hjá, og tæplega 20 börn á aldrinum 6-8 ára undu sér vel í ýmsum spennandi ævintýrum undir minni stjórn eins og t.d. fjöruferð, leikjum og þrautum, safnaferð, ferð í skógræktina og fleira. Seinna verkefnið var svo öllu umfangsmeira; að undirbúa, skipuleggja og framkvæma frjálsíþróttakeppni á Landsmóti UMFÍ 50+ hér í Fjallabyggð. Umf Glói tók að sér að sjá um frjálsíþróttakeppnina og þar sem ég er sá eini sem veit um hvað það snýst stýrði ég þeim hluta og undirbjó. Fékk svo flott fólk með mér í framkvæmdina og allt gekk að óskum. En að koma upp frjálsíþróttavelli var stærsti höfuðverkurinn þó gekk þetta allt upp fyrir rest og allir voru eins sátir og hægt er að vera. Mótið gekk frábærlega fyrir sig í alla staði og gestir ánægðir. Frjálsíþróttakeppnin gekk meira að segja svo vel fyrir sig að ég gat tekið þátt í nokkrum greinum, á hlaupum, og nældi í nokkur gull og nokkur silfur. Tók einnig að mér að vera kynnir á setningarhátíð Landsmótsins og sjá um tónlistarflutning með Stulla félaga mínum. Forseti Íslands, frú Halla Tómasdóttir, og Björn eiginmaður hennar sýndu okkur þann heiður að vera viðstödd setninguna og að sjálfsögðu ávarpaði hún Landsmótsgesti og aðra viðstadda. Að lokinni setningu var léttur kvöldverður framkvæmdanefndarinnar og forsetahjónanna á Síldarkaffi. Var það góð stund. Thu, 28 Aug 2025 20:05:00 GMT http://toti7.123.is/blog/record/817114/ Vikan 15. - 21. júní var alveg hreitn ljómandi góð og verkefnin fjölbreytt, svona eins og ég vil hafa þau. Hófum vikuna með veisluhöldum þar sem við fögnuðum útskrift hennar Elínu Helgu okkar úr grunnnámi kennarafræða frá Háskólanum á Akureyri. Var vegleg veisla af því tilefni hjá okkur á Hafnargötunni á Sigló. Á mánudeginum hófst ferli við að koma bílskúrnum í betra stand og útbúa þar líkamsræktaraðstöðu fyrir okkur hjónin. Hreinsuðum vel til og í vikunni fóru tveir farmar á haugana og tveir á Ljóðasetrið þar sem góssið beið útimarkaðar sem fyrirhugað var að halda síðar um sumarið. Einnig var tekinn góður skurkur í að skafa Ljóðasetrið að utan. 17. júní var haldinn hátíðlegur að venju og líkt og í um 20 skipti áður sá ég um hlaup fyrir Umf Glóa á þessum degi. Ég átti þátt í að stofna félagið árið 1994 og hef verið formaður þess í síðustu 30 ár. Mæting í hlaupið var ljómandi góð og alltaf gaman að sjá brosandi og ánægð börn að hreyfa sig. Var beðinn um að munda gítarinn í hátíðahöldum dagsins og lék og söng eigin lög og annarra í tæpan klukkutíma á ráðhústorginu þar sem hátíðahöldin fóru fram. Vikuna enduðum við inn á Akureyri þar sem við Stína mín áttum góða stund með börnunum okkar í tilefni af brúðkaupsdegi okkar þessa helgi. Sun, 24 Aug 2025 17:18:00 GMT http://toti7.123.is/blog/record/817100/ Önnur vikan í júní var sérlega fjölbreytt og skemmtileg. Hún hófst með fermingarveislu vestur á Barðaströnd og endaði á útskriftum á Akureyri, inn á milli var svo eitt og annað gert. Já, fermingarveisla Frosta Þórs, dóttursonar míns, fór fram í Birkimel á Barðaströnd á sunnudeginum og var gaman að vera með þessum efnilega dreng á þeim degi. Að veislu lokinni var brunað norður á Sigló. Á þriðjudeginum brunuðu Stína mín og Amalía dóttir okkar suður í borgina í læknastúss meðan ég tók á móti leikskólabörnum á Ljóðasetrinu með ljóðalestri, söng og spileríi og seinna um daginn sat ég undirbúningsfund vegna Landsmóts 50+ sem fór fram hjá okkur í Fjallabyggð nokkrum dögum síðar. Næstu dagar fóru að mestu í undirbúning fyrir Landsmótið; græja frjálsíþróttavöll, því slíkur er ekki til staðar hjá okkur, skipuleggja tímaseðla, setja upp ritarablöð og fleira slíkt. Og svo vinnu á Ljóðasetrinu við að koma betra skykki á allan aukabókakostinn sem við eigum orðið þar, byrja að skafa og mála setrið að utan og taka lóðina í gegn. Einnig sótti ég fund ferðaþjónustuaðila í Fjallabyggð og svo kom einkasonurinn í óvænta heimsókn frá Akureyri og þá var nú hent vænni steik á grillið. Laugardagurinn var svo stór dagur hjá familíunni. Tvær dætur okkar útskrifuðust frá Háskóla Akureyrar; Elín Helga úr grunnnámi í kennslufræðum og Hrefna sem hjúkrunarfræðingur. Hrefna gat þó ekki verið viðstödd þar sem hún var nýflutt til Minneapolis með eiginmanni og börnum. Yndislegur dagur engu að síður og tvær kjarnakonur fengu nýja nafnbót. Mynd: Elín Helga, tilvonandi kennari, og stoltir foreldrar. Thu, 21 Aug 2025 21:13:00 GMT http://toti7.123.is/blog/record/817058/ Fyrsta vikan í júní var nokkurn veginn tvískipt. Fyrri part vikunnar var verið að lenda eftir skólaveturinn og huga og orku beint m.a. að Ljóðasetri Íslands sem ég setti á fót árið 2011 og hef rekið siðan. Var að sinna ýmsum málum þar sem og á heimili og í garði. Á fimmtudegi brunuðum við Stína mín vestur á Bíldudal, æskuslóðir mínar. Gistum hjá pabba í æskuheimilinu, Birkihlíð, og hittum einnig fyrir Kristínu systir, Nonna hennar mann og fleiri afleggjara þeirra. Áttum mjög góðar stundir saman. Við Nonni hresstum upp á pallinn hjá pabba, það var ekki vanþörf á, og svo tókum við öll þátt í að taka garðinn hjá kallinum í gegn. Svo var að sjálfsögðu farið í kirkjugarðinn til að kasta kveðju á elsku mömmu. Sat, 16 Aug 2025 20:00:00 GMT http://toti7.123.is/blog/record/817047/ Vikan 25. - 31. maí var alveg ljómandi. Hún hófst með rólegum sunnudegi sem fólst aðallega í afslöppun og snatti í kringum Ljóðasetrið. Á mánudeginum héldum við starfsfólk Menntaskólans á Tröllaskaga í endurmenntunarferð og leituðum ekki langt yfir skammt að þessu sinni. Á mánudeginum heimsóttum við Framhaldsskólann á Húsavík, fengum kynningu á starfsemi skólans og funduðum með kollegum. Síðan var gist á Narfastöðum í góðu yfirlæti og á þriðjudeginum var Framhaldsskólinn á Laugum heimsóttur þar sem okkur var vel tekið og fundað með starfsfólki. Sáum eitt og annað nýtt og gagnlegt sem nýtist okkur næsta vetur. Á föstudeginum var óskað eftir okkur Stulla að spila og syngja við opnun sýningarinnar Fegurð fjarða í nýrri menningarmiðstöð í Ólafsfirði sem heitir Brimsalir þar sem samstarfskona mín Ida og hennar fjölskylda heldur úti öflugri starfsemi. Á laugardeginum vorum við Stína mín boðin í sérlega ánægjulega veislu þar sem vinur okkar Jaouad, kokkur á hinum vinsæla veitingastað á Hótel Siglunesi, fagnaði því að hafa fengið íslenskan ríkisborgararétt eftir 9 ára veru á Siglufirði. Hreyfði mig eitthvað svolítið þessa vikuna líkt og aðrar, fór m.a. og kastaði spjóti og kringlu, og svo voru skrifaðar nokkrar fréttir að venju og unnið að ýmissi annarri skrásetningu. Thu, 14 Aug 2025 18:31:00 GMT http://toti7.123.is/blog/record/817040/ Vikan 18. - 24. maí var annasöm og viðburðarík, svona eins og vikur eiga að vera. Hún hófst í sælunni í Kjarnaskógi og Skógarböðunum sem við prufuðum í fyrsta sinn, ekki amalegt að svamla um þar, og svo komu börnin í grillveislu í bústaðinn. Verkefnayfirferð, innfærsla einkunna og ýmis frágangur í skólanum og svo útskrift 52 nemenda á föstudeginum, fjölmennasti hópurinn sem útskrifast hefur frá MTR. Sat fund vegna undirbúnings Landsmóts UMFÍ 50+, sem fór fram hjá okkur hér í Fjallabyggð í lok júní. Ég var í framkvæmdanefndinni og félagið sem ég stýri, Umf Glói, tók að sér að sjá um frjálsíþróttakeppni mótsins og fleira. Mín beið það áhugaverða verkefni að búa til eitt stykki frjálsíþróttavöll og skipuleggja og sjá um frjálsíþróttakeppnina. Hugsaði mér að keppa líka eitthvað sjálfur og rifjaði því upp gamla takta í spjóti og kringlu og tók tvær æfingar í þeim greinum í vikunni. Áfram var svo sungið af miklum þrótti, líkt og síðustu vikur. Við Stulli kallaðir einu sinni enn til Akureyrar að spila og syngja fyrir dansi hjá Félagi eldri borgara þar sem allir 60+ eru velkomnir. Mikið fjör á föstudagskvöldi, um 100 manns mættu og dansgólfið fullt allt kvöldið. Á laugardeginum var svo endapunkturinn hjá Karlakór Fjallabyggðar þennan veturinn og hann var ekki amalegur. Ósk kom frá kór Langholtskirkju að við mundum halda tónleika með þeim í Bátahúsi Síldarminjasafnsins og var því vel tekið. Kórarnir fluttu bara lög án undirleiks; fyrst við og svo sunnanfólk og svo var sameinast í þrjú lög í lokin. Alveg gæsahúðarmóment á köflum, gestir fjölmenntu og allir kátir. Tvær æfingar voru í vikunni til undirbúnings. Svo var að sjálfsögðu haldið áfram að skrifa eitt og annað, m.a. einar 14 fréttir í héraðsfréttablaðið Helluna og á nokkrar fésbókarsíður. Einnig var potað niður kartöflum, að þessu sinni útlendum sem ég lét spíra í bílskúrnum þar sem ekki fékkst innlent útsæði. Tue, 12 Aug 2025 08:45:00 GMT http://toti7.123.is/blog/record/817033/ Vikan 11. - 17. maí. Jæja, ætli sé ekki rétt að halda áfram að segja frá fyrri vikum til að ná einhverntíman í skottið á sér! Þessi vika um miðjan maí var fyllt fjölbreyttum og skemmtilegum viðfangsefnum og endaði í sumarsælu. Sunnudaginn 11. maí vorum við með bílskúrssölu heima hjá okkur á Hafnargötunni og tókst að losna við töluvert af dótaríi sem hafði safnast upp hjá okkur. Síðustu kennsludagar annarinnar í Menntaskólanum á Tröllaskaga voru í vikunni og vildi svo vel til að veðrið lék við okkur þannig að útivera og sprikl litaði þá daga. Var einnig viðstaddur afhendingu Eyrarrósarinnar, sem fór fram í Alþýðuhúsinu á Sigló. Á miðvikudeginum vorum við í Karlakór Fjallabyggðar með tónleika á Sjúkrahúsinu á Siglufirði þar sem þakklátir hlustendur fögnuðu okkur vel. Að tónleikum loknum hélt ég á ársþing Ungmenna- og íþróttasambands Fjallabyggðar (UÍF) þar sem ég var kosinn aftur í stjórn eftir smá hlé. Hef setið í stjórn þar flest ár frá því sambandið varð til árið 2009, þar af formaður í þrjú ár. Auk þess var ég í rúman áratug í stjórn annars forvera UÍF, Íþróttabandalags Siglufjarðar, og gengdi þar öllum stjórnarstörfum nema formannsembættinu. Að lokinni kennslu á fimmtudeginum brunuðum við Stína mín beint í bústað í Kjarnaskógi þar sem einmuna veðurblíða lék við okkur og við áttum ljúfa daga. Sinntum skólaverkefnum, ræktuðum skrokkinn, fórum í göngutúra, grilluðum og fengum börnin okkar í mat, kíktum í miðbæinn og ýmislegt fleira. Sat, 09 Aug 2025 06:31:00 GMT http://toti7.123.is/blog/record/817031/ Vikan 4. - 10. maí var ljómandi góð. Önnin í skólanum styttist í annan endann svo það var nóg að gera í kennslunni auk þess sem ég skrifaði fréttir af skólastarfinu á heimasíðu skólans en það er eitt af verkefnum mínum í skólastarfinu. Um miðja vikuna tók ég á móti hressum alþjóðlegum hópi nema úr dönskum lýðháskóla og fræddi þá um íslenska ljóðlist, tungumálið okkar og menningu og með fylgdu ljóðabrot, söngur og spilerí. Við Stulli vorum kallaðir til að vera skemmtilegir og leika fyrir dansi á Kótilettukvöldi eldri borgara í Fjallabyggð sem fór fram í Tjarnarborg á Ólafsfirði. Var skemmtunin mjög vel sótt og mikið dansað. Ég flutti nokkrar frumsamdar vísur og kvað einnig fyrir mannskapinn. Svo reyndi maður að vera duglegur að hreyfa sig, dytta að garðinum og skrifa fréttir á nokkrar síður í minni umsjá. Fri, 08 Aug 2025 12:35:00 GMT http://toti7.123.is/blog/record/817021/ 3. maí - Eins og ég hef gert grein fyrir hér í síðustu færslum á blogginu er hugmyndin að taka fyrir eina viku í senn og segja frá þar sem tíminn hleypur alltaf frá manni og ekki gefst tími til að skrifa um hina ýmsu viðburði sem maður tekur þátt í og tilefni er til að segja frá. Síðast var það vikan 27. apríl - 3. maí sem ég sagði frá og þar var ýmislegt í gangi en lokadagur vikunnar þarf að fá sérstaka umfjöllun. Frásögnin endaði á hinu frábæra föstudagskvöldi 2. maí þegar ég hélt upp á 60 ára afmæli mitt í annað sinn og nú með mínu nánasta fólki á suður- og vesturhelmingi landsins. Það var alveg geggjað gaman og yndislegt í alla staði. En það gafst lítill tími til hvíldar að aflokinni gleði því það þurfti að vakna eldsnemma og bruna norður á Sigló í erfitt en þakklátt verkefni. Þá var minningarathörn um hana elsku Mundý, sem ég starfaði með í áratugi við kennslu og söng, sem kvaddi okkur allt of snemma. Minningarathöfnin fór fram í firðinum hennar, Héðinsfirði, sem skartaði sínu fegursta. Við Stulli, spilafélagi minn, vorum beðnir um að stýra fjöldasöng við athöfnina og spila svo ljúf lög við erfidrykkjuna. sem fór fram í íþróttahúsinu á Siglufirði að athöfn lokinni. Fjölmennið við athöfnina og erfidrykkjuna sýndi hversu mörg hjörtu þessi einstaka kona snerti á lífsleiðinni með umhyggju sinni og kærleika. Það var yndislegt að fá að taka þátt í að kveðja þessa yndislegu vinkonu mína og ég setti saman smá vísu sem ég flutti í minningarathöfninni. Svo fögur mynd er minning þín og minningarnar ylja oss. Hvíl í friði Mundý mín mun þér fylgja sólarkoss. Tue, 05 Aug 2025 16:10:00 GMT http://toti7.123.is/blog/record/816959/ Vikan 27. apríl - 3 maí var bara nokkuð frábær. Hún hófst með Vortónleikum okkar í Karlakór Fjallabyggðar og fóru þeir fram í Siglufjarðarkirkju. Skemmtilegt prógram, bæði án undirleiks og með hljómsveit, og var mæting tónleikagesta ljómandi góð. Við vorum bara nokkuð grobbnir með okkur karlarnir. Svo tók við kennsla í MTR næstu daga og einhver fréttaskrif og útivist. Að kvöldi þess 1. maí lékum við Stulli svo á skemmtilegum þjóðbúningadansleik í Miðgarði í Skagafirði og að honum loknum pikkuðu Stína mín og Amalía yngsta dóttirin mig upp og við brunuðum í borgina því mikið stóð til. Þann 21. desember sl. var ég svo lánsamur að ná 60 ára aldri og var því fagnað með opnu húsi á heimili okkar Stínu á Siglufirði. Þar mættu margir og fögnuðu með okkur. En þar sem tímasetning fæðingardagsins er ekki alveg sú heppilegasta til ferðalaga, svona þremur dögum fyrir jól, þá var ákveðið að hafa fagnað síðar fyrir mitt nánasta fólk á suður- og vesturhelmingi landsins. Sú gleði var föstudaginn 2. maí sl. og hýsti Hrefna dóttir mín, Orri, hennar ektamaður, og börnin þeirra þrjú gleðskapinn sem fram fór í Garðabænum. Til leiks mættu einnig systkini mín þrjú og þeirra fylgdarlið, Pála elsta dóttir mín með sitt fólk (nema Fíu sem var að dimmitera) og svo kom að sjálfsögðu stórkaupmaðurinn og ættarhöfðinginn faðir minn að vestan. Úr varð veisla af bestu gerð, ljúfar veitingar, frábær félagsskapur, söngur og gleði. Til að kóróna gleðina mætti Björn Thoroddsen, stórfrændi, með gítarinn og flutti Bítlasyrpu fyrir “afmælisbarnið” og TOB tríóið (Tóti, Orri og Bjössi), sem var myndað á staðnum, tróð upp og flutti þrjú lög. Amalía, dóttir okkar, söng svo Yesterday af innlifun og Logi bróðir stal senunni, eins og venjulega, í flutningi sínum á All of me, við undirleik Orra, eftir orð sem hittu í hjartastað frá systkinum mínum. Yndislegt kvöld með mínu fólki sunnan- og vestanlands og Stína mín sá um að allt gengi vel fyrir sig og að allir færu saddir og sáttir úr húsi. Mon, 21 Jul 2025 18:48:00 GMT http://toti7.123.is/blog/record/816939/ Vikan 20. - 26. apríl var í rólegri kantinum. Páskadagur þann 20. og að sjálfsögðu lambasteik á boðstólum fyrir stórfjölskylduna. Þessir páskar sérkennilegir að því leyti að ekkert var skíðað þar sem frúin fór í krossbandaaðgerð árinu áður og átti enn að taka það rólega en svo var líka lítið um snjó. Veðrið gott og tíminn m.a. nýttur til að fara í vorverkin í garðinum og stunda ýmiskonar aðra útivist sem og til samskipta við familíuna. Líf var á Ljóðasetrinu um páska að venju. Eyfirski safnadagurinn fastur liður á sumardaginn fyrsta þar sem þó nokkrir gestir litu inn sem og í páskaopnuninni. Svo var unnið að skýrslugerð fyrir Umf Glóa sem ég átti þátt í að stofna árið 1994 og hef verið formaður og þjálfari þar síðustu 30 ár. Æfing var hjá Karlakór Fjallabyggðar sem ég hef sungið með síðustu tvö ár og við Stulli, Sturlaugur Kristjánsson, tókum okkar vikulegu æfingu. Við komum fram sem tvíeykið Stulli og Tóti og það hefur verið nóg að gera hjá okkur síðan við hófum formlegt samstarf 2023. Svo var verið að skrá og skrifa. Ritaði 8 fréttir, þar af 4 í héraðsfréttablaðið Helluna sem kemur út einu sinni í mánuði hér í Fjallabyggð en ég hef skrifað fréttir í það í rúm 30 ár. Fyrst eingöngu íþróttafréttir en síðar ýmiskonar tíðindi af mannlífi, menningu og íþróttum. Fri, 18 Jul 2025 12:56:00 GMT http://toti7.123.is/blog/record/816935/ Maður leggur alltaf af stað með góðum hug að blogga um þau viðfangsefni sem maður er að fást við hverju sinni og segja frá einhverju skemmtilegu. Svo er tíminn bara svo fljótur að líða og hleypur frá manni trekk í trekk og allt í einu eru liðnar vikur eða mánuðir án þess að hér séu sett inn einhver tíðindi. En nú á að taka þetta föstum tökum og segja frá hverri viku fyrir sig og birta mynd eða myndir með. Við hefjum leik frá síðasta bloggi, sem var víst um miðjan apríl! Vikan 13. - 19. apríl hófst á Akureyri þar sem við gistum eina nótt á hóteli. Höfum verið dugleg við þetta undanfarin tvö ár eða svo þar sem börnin þrjú sem við Stína eigum saman eru nú öll búsett þar. Hittum þessar elskur allar sem og listafólkið Loga bróður og Billu konu hans sem voru þar í sýningarferð. Fengum okkur mat og drykk með listafólkinu. Við Stína störfum bæði við Menntaskólann á Tröllaskaga, þann frábæra skóla, og nú var komið páskafrí þar. Þá var tími til að sinna aðeins Ljóðasetrinu, sem ég stofnaði og stýri hér á Siglufirði, áður en brunað var í Borgarfjörðinn þar sem við dvöldum í tvær nætur í frábærum félagsskap góðra vina. Blíðuveður, mikil útivera, góður matur og rólegheit. Að venju var unnið að ýmiskonar skrásetningu í vikunni, bækur skráðar á Ljóðasetrinu og skrifaðar 8 fréttir á fésbókarsíður verkefna sem ég tengist. Mynd: Vinahópurinn í blíðunni við Langá. Thu, 17 Jul 2025 07:53:00 GMT http://toti7.123.is/blog/record/816511/ Já, það hefur verið nóg um að vera á hinum ýmsu sviðum að undanförnu. Starfið í Menntaskólanum á Tröllaskaga gengur að óskum með mínu frábæra samstarfsfólki. Færri komast að en vilja í þennan skóla, flestir nemenda eru þó fjarnemar vítt og breitt um landið og heiminn. Vildum gjarnan fá fleiri staðnema og vonandi kemur þeim til með að fjölga á næstu árum. Höfum fengið margar góðar heimsóknir á síðustu vikum m.a. 10. bekkinga frá Dalvík og úr Fjallabyggð, kennara frá Danmörku og Grænlandi sem eru með okkur í samstarfsverkefni og svo 4 kennara frá Frakklandi sem voru að kynna sér starfshætti okkar og skólabraginn. Nóg hefur verið um að vera í tónlistinni og þar hafa 2 skemmtilegir áfangar náðst á liðnum vikum. Ég hef nú komið fram rúmlega 1600 sinnum til að flytja tónlist frá því að tónlistarferillinn hófst árið 1978 og hef flutt rúmlega 1200 lög. Helstu viðburðir síðustu vikur hafa verið dansleikir á Akureyri, í Svarfaðardal og á Ólafsfirði með honum Stulla, koma fram með Vorboðakórnum frá Siglufirði, heimsækja ljóðaklúbb á Hornbrekku og flytja þeim ljóð og lög og taka á móti hópi á Ljóðasetrinu og þar fylgir alltaf einhver músik. Einnig tók ég upp grunna að tveimur lögum hjá vini minum og tónlistarsnillingi Elíasi Þorvaldssyni. Fyrir utan þetta hefur eitt og annað verið bardúsað sem fyllir lífið gleði og ánægju. Alltaf eitthvað verið að skrifa; fréttir á ýmsar síður, nokkrar vísur hafa orðið til, ýmis skrásetning í gangi og einhverjar gamansögur hafa verið festar á blað. Myndin er af fyrstu hljómsveitinni minni, sem hét Brestur. Hér er hún að spila í Baldurshaga á Bíldudal á 17. júní 1979 og þarna erum við bekkjarbræðurnir á fimmtánda ári. Gísli Ragnar lék á gítar og söng, ég spilaði á trommur og söng og Helgi Hjálmtýs plokkaði bassann. Sun, 13 Apr 2025 18:07:00 GMT http://toti7.123.is/blog/record/816360/ Já, tíminn flýgur áfram, manni finnst árið bara rétt byrjað en samt er það komið vel á þriðja mánuð. Það hefur verið nóg að gera á ýmsum vígstöðum. Sem betur fer náðust samningar varðandi kjarasamninga kennara svo maður getur haldið sínu striki á vinnustaðnum góða; Menntaskólanum á Tröllaskaga þar sem ég kenni íslensku og náttúrusögu á þessari önn auk þess að vera sérlegur menningarfulltrúi skólans, sjá um verkefnið Heilsueflandi framhaldsskóli og skrifa fréttir á heimasíðu hans. Skólinn hlaut á dögunum viðurkenningu sem Fyrirmyndarstofnun og hefur nú í rúman áratug verið meðal 10 efstu stofnana af sinni stærð enda starfsandi einstaklega góður og hvetjandi. Í tónlistinni hefur allt verið á blússandi siglingu. Búinn að koma fram 13 sinnum á þessu ári, oftast með Sturlaugi Kristjánssyni, honum Stulla. Spiluðum m.a. fyrir dansi á 6 þorrablótum og sáum einnig um fjöldasöng á flestum þeirra auk þess sem við spiluðum á balli á Akureyri og fl. Svo hefur maður eitthvað komið fram einn með gítarinn. Nóg framundan í þessum efnum; fleiri dansleikir með Stulla, erum komnir með bókanir eitthvað fram á næsta ár, svo eru það tónleikar með Karlakór Fjallabyggðar eftir páska og ekki má gleyma að það á að skella sér í að taka upp 2 lög eða svo, fyrstu drög að því vonandi í þessari viku. Ritstörfin hafa ekki gleymst, endalaust verið í fréttaskrifum á ýmsar fésbókarsíður verkefna sem ég tengist auk heimasíðu skólans og héraðsfréttablaðsins Hellunnar. Svo er verið að ljúka við að skrá síðustu siglfirsku gamansögurnar í hefti númer 8 í ritröðinni 50 gamansögur frá Siglufirði. Sögurnar því að verða 400 talsins í þessi hefti. Svo stýrir maður Ljóðasetrinu og Ungmennafélaginu Glóa, tiltölulega rólegt á báðum stöðum um þessar mundir, og er kominn í framkvæmdanefnd fyrir Landsmót 50+ sem verður haldið hjá okkur hér í Fjallabyggð næsta sumar. Þar er allt að komast í fullan gang í undirbúningi. Það var því ágætt að skjótast aðeins suður í síðustu viku í afslöppun og til að heilsa upp á dætur og barnabörn, vini og ættingja. Áttum þar mjög góðar stundir með fólkinu okkar á suðvestur horninu og ræktuðum tengslin. Mon, 10 Mar 2025 10:39:00 GMT http://toti7.123.is/blog/record/816169/ Árið er 2025 og ég kominn á sjötugsaldur! Það er bara þannig! Efst í huga er þó þakklæti fyrir að ná þó a.m.k. þessum áfanga, það eru ekki allir svo lánsamir og hugur minn er hjá þeim vinum mínum og kunningjum sem nú berjast við óværur sem herja á líkama þeirra. Hugur minn er hjá ykkur, kæru vinir. En ég fer bjarstýnn ínn í nýtt ár með fögur fyrirheit og fullan poka af fyrirætlunum sem á að koma í verk á nýju ári. Tónlistarlífið er þegar komið af stað og allar líkur á blómlegasta tónlistarári í töluverðan tíma. Samstarf okkar Sturlaugs Kristjánssonar, Stúlla eða Stulla, gengur að óskum. Samanlagðir ferlar okkar í tónlist rúmlega ein öld og eftir tveggja ára formlegt samstarf er lagalistinn hjá okkur kominn í um 250 lög! Búnir að koma tvisvar sinnum fram á þessu ári og framundan eru nokkur þorrablót og í framhaldi af því eru bókanir vel inn í sumarið. Á dagskránni eru einnig bæjarhátíðarnar Bíldudals grænar ... og Síldarævintýrið á heimavöllum mínum og þar verður án efa stigið á stokk oftar en einu sinni eða tvisvar. Ég ætla að gefa út a.m.k. tvö rit á árinu, rit sem hafa verið í undirbúningi síðustu ár, og áfram er haldið að vinna að fleiri verkum á ritvellinum auk þess að rita fréttir á ýmsar heima- og facebooksíður og í héraðsfréttablaðið Helluna, líkt og síðustu þrjá áratugi. Svo eru það Ljóðasetrið sem ég stýri, Ungmennafélagið Glói, þar sem ég stýri og þjálfa og ýmis önnur verkefni sem tínast til. Ekki má svo gleyma aðalstarfinu í Menntaskólanum á Tröllaskaga, þeim frábæra vinnustað, þar sem ég mun kenna áfram og starfa við ýmis verkefni. Við hlið mér stendur eiginkonan og börn og barnabörn vaxa og dafna, sækja sér menntun og upplifa ævintýri. Ég hlakka til góðra stunda með þeim á árinu. Já, hér verður ekkert slakað á, kæru vinir. Njótum þess sem lífið gefur okkur, gefum af okkur, þökkum fyrir að vera til og lifum lífinu lifandi, til þess er það. Sun, 19 Jan 2025 17:03:00 GMT http://toti7.123.is/blog/record/816015/ Eins og fyrri daginn er í nógu að snúast. Lokaspretturinn á haustönninni stendur yfir í Menntaskólanum á Tröllaskaga, þar sem ég kenni, glæsileg sýning á verkum nemenda stendur yfir, yfirferð verkefna lokið, lokaeinkunnir komnar í hús og útskrift stúdenta á næsta leyti. Blómlegt og kraftmikið starf í þessum skóla þar sem færri komast að en vilja. Nemendafjöldi yfir 500 síðustu annir, mikill meirihluti eru fjarnemar. Skilaði af mér afmælisriti Ungmennafélagsins Glóa í síðasta mánuði. Félagið varð 30 ára fyrr á árinu og mér falið að rita og ritstýra riti í tilefni tímamótanna. Söguna þekki ég mæta vel enda verið þjálfari hjá félaginu frá upphafi og formaður í 29 ár. Ritið er 28 síður, í A4 broti og ríkulega skreytt af myndum. Í því er stiklað á stóru í sögu félagsins og tæpt á þeim fjölmörgu verkefnum sem félagið hefur staðið fyrir og komið að þessa þrjá áratugi. Má þar nefna æfingar í a.m.k. 5 íþróttagreinum, leikjanámskeið og Ævintýravikur, umhverfismál, lífseigustu ljóðahátíð landsins, 17. júní hátíðahöld, ýmis hreyfingarátök, umsjón Kvennahlaupsins í tæpa tvo áratugi o.fl. Svo hefur nóg verið um að vera í ljóðadeildinni. Ljóðahátíðin Haustglæður, sem Umf Glói og Ljóðasetur Íslands, halda nú 18 árið í röð í Fjallabyggð er á lokametrunum en hún er samansett af 10 - 12 viðburðum á haustmánuðum ár hvert. Að þessu sinni hefur hátíðin verið að færa út kvíarnar og ég hef verið með viðburði bæði á Dalvík og Akureyri í tengslum við hana auk þess sem nokkrir viðburðir hafa verið hér í Fjallabyggð. Sérkenni hátíðarinnar er hversu virkan þátt börn og ungmenni taka í henni og úrslit í hinni árlegu ljóðasamkeppni nemenda í 8. - 10. bekk Grunnskóla Fjallabyggðar voru m.a. kynnt fyrir fullu húsi nemenda í Ljóðasetrinu í síðustu viku og ljóðalestur hefur farið fram fyrir nemendur í yngri bekkjum skólans. Eldri borgarar gleymast ekki heldur og hefur ljóðalestur og söngur verið fyrir þá bæði á Dalvík og Ólafsfirði. Tue, 17 Dec 2024 09:23:00 GMT http://toti7.123.is/blog/record/815948/ Höfum átt ljúfar og góðar stundir með stórfjölskyldunum undanfarnar vikur. Brá mér vestur á Bíldudal um miðjan október að heilsa upp á karl föður minn og vini og ættingja þar. Í lok október var svo haldið í borgina til að halda upp á afmæli elsta barnabarnsins, hennar elsku Ronju sem átti 21 árs afmæli. Var það sérlegga góð stund. Í suðurferðinni hittum við einnig systkini okkar, börn og barnabörn. Í byrjun nóvember dvöldum við hjónin nokkrar nætur í bústað í Kjarnaskógi og fengum góða vini og ættingja í grillveislur. Um miðjan nóvember vorum við Logi bróðir svo með dagskrá í Davíðshúsi á Akureyri, opnuðum þar Litlu ljóðahátíðina. Þar voru eiginkonur okkar viðstaddar og þrjár dætur mínar. Svo kom yngsta dóttirin heim í laufabrauðsgerð á dögunum og sonurinn kíkir í mat öðru hvoru. Ómetanlegar fjölskyldustundir. Sun, 24 Nov 2024 14:02:00 GMT http://toti7.123.is/blog/record/815810/ Októbermánuður fer líflega af stað, nóg að gera í hinu blómlega starfi í Menntaskólanum á Tröllaskaga sem og í tónlistar- og ljóðadeildinni og öðrum verkefnum sem tínast til. Var með kynningu á starfsemi Ljóðasetursins fyrir íbúa og gesti á dvalarheimilinu Dalbæ á Dalvík í upphafi mánaðar og auðvitað hljómuðu einhver ljóð og lög líka. Tók einnig á móti tveimur nemendahópum á setrinu og fræddi þá um íslenska ljóðlist og fleira skemmtilegt og brá gítarnum á loft. Spilaði og söng á hestamannaballi í Svarfðardalnum fyrstu helgina í október með Stulla félaga mínum og var þar mikil gleði. Mundaði einnig gítarinn fyrir hestafólk á Siglufirði og í heimsókn vestur á Bíldudal var spilað fyrir fjöldasöng á árshátíð eldri borgara í Vesturbyggð ásamt félaga mínum Matta. Svo er fleira í pípunum. Við Matti í góðum gír Fri, 18 Oct 2024 16:24:00 GMT http://toti7.123.is/blog/record/815705/ Eins og einhverjir vita er ég stofnandi og forstöðumaður Ljóðaseturs Íslands á Siglufirði. Setrið var vígt af frú Vigdísi Finnbogadóttur þann 8. júlí 2011 og hefur verið opið síðan yfir sumartímann en aðra tíma ársins tek ég á móti hópum. Á þessum rúmu 13 árum hafa verið haldnir um 400 viðburðir í setrinu og við höfum tekið á móti tæplega 200 hópum sem fá kynningu á starfsemi setursins, fræðslu um íslenska ljóðlist sem og ljóðalsestur, söng og kveðskap allt eftir óskum hvers hóps. Oftar en ekki gríp ég í gítarinn og flyt nokkur lög eða kveð nokkrar stemmur á þessum lifandi viðburðum, og eins þegar hópar sækja setrið, og nú á dögunum kom ég fram í 400asta skiptið á Ljóðasetrinu til að flytja tónlist. Alls hef ég komið fram tæplega 1600 sinnum á tónlistarferlinum á rúmlega 200 stöðum þ.e. ýmsum félagsheimilium, skemmti- og veitingastöðum, skólum, sölum, kirkjum, útisviðum, söfnum o.fl. Mynd: Trölli.is Sun, 29 Sep 2024 16:56:00 GMT http://toti7.123.is/blog/record/815544/ Haustið 2013 hóf ég störf sem kennari við Menntaskólann á Tröllaskaga og er óhætt að segja að þessi rúmi áratugur sem liðinn er síðan hafi verið viðburðaríkur í starfi. Skólinn er sérlega framsækinn og starfið þar einstaklega blómlegt. Ég get fullyrt að þar fá kennarar að nýta og þróa sína hæfileika og hæfni í starfi með stöðugri símenntun og framþróun hvort sem er í kennslufræðum eða tækninýjungum. Ef þið komið í skólann getið þið t.d. búist við því að mæta vélmennum á göngum hans en þar eru innanborðs kennarar skólans sem búsettir eru erlendis eða í öðrum landshlutum og þeir sinna kennslu sinni að hluta gegnum þessi tæki. Fjarnám við skólann hefur verið sérlega vinsælt og hafa fjarnemar verið um 500 talsins á hverri önn undanfarin ár. Ég er þannig gerður að ég vil vera með mörg járn í eldinum, hef ýmis áhugamál og get jafnvel sagt að mér sem ýmislegt til lista lagt og hef fengið að njóta þeirra kosta minna við skólann. Ég hef t.d. kennt 44 mismunandi áfanga við skólann á þessum rúma áratug og búið til um 3/4 þeirra. Megnið af þeim eru áfangar á sviði íslensku og íþrótta en einnig mjög skemmtilegir áfangar eins og t.d. saga kvikmyndalistarinnar og saga rokktónlistar að ógleymdum áfanga helguðum ljóðagerð. Einnig hef ég kennt áfanga í frumkvöðlafræði, fjármálalæsi, íþróttasálarfræði og þjóðfræði svo eitthvað sé nefnt. Auk þess hef ég fengið að sjá um menningarmál í skólanum; sett upp ýmiskonar listsýningar og skipulagt viðburði, stýri verkefninu Heilsueflandi framhaldsskóli við skólann og s.l. haust tók ég við sem fréttaritari skólans og rita fréttir á heimasíðu hans. Það sem er samt mest heillandi við kennarastarfið er að fá að starfa með öllu þessu unga efnilega fólki, og fólki á öðrum aldri líka, sem er að þroskast og finna sína leið út í lífið, er að finna leiðir til að leysa þau verkefni sem liggja fyrir, leita lausna, skoða hlutina frá ýmsum hliðum og uppgötva sína styrkleika. Þá er aðeins eitt ótalið; sá ótrúlegi starfsmannahópur sem starfar við MTR. Þetta lærdómssamfélag þar sem allir eru tilbúnir að aðstoða, segja til og leiðbeina, þar sem maður lærir eitthvað nýtt á hverjum degi og getur ekkert dvalið í torfkofanum sínum með sömu gömlu verkfærin og áður. Auk þess er þetta vinnustaður þar sem fólk stendur saman, hlúir að hvert öðru, hrósar og ræðir málin af hreinskilni og heilindum. Það eru forréttindi að vinna á slíkum stað. Thu, 29 Aug 2024 17:46:00 GMT http://toti7.123.is/blog/record/815477/ Þrítugasta Síldarævintýrið á Siglufirði - Það tuttugasta sem ég kem fram á Hátíðin Síldarævintýrið var haldin í fyrsta sinn 1991 og í þrítugasta sinn nú um sl. verslunarmannahelgi, þar sem nokkur ár hafa dottið út m.a. vegna Covid. Frá því að ég flutti til Siglufjarðar haustið 1993 höfum við fylgst nokkuð þétt að, ég og Síldarævintýrið. Kom fyrst fram á hátíðinni árið 1994 en svo eignuðumst við Stína Videoval og næstu árin stóð maður bak við búðarborðið og seldi hátíðargestum ýmsar veitingar. Það var svo árið 2001 sem ég kom fram næst á Síldarævintýri og hef komið fram á svo til öllum þeirra síðan og þetta nýliðna var það tuttugasta. Telst mér til að alls hafi ég komið fram rúmlega 100 sinnum á þessari hátíð, þ.e. að meðaltali um 5 sinnum á hverju þeirra! Þessar framkomur hafa verið fjölbreyttar; oftast á sviði í miðbænum en einnig á skemmtistöðum, söfnum og setrum. Oft einn með gítarinn en einnig með sönghópnum Gómum í Síldarminjasafninu sem og á sviði og með ýmsum öðrum spilafélögum víða um miðbæinn. Eftir að ég opnaði Ljóðasetrið hef ég verið með fjölda viðburða þar á Síldarævintýri og einnig samdi ég leikþátt sem ég sýndi í Bátahúsi Síldarminjasafnsins auk þess sem ég hefi komið fram á Þjóðlagasetrinu, á Kaffi Rauðku og við Segul 67 svo eitthvað sé nefnt. En þá er ekki allt talið í samneyti mínu og þessa ævintýris sem kennt er við síldina. Ég var t.d. kynnir á tveimur hátíðum og stýrði auk þess söngvakeppni barna a.m.k. tvisvar sinnum, en hún var fastur liður á hátíðinni hér áður. Þegar Síldarævintýrið missti svo flugið um 2017 þá átti ég frumkvæði að því að koma því aftur í gang árið 2019 og hef verið í stýrihópi þeim sem hefur haldið Síldarævintýrið síðan. Þessi samfylgd hefur verið skemmtileg en sannarlega útheimt mikla vinnu og ekki síður mikla þolinmæði frá mínum nánustu. Launin hafa aðallega verið ánægjan af því að taka þátt og skapa líf og fjör í bænum okkar. Mon, 12 Aug 2024 09:56:00 GMT http://toti7.123.is/blog/record/815410/ Síðasta laugardag var Trilludagurinn haldinn í sjöunda sinn á Siglufirði og hefur sjaldan tekist eins vel. Einmuna veðurblíða lék við gesti sem sigldu út á fjörðinn á fjölda smábáta með vöskum sæköppum. Alls fóru rúmlega 600 manns á sjó. Þegar í land var komið tóku Kiwanismenn við aflanum flökuðu og grilluðu og smakkaðist sérlega vel. Að sjálfsögðu þarf að hafa réttu tónlistina í eyrunum og því vorum við Stulli kallaðir til og tókum við tvær 90 mínútna skorpur þar sem við fluttum um 60 lög af prógraminu okkar sem telur orðið vel á þriðja hundrað lög. Gömlu góðu sjóaralögin og aðrir slagarar í aðalhlutverki og það var sungið með og sumir brustu í dans. Mikið fjör og mikil gleði. Næst á dagskrá hjá okkur Stulla er Síldarævintýrið, sem hefst á morgun, þar munum við koma fram a.m.k. þrisvar sinnum saman og auk þess verð ég með þrjá viðburði á Ljóðasetrinu. Sem sagt rólegt og gott framundan. Wed, 31 Jul 2024 10:16:00 GMT http://toti7.123.is/blog/record/815369/ Ég átti frumkvæðið að þvi að setja Síldarævintýrið á Siglufirði af stað aftur árið 2019, eftir tveggja ára hlé, og hef verið í þriggja manna stýrihópi ævintýrisins síðan. Framkvæmdin var þó með nýjum hætti, í ljósi breytinga sem orðið hafa á Siglufirði síðustu ár. Lagt upp með að virkja bæjarbúa meira en áður með hverfisskreytingum og hverfisgrillum og að dagskráin væri borin upp af heimafólki í minni viðburðum vítt og breitt um bæinn. Markmið hátíðarinnar að kynna það sem Siglufjörður hefur upp á að bjóða í menningu, mat og drykk, veita bæjarbúum tækifæri til að eiga góðar stundir saman, að ógleymdu stórfenglegu umhverfi og sögunni sem er við hvert fótmál. Vel tókst til árið 2019 en svo tóku Covid árin við og settu svip sinn á framkvæmdina. Í fyrra var loks hægt að blása til sóknar á ný og héldum við glæsilegt og vel heppnað Síldarævintýri. Í ár verður bætt í í tilefni þess að þetta er þrítugasta Síldarævintýrið sem haldið er. Sem fyrr er öll barnadagskrá ókeypis, heimafólk er í aðalhlutverki í tónlistarflutningi og annarri skemmtun og söfn og setur bjóða upp á fjölbreytta dagskrá. Auk þess verður sameiginleg grillveisla bæjarbúa, hverfaskreytingar, bjórleikar, síldarball, froðufjör, hoppukastalar, fjöldasöngur, flugeldasýning og margt, margt fleira eins og sjá má í dagskránni sem hér fylgir með. Upplagt að kíkja á Siglufjörð um verslunarmannahelgina og njóta. Sun, 21 Jul 2024 18:07:00 GMT http://toti7.123.is/blog/record/815321/ Góðir dagar á Siglufirði að undanförnu, veðurblíða, sól og sæla en kannski heldur mikill vindur. Tíminn hefur verið notaður til að smíða skýli yfir grillið; það er komið langleiðina, mála húsið; langt kominn með að pensla og vonandi rúllað á morgun og svo er verið að sinna ljóðlistinni og tónlistinni. Viðburðir á Ljóðasetrinu á hverjum degi kl. 16.00 og oftar en ekki fer gítarinn á loft á þessum viðburðum til að skreyta það sem fram fer, frumflutti t.d. nýtt lag í gær. Svo er skipulagning fyrir Síldarævintýrið um verslunarmannahelgina einnig í fullum gangi og munum við birta dagskrána í næstu viku. Sem sagt nóg um að vera, a.m.k. eins mikið og maður vil. Fri, 12 Jul 2024 20:36:00 GMT http://toti7.123.is/blog/record/815300/ Hún lukkaðist ljómandi vel upplestrar- og tónlistarferðin á Vestfirðina á dögunum. Bjó til dagskrá sem ég kallaði Þorpin þrjú og fékk til liðs við mig Ólaf Svein Jóhannesson, skáld frá Tálknafirði, og Birtu Ósmann, listakonu á Patreksfirði, sem er nýkjörin bæjarlistamaður Fjallabyggðar. Hvert okkar flutti sín ljóð, auk ljóða Jóns úr Vör, og svo söng ég og spilaði eigin lög við ljóð skáldanna. Inn á milli var svo sagt frá tilurð ljóðanna og rifjaðar upp skemmtilegar sögur frá uppvaxtarárum okkar Ólafs fyrir vestan. Fluttum dagskrána í þorpunum þremur; Patreksfirði, Tálknafirði og Bíldudal á fimmtudag og föstudag, var skemmtileg og notaleg stemning á þeim öllum og aðsókn með ágætum. Vesturbyggð styrkti verkefnið og eru sveitarfélaginu færðar kærar þakkir fyrir. Á leiðinni norður á laugardeginum var stoppað í Skagafirðinum og sungið með honum Stulla á dansleik eitthvað inn í nóttina í stórafmæli í Miðgarði. Þar var heilmikið stuð eins og lög gera ráð fyrir. Það var ljúft að leggjast á koddann og hvíla raddböndin þegar komið var heim á Sigló um miðja nótt. Myndin er tekin að loknum upplestri okkar í Dunhaga í Tálknafirði. Skemmtilegt upplestrarrými og frábær matsölustaður. Mon, 08 Jul 2024 10:05:00 GMT