Fréttir
16.05.2012 Setið við skriftir
Þessa dagana sit ég við skriftir í þeim frítíma sem er nú allt í einu kominn í dagskrá vikunnar. Þegar bæði blak- og frjálsíþróttaæfingum er lokið eru þarna allt í einu nokkrir lausir klukkutímar sem hægt er að nýta. Ég er að ganga frá nokkrum greinum sem ég hef verið að möndla við undanfarna mánuði og þær munu vonandi birtast opinberlega seinna á árinu.
16.05.2012 Glæsileg bekkjarskemmtun
Í gær voru 1. og 2. bekkur með skemmtun fyrir fjölskyldur sínar. Mættu fjölmargir til að njóta þeirra söngveislu sem boðið var til og tókst krökkunum vel upp undir öruggri stjórn Mundý og Guðnýjar, kennara bekkjanna. Þau fluttu m.a. nýja lagið mitt við ljóðið Betlari eftir Jóhannes úr Kötlum og lék ég undir hjá þeim og leiddi sönginn. Fengu krakkarnir gott klapp fyrir frábæra skemmtun.
13.05.2012 Önnur heimsókn til 1. og 2. bekkjar
Á föstudaginn fór ég aftur með gítarinn í heimsókn til krakkanna í 1. og 2. bekk. Við æfðum okkur að syngja nýja lagið mitt við ljóðið Betlari eftir Jóhannes úr Kötlum og munum við syngja það saman við einhver tækifæri í skólanum á næstunni. Svo var beðið um fleiri lög og lék ég fyrir þau þrjú frumsamin lög til viðbótar við góðar undirtektir.
11.05.2012 Þingseta og frjálsíþróttamót
Í gær lauk frjálsíþróttastarfi vetrarins þegar við lukum við Maímótið okkar innanhúss. Keppt var á þriðjudag og svo aftur í gær. Keppt var í 6 greinum og féllu 4 siglfirsk aldursflokkamet, þar af bætti Elín Helga tvö eigin met og Patrekur eitt, keppendur voru 14 talsins. Í lokin var flatbökuveisla og runnu veitingarnar ljúft niður. Að loknu móti var brunað í Ólafsfjörð þar sem fram fór ársþing UÍF, Ungmenna- og íþróttasambands Fjallabyggðar og stóð það í þrjá og hálfan tíma. Þingið var gott og gagnlegt, áhugaverðir fyrirlestrar og fínar umræður. Aðalstjórnin var endurkjörin en nýir varamenn komu inn, ég slapp fyrir horn í þetta sinn, enda í nógu að snúast á mörgum öðrum vígstöðvum.
08.05.2012 Nóg að gera á næstunni
Það verður í ýmis horn að líta á næstu vikum og það er ekki hægt að segja annað en að margt spennandi sé framundan. Fyrir það fyrsta þá er komið að síðustu vikunum í skólastarfinu hjá okkur og nóg að gera þar, en skóla verður slitið þann 1. júní. Ég er með mót fyrir iðkendur mína í frjálsum þessa vikuna, það verður tvískipt, á þriðjudag og fimmtudag, og verður keppt í 7 greinum. Þetta eru lokin á vetrarstarfinu á þeim vettvangi. Við blakarar erum hættir æfingum en ætlum að ljúka vetrinum formlega með því að hittast um aðra helgi, borða saman, spila blak og reyna að vera svolítið skemmtilegir. Síðustu helgina í maí ætlum við fjölskyldan að renna á Vestfirðina og hitta fólkið mitt þar, foreldra og öll systkini, og eiga saman góða daga í Ísafjarðardjúpinu. Svo í byrjun júní munum við kennarar og starfsfólk halda í náms- og kynnisferð til Spánar og Gíbraltar og við hjónin ætlum að framlengja ferðina um viku í tilefni að 10 ára brúðkaupsafmæli okkar. Ætlum við að eiga góðar stundir þar syðra með vinum okkar. Svo verður kannski sungið eitthvað meira næstu vikurnar, líklegt er að eitthvað gerist í bókaútgáfu og hver veit nema maður rati í fleiri ævintýri. Þau eru alltaf við nefið á okkur ef við viljum.
Hluti af stórfjölskyldunni fyrir vestan
05.05.2012 Eyfirski safnadagurinn í dag
Í dag var Eyfirski safnadagurinn og var þá ókeypis aðgangur að öllum söfnum á svæðinu. Opið var frá 13-17 og var þema dagsins - hljóð. Ég var með opið á Ljóðasetrinu og þar var líflegt seinni part dags. Ég tók lagið á gítarinn og var létt yfir mannskapnum. Amalía söng með bekkjarfélögum sínum í Síldarminjasafninu íslenkst þjóðlag fyrir gesti sem þar voru. Elín Helga var að keppa á badmintonmóti inn á Akureyri og Patrekur fór með vini sínum í bíó í höfuðstað Norðurlands. Frúin var upptekin við lærdóminn, síðasta próf vetrarins verður á mánudaginn. Þá verður loks hægt að fara að slaka aðeins á.
05.05.2012 Stutt ferð í borgina
Ég brá mér í borgina á fimmtudag í kjölfar ánægjulegs símtals þar sem ég var beðinn um að mæta á fund hjá Vildarvinum Siglufjarðar og taka á móti styrk fyrir hönd Ljóðasetursins. Var það gert með glöðu geði og bros á vör. Var einnig með kynningu á setrinu og starfseminni þar fyrir fundarmenn og endaði hana á að kyrja eitt íslenskt þjóðlag við ljóð eftir Þorstein Erlingsson. Föstudagurinn var meðal annars nýttur til að hitta hugsanlegan útgefanda að þriðju ljóðabók minni og liggja þau mál ljós fyrir í næstu viku.
Hitti svo báðar systur mínar og átti með þeim góðar stundir sem og eldri dætur mínar og dótturdæturnar. Dæturnar áttu sitt hvorn merkisdaginn meðan ég stoppaði í borginni. Pála varð 29 ára á fimmtudaginn og var haldið upp á það með ánægjulegum 8 manna málsverði á Ítalíu og Hrefna lauk síðasta prófinu sínu í stjórnmálafræði við Háskóla Íslands á föstudeginum með glæsibrag. Nú stefnir hún út til Danmerkur í frekara nám. Flottar stelpur sem maður á.
01.05.2012 Flottir tónleikar hjá Gómunum
Við söngspírurnar í Gómum héldum tónleika um helgina í Bátahúsinu og vorum með fjögurra manna hljómsveit með okkur. Efnið var blanda af siglfirskum dægurlögum og öðrum tónlistarperlum frá t.d. Abba, Hljómum, BG og Ingibjörgu, Bay City Rollers, Eagles o.fl. Voru gestir yfir sig hrifnir af dagskránni og flutningnum og skemmtu sér hið besta. Dansað var á bryggjunum og sungið með svo undir tók í húsinu. Eini gallinn var að okkur vantaði fleiri gesti, allt annað var mjög flott. Ég bendi á flotta umfjöllun um tónleikana á vefnum www.siglfirdingur.is
Það var glaumur og gleði um borð í Tý (mynd af Siglfirðingur.is)
01.05.2012 Glæsilegu blakmóti lokið
Þá er þetta ævintýri á enda; Öldungablakmótinu á Tröllaskaga lauk í gærkvöldi. Ég held að óhætt sé að segja að frábærlega hafi tekist til, mótið gekk mjög vel fyrir sig og andinn var sérlega góður. Leiknir voru tæplega 430 leikir á þremur sólarhringum í þremur íþróttahúsum og var leikið frá morgni til kvölds. Liðunum gekk upp og ofan, eins og gengur, og okkur félögunum í annarar deildar liði Hyrnunnar gekk ekki alveg nógu vel og munum við því leika í 3. deild að ári. Alls voru 7 lið frá Siglufirði; 4 kvennalið og 3 karla. Mótinu lauk svo með glæsilegu lokahófi í gærkvöldi þar sem íþróttahúsinu var breytt í veislusal á nokkrum klukkutímum. Þar voru rúmlega 700 manns í mat og úti í bæ var annað hóf fyrir þá sem ekki fengu miða á stóra hófið. Að loknum mat stigu um 1000 manns dansinn fram á nótt.
27.04.2012 Blakmótið hefst á morgun
Jæja, það er bara komið að því, Öldungamótið í blaki hefst á morgun. Síðustu daga hefur mikið gengið á hér á Siglufirði við undirbúning og nú er allt orðið klárt. Fyrstu leikir hefjast klukkan 8 í fyrramálið á öllum þremur stöðunum; Siglufirði, Ólafsfirði og Dalvík og leikið verður frá morgni til kvöld um helgina og fram eftir mánudeginum. Mitt lið leikur í 2. deildinni og er stefnt að því að halda sér þar. Við leikum tvo fyrstu leikina okkar á Dalvík á morgun.
27.04.2012 Frumflutti nýtt lag í dag
Ég var beðinn um að semja lag fyrir krakkana í 1. og 2. bekk við ljóðið Betlari eftir Jóhannes úr Kötlum. Ég fékk ljóðið í hendurnar í gær og snaraði saman lagi og heimsótti krakkana í morgun og við sungum það saman. Þau voru fljót að ná laglínunni og hugmyndin er að flytja það saman á einhverjum viðburði í skólanum á næstunni. Svo lék ég fyrir þau 2-3 frumsamin lög í viðbót við góðar viðtökur. Börn eru skemmtilegir og hreinskilnir áheyrendur.
23.04.2012 Fjör á Andrésar andar leikunum
Það var mikið fjör á Andrésar andar leikunum um helgina á Akureyri. Veðrið var með miklum ágætum og færið mjög gott. Siglfirsku keppendunum gekk alveg ágætlega og ég sá ekki betur en allir skemmtu sér vel. Amalía var að keppa og endaði um miðjan hóp í sínum flokki í stórsviginu, sem var eina formlega greinin hjá 7 ára, en svo var líka farið í gegnum þrautabraut og fleira skemmtilegt og spennandi. Stína og Elín Helga skíðuðu alla dagana en við Patrekur létum föstudaginn duga í fjallinu og notuðum laugardagsmorguninn til að ganga frá íbúðinni.
23.04.2012 Sungið fyrir eldri borgara
Í gærkvöldi var Félag eldri borgara á Siglufirði og í Fljótum með árshátíð sína á Allanum. Þar komum við fram; ég, Mundína og Stúlli og sungum og lékum nokkur lög. Fyrst sungum við Mundína tvö lög saman og síðan fluttum við Stúlli tvö lög. Það fyrra var frumsamið lag eftir mig sem féll í það góðan jarðveg að við vorum klappaðir upp.
18.04.2012 Lokaspretturinn fyrir tónleikana
Þá er komið að lokasprettinum í æfingum fyrir tónleikana sem við í sönghópnum ætlum að vera með hér á Sigló um aðra helgi. Við munum leggja áherslu á siglfirsk dægurlög í bland við ýmis önnur stemningslög m.a. frá Abba, Bay City Rollers, Herman´s Hermit, Villa Vill, Hljómum, Ingimar Eydal og ýmsum fleirum. Tónleikarnir verða kl. 22.00 sunudaginn 29. apríl í Bátahúsinu, sem er án efa eitt magnaðasta tónleikahús landsins. Með okkur verður fjögurra manna hljómsveit og er æft stíft þessa dagana. Ég lofa frábærri skemmtun og fjöri.
Þá fer að koma að Andrés andar leikunum, en þeir hefjast á morgun á Akureyri. Stína ætlar að fara með stúlkurnar, Amalía er að fara að keppa, en hún er búin að æfa vel í vetur og taka miklum framförum. Elín Helga ætlar að fara með til að hvetja systur sína og leika sér á skíðum. Við feðgarnir kíkjum svo inn á Akureyri á föstudaginn og tökum þátt í gleðinni. Ég held að það séu um 15 keppendur frá Siglufirði þetta árið sem taka þátt í leikunum. Skíðaíþróttin hefur átt undir högg að sækja hér en á undanförnum 2-3 árum hefur hún verið að rétta úr kútnum og vonandi fjölgar iðkenum þar á næstu árum.
17.04.2012 Flottir krakkar í frjálsum
Ég fór með 9 manna hóp af frjálsíþróttakrökkum á mót inn á Akureyri á sunnudaginn og stóðu þau sig alveg frábærlega í keppni við aðra Norðlendinga. Kepptu þau í 50 greinum samtals og í 21 þeirra urðu þau í verðlaunasætum. Krakkarnir settu 12 siglfirsk aldursflokkamet og margir bættu afrek sín verulega. Patrekur og Elín Helga voru meðal keppenda og setti Patrekur m.a. þrjú met og sigraði í hástökki. Elín Helga náði best 3. sæti í skutlukasti en hún er á yngra ári í sínum flokki.
Hér er hópurinn - mínus einn
16.04.2012 Gott gengi í blakinu á laugardaginn
Það gekk óvenju vel hjá okkur félögunum í blakinu á mótinu á Akureyri á laugardaginn. Við höfum tekið þátt í nokkrum mótum í vetur og yfirleitt verið um og fyrir neðan miðjan hóp en að þessu sinni fórum við alla leið í úrslitaleikinn. Þar biðum við að vísu lægri hlut 21-18 í báðum hrinum og enduðum því í öðru sæti af 10 liðum. Nokkur þessara liða verða mótherjar okkar í 2. deildinni á öldungamótinu stóra eftir tæpar tvær vikur og vonandi er þetta einhver vísbending um gengi okkar þar.
13.04.2012 Íþróttafár næstu daga
Það verður nóg um að vera á íþróttasviðinu hjá fjölskyldunni næstu dagana og fjörið er reyndar byrjað því Amalía er þessa stundina að keppa á Siglufjarðarmóti í svigi uppi í Skarði og á sunnudaginn mun hún keppa í stórsvigi. Á morgun fer ég inn á Akureyri að keppa í blaki með félögum mínum í Hyrnunni, er þetta lokaundirbúningur okkar fyrir öldungamótið um mánaðarmótin næstu. Á sunnudaginn liggur svo leiðin aftur inn á Akureyri, að þessu sinni með 10 manna hóp á frjálsíþróttamót og þar munu bæði Elín Helga og Patrekur keppa í nokkrum greinum. Mamman verður heima að læra á meðan á þessu stendur!
07.04.2012 Opnuviðtal í Sunnudagsmogganum
Í Sunnudagsmogganum, sem kom út í dag, er opnuviðtal við mig um Ljóðasetrið, uppbyggingu þess og starfsemi. Skapti Hallgrímsson, blaðamaður á Akureyri, var hér á ferðinni í síðasta mánuði og óskaði eftir viðtali, sem var auðfengið. Öll umfjöllun kemur setrinu vel, styrkir og auglýsir starfsemina.
04.04.2012 Líf og fjör á Ljóðasetrinu
Það er að færast líf í Ljóðasetrið þessa dagana. Ég er búinn að vera með opið undanfarna tvo daga í 2-3 tíma á dag og næstu daga verður opið frá kl. 13-17 og lifandi viðburðir verða kl. 15.00. Ég er búinn að setja upp sérsýningu með þeim útgáfum sem til eru af Passíusálmunum á setrinu auk fleiri bóka og muna sem tengjast Hallgrími Péturssyni og á föstudaginn verður fjallað um og lesið úr þessu mikla verki Hallgríms. Svo er bara að vona að gestir fjölmenni, a.m.k. er fullt af fólki í bænum og á eftir að fjölga mikið um páskana.
04.04.2012 Safnaði 14.000 í Mottumars
Átakinu Mottumars lauk á dögunum, þó enn sé hægt að heita á keppendur, og hafa nú safnast tæplega 30 milljónir í söfnuninni. Ég stefndi að því að safna 50.000 kr. út á mína mottu en náði ekki nema 14.000 að þessu sinni. En það var gaman að vera með og leggja átakinu lið. Mottan er farin en gæti birst aftur að ári!
03.04.2012 Páskafrí og fjör
Þá er komið páskafrí í grunnskólanum og í gær áttum við fjölskyldan frábæran dag saman á skíðum í Skarðinu. Veðrið var eins og best verður á kosið, glampandi sól og logn og vorum við tæpa fimm tíma á skíðum og síðan var farið á blakæfingu. Því miður er veðurspáin ekki alveg nógu hagstæð næstu daga, suðvestan strekkingur sem er leiðinleg átt í Skarðinu, en við vonum það besta. Það er fullt af gestum í bænum og fjölgar enn meira um páskana svo vonandi verður hægt að skíða sem mest. En þegar það er ekki hægt er upplagt að heimsækja söfn bæjarins sem verða opin næstu daga sem og veitingastaðina þar sem boðið er upp á himar ýmsu kræsingar. Tveir dansleikir verða á skemmtistöðum bæjarins og trúbadorar að spila svo eitthvað sé nefnt úr skemmtanadeildinni. Að vísu verður engin söngskemmtun þetta árið og er það í fyrsta sinn í um 10 ár sem maður tekur ekki þátt í slíkri skemmtun um páskana.
03.04.2012 Glæsileg Vorskemmtun hjá krökkunum
Krakkarnir í 1. - 7. bekk hér á Sigló héldu sína árlegu Vorskemmtun í síðustu viku og var þemað saga Siglufjarðar. Sérlega vel tókst til og úr varð heilsteypt og ánægjuleg skemmtun sem ungir sem aldnir höfðu gaman af. Vert er að benda á flottar myndir og góða umfjöllun um þessa skemmtun á vefnum siglfirðingur.is en sá vefur er í tenglasafninu hér til hliðar. Hér má sjá tvær myndir af vefnum þar sem bekkir dætra minna eru að sýna sín atriði.
Síldarstúlkan Elín Helga, önnur frá vinstri
Amalía, í appelsínugulum kjól, syngur íslenskt þjóðlag ásamt Aroni frænda sínum
30.03.2012 Vantaði herslumuninn
Það vantaði herslumuninn hjá krökkunum í liði Fjallabyggðar, auk meiri sanngirni frá dómara, í Skólahreysti í gær. Keppnin byrjaði mjög vel hjá okkur og vorum við í forystu eftir tvær greinar en svo kom bakslagið þegar sami dómarinn dæmdi af okkur fjölmargar armbeygjur og dýfur, en það voru greinarnar sem við vorum öruggust með að væru í lagi. Ekki var hægt að merkja nokkurn mun á útfærslum okkar krakka og hinna en þau fengu samt ekki nema hluta af sínum tilraunum gildar og þurftu auk þess að bíða allt of lengi við að hlusta á útskýringar dómarans í miðju kafi. Þarna féllum við töluvert niður töfluna og enduðum svo um miðjan hóp í hraðabrautinni. Útkoman varð því 6. sæti af 9. skólum, en sanngjarnt hefði verið að enda 3. sæti að mínu mati. En ekki þýðir að deila við dómarann og krakkarnir stóðu sig mjög vel og mega vera mjög sátt við sína frammistöðu.
28.03.2012 Skólahreysti á morgun
Á morgun mun lið Grunnskóla Fjallabyggðar etja kappi við granna sína á Norðurlandi í undanriðli sínum í Skólahreysti og fer keppnin fram í íþróttahöllinni á Akureyri. Ég tók að mér að sjá um undirbúning liðsins að þessu sinni og verður spennandi að sjá hvernig þessum efnilegu krökkum gengur. Allir nemendur í eldri deild fara með til að hvetja krakkana áfram en þeir byrja á því að fara á skauta í Skautahöllinni á meðan keppendurnir kynna sér aðstæður á keppnisstað, prufa hraðabrautina, spjalla við umsjónarmenn keppninnar og dómara auk þess að undirbúa sig andlega sem líkamlega fyrir þá þrekraun sem bíður þeirra. Svo er bara að krossleggja fingur og vona það besta.
Á næstu dögum setur Marsibil mágkona mín upp myndlistarsýningu vestur á Ísafirði. Á þessari sýningu verða verk sem hún hefur unnið út frá ljóðum vestfirskra skálda og viti menn þar á kallinn eitt ljóð. Það er úr seinni ljóðabókinni minni, sem ber nafnið Fleiri æskumyndir, en Marsibil hefur einmitt myndskreytt báðar ljóðabækur mínar til þessa. Sýningin mun svo fara víðar og er verið að leggja drög að því að hún verði sett upp í Ljóðasetrinu hér á Siglufirði í sumar. Einnig er gaman að segja frá því að í undakeppni Stóru upplestrarkeppninnar á okkar svæði á dögunum var m.a. lesið ljóð eftir mig.
26.03.2012 Styttist í stórmótið
Nú er rétt um mánuður í Öldungamótið í blaki sem fer fram hér á Tröllaskaganum. Skráningu fer að ljúka og núna hafa 115 lið skráð sig til leiks og ljóst að þau verða í kringum 130 talsins og keppendur því um 1000, það er enginn smá hópur! Þetta verður mikið fjör eins og alltaf þegar blakarar koma saman til að keppa og skemmta sér. Héðan frá Siglufirði verða líklega 5 kvennalið og 3 karlalið og er æft af miklum móð 2-3 sinnum í viku þessa dagana.
24.03.2012 Hóparnir hópast á Ljóðasetrið
Það verður nóg að gera á næstunni að taka á móti hópum á Ljóðasetrinu. Fjórir hópar eru bókaðir þar næstu 2-3 vikurnar. Á morgun kemur sá fyrsti og seinna í vikunni annar og svo á ég von á tveimur skólahópum strax eftir páskafrí. Annar þeirra er skipaður nemendum en hinn kennurum. Svo verður eitthvað opið um páskana og vonandi líta einhverjir gestir þá daga.
24.03.2012 Vorverkin hafin í hitasvækju í mars
Það lék aldeilis við okkur veðrið í dag hér á Siglufirði, hitinn fór í 16 stig og sólin bakaði okkur í logninu. Stína og Amalía skelltu sér á skíði kl. 10 í morgun og voru í Skarðinu í fjóra tíma. Ég byrjaði á vorverkunum bæði heima og við Ljóðasetrið; sópa gangstéttir, þrífa bílskúrinn o.fl. Krakkarnir voru úti í vatnsslag, eltingarleikjum og að blása sápukúlur á meðan. Fengum svo góða gesti frá Akureyri; Helga afa, móðursystur mína og mann hennar og sátum við að spjalli í góða stund yfir nýbakaðri hjónabandssælu áður en ég sýndi þeim Ljóðasetrið.
20.03.2012 Mottumarsinn gengur ágætlega
Núna á fjórða degi mínum í mottumarsinum, þ.e. það eru fjórir dagar síðan ég skráði mig til leiks, þá er búið að heita 12.000 kr. á mottuna mína og er maður í efri hlutanum í þessari söfnun. Stefnan var sett á 50.000 svo enn er langt í land og skora ég á vini, vandamenn og aðra lesendur að leggja málefninu lið mðe því að heita á mottuna mína annað hvort með því að fara inn á mottumars.is og greiða með kreditkorti eð með því að millifæra og setja þá númerið mitt - 3872 með. Eða með því að senda sms og þá eru þrjú númer í boði eftir því hvað þú vilt leggja mikið til söfnunarinnar: 908-1001 fyrir 1000 kr. 908-1002 fyrir 2000 kr. og 908-1005 fyrir 5000 kr. og setja númerið mitt 3872 með sem skilaboð. Koma svo!!
Stefnt er að því að safna í heildina 35 milljónum og eru milljónirnar orðnar tæplega 15 í dag. Söfnunarféð verður notað í rannsóknir og fræðslu veg krabbameins hjá körlum.
19.03.2012 Líflegur sunnudagur
Það var nóg um að vera hjá mér og fjölskyldunni í gær. Dömurnar allar skelltu sér á skíði í gærmorgun meðan ég henti í hjónabandssælu og fór svo að skúra og þrífa á Ljóðasetrinu. Kl. 12 - 14 var félagið sem ég veiti forstöðu og þjálfa hjá, Umf Glói, með dagskrá í íþróttahúsinu í tilefni Vetrarleika sem voru þessa helgi í Fjallabyggð. Buðum við upp á íþróttaskóla fyrir 3-6 ára og frjálsíþróttakynningu og var mikið líf og fjör í íþróttahúsinu, komu skíðadrottningarnar út í íþróttahús og tóku þátt í frjálsum. Að því loknu var farið heim að matast og svo bakaði ég tvær uppskriftir af pönnukökum. Síðan var söngæfing hjá mér áður en maður fór í matseldina aftur, í þetta sinn kvöldmaturinn og síðan var farið með allt gengið niður í Ljóðasetur þar sem fram fór Vinjettuhátíð fyrir fullu húsi, tæplega 40 manns. Ármann Kr. Reynisson las vinjettur sínar og fékk fleiri í lið með sér og svo voru tónlistaratriði milli upplestra. Stúlli var með nikkuna, ég flutti lag á gítarinn og einnig kváðu félagar úr kvæðamannafélaginu Rímu nokkur lög og slóst ég líka í hópinn með þeim. Í hléinu sáu dömurnar mínar um kaffisölu þar sem pönnukökurnar og hjónabandssælan runnu út. Þetta var flott kvöldstund og góður dagur.
Við Stúlli fluttum saman lagið Kveðjur sem ég samdi við samnefnt ljóð eftir Lauga póst
16.03.2012 Þá er það Mottumarsinn - 3872
Jæja gott fólk. Í annað sinn ætla ég að vera með í mottumars og nú er þetta tekið alla leið þ.e. ekki bara að safna skeggi heldur líka að safna
peningum til styrktar góðu málefni sem er fræðsla og forvarnir gegn krabbameini hjá körlum. Ég byrjaði að safna skegginu í byrjun mars, við misjafnlega mikla hrifningu viðstaddra og misjöfn viðbrögð, en var bara að skrá mig til leiks í peningasöfnuninni á mottumars.is í dag. Stefni ég að því að safna 50.000 kr, það þýðir ekkert annað en setja markið hátt. Þeir sem vilja heita á mig í þessari söfnun senda sms í síma 908-1001 fyrir 1000 kr. 908-1002 ef þeir vilja styrkja um 2000 kr og eða 908-1005 ef styrkurinn á að vera 5000 kr. með þessu senda þeir skilaboðin 3872 sem er númer mitt í keppninni. Inni á mottumars.is er svo líka hægt að greiða með greiðslukorti eða millifæra sem og fylgjast með hversu mikið safnast með því að slá inn nafnið mitt í einstaklingskeppninni. Kæru vinir og lesendur ég skora á ykkur að taka þátt og styrkja gott málefni.
Svona lítur kallinn út með mottuna
11.03.2012 Skíðadagur hjá fjölskyldunni
Fjölskyldan skellti sér öll á skíði og bretti í Skarðinu í gær og átti góða stund saman. Færið var afbragðsgott, veðrið með ágætum og skyggnið þokkalegt. Vindurinn hefur verið að stríða skíðafólki töluvert í vetur og ekki verið hægt að hafa opið eins mikið og til stóð vegna hans, sérstaklega á það við um efstu lyftuna. En í gær slapp þetta til og nægur er snjórinn enn á skíðasvæðinu hér en hann er farinn að minnka töluvert á skíðasvæðum hér í kringum okkur. Ég gæti trúað að um 150 - 200 manns hafi verið á skíðum um það leyti sem við skíðuðum í gær en á föstudeginum voru um 300-400 manns á skíðum í Skarðinu. Þá komu m.a. þó nokkrir frá Akureyri þar sem lokað var í Hlíðarfjalli vegna veðurs þann dag.
11.03.2012 Áhugaverður fundur Rauðku ehf.
Á föstudaginn var haldinn hér á Siglufirði mjög áhugaverður fundur á vegum Rauðku ehf. Á fundinum var fjöldi frummælenda sem fjölluðu um ferðamennsku og ýmislegt varðandi uppbyggingu hennar á Siglufirði auk atvinnumála. Fundurinn fór fram fyrir fullu húsi í Rauðku, en um 150 manns sóttu hann. Mest var fjallað um hina glæsilegu uppbyggingu Rauðku ehf á Siglufirði og ekki síður um enn glæsilegri áform sem það fyrirtæki hefur m.a. um gerð nýs golfvallar, uppbyggingu skíðasvæðisins, byggingu stærðar hótels á staðnum, standsetningu stóreldhúss sem getur afkastað allt að mat fyrir 700 manns á dag og svo mætti áfram telja. Þessi áform eru svo stórkostleg ofan á allt það sem Rauðka ehf hefur byggt upp á síðustu árum að allir ættu að gleðjast og taka þátt í að gera að veruleika eins fljótt og mögulegt er.
Einnig var fjallað um möguleikann á auknu millilandaflugi til Akureyrar og þeirri vinnu sem fer nú fram í að fá fleiri erlenda ferðamenn í beinu flugi þangað. Slíkt er mjög mikilvægt fyrir ferðamennsku á Norðurlandi því það hefur sýnt sig að aðeins lítið brot af þeim erlendu ferðamönnum sem lenda á Keflavíkurfluggvelli leggja leið sína út á land.
Að lokum var gerð grein fyrir þeirri fyrirætlan líftæknifyrirtækisins Genís að flytja framleiðslustarfsemi sína til Siglufjarðar og mun það skapa 10 ný störf á staðnum til að byrja með auk þeirra starfa sem skapast við uppbygginguna. Reiknað er með að starfsemi þar hefjist á næsta ári.
08.03.2012 Styttist í stórmótið í blaki
Það styttist óðfluga í Öldungamótið í blaki sem fer fram í Fjallabyggð og á Dalvík í ár og sjá blakfélögin á svæðinu um undirbúning og framkvæmd. Í gær hittumst við blakarar af þessu svæði í Ólafsfirði, spiluðum blak og fórum yfir stöðuna í undirbúningnum. Allt er á góðu róli. Heimasíða mótsins komin í loftið www.trolli2012.is og komið töluvert af efni þar inn. Búið er að opna fyrir skráningu og líðin eru að tínast þar inn. Við erum búin að fjárfesta í nýjum búningum á karlaliðin og sýndir voru bolir sem seldir verða á mótinu. Einnig var mótslagið frumflutt sem er eldhresst og á eftir að koma liðinu í gírinn. Búist er við um 1000 manns á svæðið til að taka þátt í mótinu sem verður um mánaðamótin apríl/maí og þá verður líf og fjör.
En það verður ekki bara spilað blak, fólk er líka að koma hingað til að skemmta sér og gera vel við sig og munum við í sönghópnum Gómum gera okkar hjálpa til í því efni með glæsilegri söngskemmtun í Bátahúsinu.
04.03.2012 Líf að færast í Ljóðasetrið
Jæja, þá er að lifna yfir starfseminni í Ljóðasetrinu á nýjan leik. Um helgina litu þar inn nokkrir gestir sem voru hér á kvæðamannamóti, í vikunni á ég von á skólahópi í setrið og þann 18. mars mun hann Ármann Kr. Reynisson vera með Vinjettuhátíð í setrinu þar sem lesið verður í vinjettubókunum hans og flutt tónlist. Svo er hugmyndin að vera með eitthvað opið um páskana.
01.03.2012 Sungið á síðbúnu þorrablóti
Í morgun héldum við síðbúið þorrablót hjá eldri deildinni í skólanum. Þar var heilmikið fjör. Krakkarnir höfðu útbúið sviðasultu, karftöflustöppu og rófustöppu í matreiðslutímum auk þess að baka rúgbrauð og flatbrauð og svo mátti koma með nesti að heiman. Ég og Elías Þorvalds lékum undir og stjórnuðum fjöldasöng áður en krakkarnir fóru að borða, tóku þau hraustlega undir og rugguðu sér með. Fín stund með nemendum.
Kátir voru karlar virkar alltaf
27.02.2012 Enn ein borgarferðin yfirstaðin
Brá mér enn eina ferðina í borgina um síðustu helgi. Íslandsmót 11-14 ára fór þá fram í frjálsíþróttahöllinni og þar mættum við til leiks. Elín Helga keppti í fjórum greinum og gekk ágætlega. Hún náði best 10. sæti í kúluvarpinu. Svo heimsóttum við afastelpurnar og hittum fleiri úr fjölskyldunni, foreldrar mínir voru í borginni og var gott að hitta þá eftir nokkurra mánaða hlé. Stelpurnar fóru í Skemmtigarðinn og skemmtu sér vel en pyngjan var nokkuð léttari á eftir hjá foreldrunum. Komum svo heim í gærkvöldi, beint í steikina hjá tengdó en Stína varð eftir í borginni til að sinna námi sínu í Háskólanum þessa vikuna.
22.02.2012 Leikið og sungið á prjónakvöldi í bókasafninu
Það hefur verið líflegt á bókasafninu hjá okkur eftir að þar voru gerðar breytingar á starfseminni sem og innanstokks. Þar er nú ávallt líflegt þegar maður lítur inn; krakkarnir una sér vel í krakkahorninu, bæjarbúar líta inn til að lesa blöðin og spjalla og svo að sjálfsögðu að ná sér í bækur á náttborðið. Ein af nýungunum í vetur eru prjónakvöld sem haldin eru reglulega á safninu. Þar koma konur bæjarins saman til að prjóna og spjalla og stundum er boðið upp á einhverja viðburði t.d. upplestur úr nýjum bókum o.fl. Í gærkvöldi mætti ég með gítarinn og lék og söng nokkur af mínum lögum fyrir konurnar, sem voru 15-20 talsins að þessu sinni. Fékk ég fínar viðtökur og boðinn velkominn aftur við fyrsta tækifæri.
21.02.2012 Vetrarfrí
Þessa dagana stendur yfir vetrarfrí hjá okkur í skólanum og er það ósköp ljúft. Ég nota dagana til að sinna ýmsum verkefnum sem s.s. ýmiskonar bókhaldi og skýrslugerð fyrir félögin sem ég er í forsvari fyrir, skrifa í Helluna, aðstoða frúna í náminu, skrásetja ýmislegt, lesa, huga að Ljóðasetrinu, leika við börnin og eitt og annað smálegt sem setið hefur á hakanum undanfarnar vikur.
19.02.2012 Fjölskyldudagur á Akureyri
Við fjölskyldan skelltum okkur til Akureyrar í gær og áttum þar góðan dag. Byrjuðum á því að skella okkur á skauta í Skautahöllinni, alltaf gaman að því, brugðum okkur svo upp í kirkjugarð og heimsóttum leiði Elvu Ýrar og ömmu Línu, því næst var kíkt á Subway í smá næringu og svo lá leið okkar barnanna í leikhúsið að sjá hina stórskemmtilegu og sprellfjörugu sýningu Gulleyjuna á meðan Stína útréttaði fyrir heimilið. Svo lá leiðin aftur heim í heiðardalinn og allir sáttir.
16.02.2012 Ótrúlegar breytingar með tilkomu Héðinsfjarðarganga
Ég hafði bent á það, bæði í ræðu og riti, að áhrifin af tilkomu Héðinsfjarðarganga yrðu mun meiri en íbúar í Fjallabyggð gerðu sér grein fyrir, sérstaklega hvað varðar ferðamennskuna. Því mér fannst, þegar framkvæmdin stóð yfir, margir vanmeta þær jákvæðu breytingar sem göngin hefðu fyrir okkur. Á dögunum barst gleðileg staðfesting á þessari vissu minni. Ferðamálastofa gaf út sína árlegu skýrslu um ferðalög Íslendinga um landið og þar er Siglufjörður í fimmta sæti yfir þau sveitarfélög sem Íslendingar sóttu mest heim á árinu. Árið 2010 heimsóttu 8% Íslendinga okkur í heim en árið 2011 17,7%, hvorki meira né minna. Áhugavert er einnig að sjá að mikil fjölgun ferðamanna varð í Skagafirði og er hann í fjórða sæti á landsvísu. Þarna eiga Héðinsfjarðargöngin einnig sinn þátt því með tilkomu þeirra opnast þessi flotti "túristahringur" um Skagafjörð og Eyjafjörð með fjölda áhugaverðra viðkomustaða. Þær gleðilegu fréttir bárust einnig að Siglfirðingum fjölgaði um 11 á síðasta ári en þetta er í fyrsta sinn í tvo áratugi sem fjölgar á Siglufirði. Nú er það okkar að sjá til þess að ferðamenn vilji áfram sækja hingað og ég sé ekki annað en að útlitið sé gott. Hér verður fjöldi hátíða og annarra viðburða á árinu sem fjöldi fólks mun án efa sækja, áframhaldandi uppbygging í ferðaþjónustu er fyrirhuguð og áhugaverðir listamenn eru að bætast í þann góða hóp sem hér er fyrir.
Mynd frá því framkvæmdirnar stóðu yfir, nýr vegur að gangnamunnanum í Skútudal
10.02.2012 Kvæðafólk hittist í Ljóðasetrinu
Í gærkvöldi kom hópur kvæðafólks saman í Ljóðasetrinu til að kveða. Þessi hópur hefur sungið saman reglulega síðan í haust þegar stofnaður var formlegur félagsskapur um þetta áhugamál. Við í kvæðamannhópnum Fjallahnjúkum erum hryggstykkið í þessum hópi og þau kvæðalög sem við vorum að kveða eru grunnurinn í því sem farið hefur verið í fram að þessu en nokkur ný lög hafa bæst við. Ég hef ekki gefið mér tíma til að vera með þessum hópi fyrr en í gærkvöldi og var það mjög gaman. Enda bað Rúna, stjórnandi hópsins, mig um að fá að hittast í Ljóðasetrinu svo ég mundi loksins mæta.
05.02.2012 Önnur helgin í röð á frjálsíþróttamót fyrir sunnan
Ég brá mér aftur suður um þessa helgi, nú með tvo drengi að keppa á Íslandsmóti 15-22 ára. Annar þeirra var Patrekur minn og keppti hann í þremur greinum. Hann er ekki alveg búinn að ná upp fullri orku eftir að hafa legið í flensu í viku um daginn en stóð sig þó betur en um síðustu helgi og bætti afrek sín í hástökki og langstökki. Hann varð 5. í hástökkinu og 8. í kúluvarpi og langstökki á Íslandsmótinu í flokki 15 ára pilta og eru allir tiltölulega sáttir við það.
Þarna erum við feðgarnir í frjálsíþróttahöllinni fyrir sunnan
05.02.2012 Gómarnir sungu á þorrablóti í skólanum
Við söngfuglarnir í Gómunum og Stúlli vorum beðin að mæta á þorrablót hjá yngri deildinni í skólanum og syngja nokkur lög. Það gátu 4 af 5 orðið við því svo við létum slag standa og mættum á svæðið sem leynigestir. Það var mjög gaman að syngja fyrir krakkana og þau tóku okkur afskaplega vel. Í lokin stjórnuðum við svo fjöldasöng og var hressilega tekið undir í þorralögunum. Börnin voru með þorranesti með sér og ilmaði íþróttasalurinn af kræsingunum.
Gómarnir í full swing (mynd af sksiglo.is)
02.02.2012 Skíðadagar
Að undanförnu hafa verið skíðadagar hjá okkur í skólanum í skíðaparadísinni í Skarðinu. Yngra stigið hér á Siglufirði var í fyrradag og eldra stigið í gær. Ég var einn þeirra kennara sem fór með eldra stiginu og vorum við að frá kl. 9.00 til 12.30. Veðrið var þó ekki eins og best verður á kosið því það rigndi töluvert og blés svolítið líka. En þeir nemendur sem voru klæddir miðað við veður voru mjög duglegir og skemmtu sér hið besta og það gerði ég líka þrátt fyrir veðrið og þungt færi.
31.01.2012 Tvær frjálsíþróttaferðir til viðbótar framundan
Maður verður í stöðugum ferðum á frjálsíþróttamót í næsta mánuði því framundan eru Íslandsmótin hjá iðkendum mínum. Um næstu helgi er Íslandsmótið hjá 15-22 ára og síðustu helgina í febrúar hjá 11-14 ára. Munu nokkrir af iðkendum mínum taka þátt í þessum mótum og að sjálfsögðu fylgir maður þeim eftir.
31.01.2012 Fínt gengi á Stórmóti ÍR
Það gekk vel á Stórmóti ÍR í frjálsum um síðustu helgi í Reykjavík. Iðkendur mínir unnu til fimm verðlauna og settu jafn mörg siglfirsk aldursflokkamet og eitt félagsmet hjá Glóa. Svo var farið í bíó, á Hamborgarafabrikkuna, einhverjir kíktu í skemmtigarðinn og Klifurhúsið svo það var nóg um að vera hjá hópnum, sem taldi 8 krakka.
25.01.2012 Stefnan tekin suður á frjálsíþróttamót
Hugmyndin er að halda suður á bóginn á morgun og aðstoða iðkendur mína í frjálsum á Stórmóti ÍR um helgina. Veðurspáin er þó ekki mjög spennandi svo það verður að sjá til hvort brottför verður á morgun eða á föstudaginn. Átta siglfirskir keppendur verða á þessu fjölmenna móti þar sem keppendur verða líklega um 800 talsins. Börnin mín, Patrekur og Elín Helga, verða meðal keppenda en þar sem Patrekur er rétt að stíga upp úr viku flensu er nú ekki víst að hann verði upp á sitt besta. En það er alltaf gaman að vera með og reyna sig.
22.01.2012 Skemmtilegt blakmót
Fimmta árið í röð héldum við blakarar á Siglufirði Minningamót Bigga Lauga, en það er haldið til minningar um blakarann, skíðamanninn, smiðinn, íþróttafrömuðinn og sómamanninn Birgi Guðlaugsson, sem kvaddi allt of snemma. Mótið er sérstakt að því leyti að þar leika saman í liði konur og karlar og er stigakeppni einstaklinga. Dregið er í lið fyrir hvern leik og hver leikmaður skráir á miðann sinn hversu mörg stig hans lið skorar í hverjum leik. Leiknar voru átta hrinur og svo lagði hver leikmaður saman sín stig. Ég er með 2-3 brákuð rifbein og gat því ekki beitt mér sem skyldi en tókst þó að næla mér í þriðja sætið. Þátttakendur voru 47 talsins að þessu sinni og iðaði íþróttahúsið af lífi frá kl. 14-17. Um kvöldið var svo komið saman, borðaður góður matur, afhent verðlaun og svo að sjálfsögðu sungið langt fram á kvöld við undirleik okkar Danna.
22.01.2012 Þorrinn byrjar með stæl
Það er ekki hægt að segja annað en maður hafi byrjað Þorrann með krafti, búinn að fara á tvö þorrablót og aðeins liðnir tveir dagar af Þorranum. Það segir frá því fyrra hér að neðan og á föstudagskvöldið bauð tengdapabbi mér á Þorrafund hjá Kiwanisklúbb staðarins, sem er í mikilli sókn um þessar mundir, og voru m.a. þrír nýir meðlimir teknir inn á þessum fundi. Þar var boðið upp á glæsilegan þorramat sem rann sérlega ljúflega niður.
20.01.2012 Gómarnir sungu á sjúkrahúsinu
Í gær var fyrsta framkoma okkar Gómanna á þessu ári. Þá sungum við á þorrablóti á Heilbrigðisstofnuninni hér á Sigló, er þetta þriðja árið í röð sem við gerum það. Ég hóf dagskrána með því að flyta tvö frumsamin lög og fór líka með tvö ljóð úr eigin smiðju. Áheyrendur voru afskaplega þakklátir fyrir þessa heimsókn og svo fengum við þennan dýrindis þorramat í sönglaun, ekki amalegt það.
Syng eigið lag á blótinu við texta eftir Siglfirðinginn Lauga póst (Mynd af sksiglo.is)
17.01.2012 Búinn að "fylla á" náttborðið
Ég hef verið ágætlega duglegur að lesa í haust en ekki eins duglegur að setja bækurnar inn hér á vefnum og segja álit mitt á þeim. En nú er ég búinn að bæta úr því. Í liðnum Á náttborðinu hér til hliðar má sjá allar þær bækur sem ég hef lesið undanfarin ár og álit mitt á þeim, þ.e. fyrir utan barnabækurnar sem ég les fyrir Amalíu. Er með nokkrar bækur á náttborðinu til viðbótar sem bíða lesturs.
17.01.2012 Gómarnir af stað aftur
Þá er sönghópurinn Gómar að hefja æfingar aftur eftir jólafrí og mun kom fram í fyrsta sinn á árinu nú í vikunni. Stefnt er að fleiri landvinningum á árinu og enn meiri gleði.
15.01.2012 Ronja afastelpa í Mbl. sjónvarpinu
Næstu vikurnar verða teknar til sýningar stuttmyndir frá Kvikmyndaskóla Íslands á sjónvarpi Mbl.is á netinu. Fyrsta myndin er myndin Klás og er hægt að sjá hana núna á mbl.is. Hún fjallar um jólasvein sem hefur fengið sér aðeins neðan í því og hyggur á að taka eigið líf. En átta ára stúlka kemur vitinu fyrir hann með góðmennsku sinni og sakleysi. Ronja leikur einmitt þessa átta ára stúlku og stendur sig afskaplega vel. Svo vill svo skemmtilega til að það er mynd af Amalíu dóttur minni líka á Mbl.is. í dag þar sem verið er að auglýsa hið frábæra skíðasvæði okkar hér á Siglufirði. Þar má sjá hana ásamt bekkjarsystur sinni í efstu lyftunni, í 720 metra hæð eða svo.
15.01.2012 Góð kona kvödd í gær
Amma hennar Stínu minnar, Fanney Vernharðsdóttir, lést þann 2. janúar og var jarðsungin í gær. Fanney var af þessari dugnaðarkynslóð sem nú er að kveðja. Henni féll aldrei verk úr hendi; sinnti börnum sínum og stórfjölskyldu allri þannig að eftir var tekið, tók inn á heimili sitt lamaða móðursystur sína og annaðist hana í 36 ár auk þess að vinna úti og sinna prjónaskap af miklum móð, það var bakað, tekið slátur, farið í ber, húsið þrifið hátt og lágt í hverri viku, aldrei stoppað. Það var sama hvenær maður kom í heimsókn til hennar alltaf voru tertur og aðrar veitingar á borðum og mjólkurglasið var hellt barmafullt. Það er söknuður í hjörtum ættmenna en hún var hvíldinni fegin eftir langan vinnudag og erfiða sjúkrahúslegu síðasta árið.
13.01.2012 Fyrsta frjálsíþróttamót ársins framundan
Fyrsta frjálsíþróttamótið sem ég fer með iðkendur mína á er Stórmót ÍR, sem verður haldið í Reykjavík 28.-29. janúar. Við höfum mætt á þetta mót á hverju ári síðan 2007 og alltaf náð fínum árangri. Oftar en ekki komum við heim með verðlaun og erum í baráttu um toppsætin þó keppendur í hverri grein séu allt að 50 talsins í hverjum árgangi. Mótið er stærsta innanhúsmót í frjálsum ár hvert en keppendur í fyrra voru rúmlega 800 talsins. Það verður gaman að sjá hvernig gengur í ár.
11.01.2012 Grasekkill pakkar niður jólunum
Það er nóg að gera á stóru og líflegu heimili, sérstaklega þegar frúin bregður sér suður í námið sitt í Háskólanum eins og þessa vikuna. Við Amalía kláruðum að pakka niður jólunum í gær. Búið að fylla 7 kassa af jóladóti og ég held að ekkert hafi gleymst. Svo þarf að passa að allir mæti á réttan tíma á æfingar og koma liðinu fram úr á morgnana og í skólann, aðstoða börnin við að bera út bæjarblaðið, sjá til þess að allir læri heima og aðstoða við það, fæða og klæða, skúra, skrúbba og bóna, muna eftir afmælisboðum, vaska upp, mata þvottavélina og eitt og annað sem tínist til. Síðast en ekki síst er það svo að lesa fyrir mannskapinn fyrir svefninn. Það er alveg föst regla á þessu heimili að eiga góða lestrarstund áður en boðið er góða nótt. A.m.k. með þeirri yngstu og stundum slást fleiri í hlustendahópinn. Sem sagt nóg að gera á þessum vettvangi í augnablikinu og rólegra á öðrum sviðum.
08.01.2012 Tónlistarannáll 2011 kominn inn
Þá er tónlistarannáll síðasta árs tilbúinn og er hann undir liðnum Tónlistin hér til hliðar og þar er farið í Tónlistarannálar 2006 - . Helstu tölur eru þær að ég kom fram 52 sinnum á síðasta ári til að flytja tónlist og söng og spilaði fyrir um 5400 manns. 20 sinnum kom ég fram til að flytja frumsamið efni og flutti þar 21 lag. Gómarnir voru yfir og allt um kring og komu 20 sinnum fram á síðasta ári en þar sem ég skrapp erlendis síðasta sumar missti ég af tvennum framkomum með þeim. Annars var árið fjölbreytt og skemmtilegt á tónlistarsviðinu og meðan maður hefur svona gaman af þessu heldur maður áfram.
07.01.2012 Blakmót á Dalvík
Í gær brugðum við siglfirskir blakarar okkur til Dalvíkur og tókum þar þátt í blakmóti. Tvö kvennalið og eitt karlalið mætti til leiks frá Siglufirði. Okkur körlunum gekk nú ekki sem best og lékum um botnsætið, unnum við aðeins þrjár hrinur af átta. Við erum líka að æfa upp nýtt kerfi og því var nokkuð óöryggi í leik okkar, en þegar við höfum náð tökum á því ættum við að verða sterkari en áður.
06.01.2012 Viðtal í Heima er bezt
Hið fornfræga tímarit Heima er bezt lifir enn góðu lífi og er gefið út í hverjum mánuði. Í sumar kom einn af blaðamönnum tímaritsins til Siglufjarðar, í góðum hópi fólks, sérstaklega til að líta inn á Ljóðasetrið og spurði þá hvort ég væri til í viðtal fyrir tímaritið. Að sjálfsögðu játti ég því og nú milli jóla og nýárs birtist það í 12. tbl. síðasta árs. Viðtalið er hvorki meira né minna en 6 blaðsíður og fjöldi mynda prýðir það. Í því er fjallað um ýmislegt en setrið og starfsemin þar er þó í forgrunni. Einnig ber tónlistina á góma, fjölskylduna, uppvöxtinn fyrir vestan, lífið á Sigló, íþróttirnar o.fl. Viðtalið verður örugglega mjög góð auglýsing fyrir setrið
06.01.2012 Skíðadrottningarnar í stuði
Skíðaíþróttin hefur verið stunduð grimmt af heimilisfólkinu hér á Hafnargötunni undanfarnar vikur. Dæturnar, Amalía og Elín Helga, eru báðar byrjaðar aftur að æfa skíði og Patrekur og Stína hafa verið mjög dugleg að sækja fjallið. Ég er búinn að skella mér tvisvar sinnum á skíði og svo voru Hrefna dóttir mín og Orri, kærasti hennar, í nokkurra daga heimsókn hér og þau skelltu sér að sjálfsögðu í Skarðið og voru mjög hrifin af aðstæðum og skemmtu sér vel á brettum og skíðum. Færið hefur verið frábært síðustu vikur og nægur snjór.
04.01.2012 Skólastarf hafið að nýju
Þá er skólinn byrjaður aftur eftir jólafríið og lífið gengur sinn vanalega gang. Það gekk furðanlega vel, hjá öllum fjölskyldumeðlimum, að vakna í morgun eftir vökur fram á nætur að undanförnu.
01.01.2012 Gleðilegt ár gott fólk
Já, gleðilegt ár og takk fyrir það gamla. Sjáumst hress og kát og brosum framan í heiminn þó ýmislegt gangi á. Lífið er fullt af ævintýrum ef við viljum og nennum.
01.01.2112 Fínasta stemning á Rauðku
Það var bara ágætasta stemning á Rauðku síðasta föstudag þar sem ég sá um spileríið. Ég byrjaði að spila kl. 22.00 og var nú frekar rólegt framan af en svo fjölgaði smám saman og úr varð fínasta stemning og fólk skemmti sér vel. Ég lék tæplega 70 lög m.a. nokkur frumsamin sem ég lét fljóta með vel þekktum slögurum.
31.12.2011 Stórkostlegir styrktartónleikar
Í fyrrakvöld fóru fram hér á Siglufirði hreint út sagt stórkostlegir tónleikar. Þetta voru tónleikar sem haldnir voru til styrktar fjölskyldum Elvu Ýrar og Sölku, sem eiga um sárt að binda eftir hið skelfilega umferðarslys sem varð hér í nóvember. Fjölmargir tónlistarmenn af Norðurlandi komu fram og áhorfendur létu sig ekki vanta því það var þéttsetinn bekkurinn í kirkjunni okkar, um 400 manns. Tónleikarnir stóðu í tvo tíma og tók hvert atriðið við af öðru. Þau voru hvert öðru betra og skemmtilega fjölbreytt þannig að tíminn flaug áfram. Ég kom bæði fram einn og svo með Gómunum. Ég flutti tvö ljóð eftir mig sem mér fannst hæfa tilefninu og söng svo lagið Eitt andartak sem var á plötunni minni Stolnar stundir. Við Gómarnir fluttum þrjú lög og tókst vel upp þó við hefðum verið einir karlanir að þessu sinni. Skipuleggjendur eiga mikinn heiður skilinn fyrir frábært framtak sem og allir þeir sem gerðu þessa tónleika að veruleika.
Gómarnir að flytja Hole in the World eftir Eagles
31.12.2011 Patrekur kjörinn besti frjálsíþróttadrengurinn
Við val á íþróttamanni ársins í Fjallabyggð og vali á íþróttamanni hverrar greinar var Patrekur minn valinn besti frjálsíþróttadrengurinn í flokki 13-18 ára og er þetta annað árið í röð sem hann hlýtur þennan titil. Hann er vel að honum kominn, stóð sig vel á árinu, keppti á 11 mótum og var oftar en ekki í verðlaunasætum. Hann náði góðum árangri í mörgum greinum og á m.a. næstbesta árangurinn í þremur greinum hjá 14 ára strákum á landinu í ár. Ég var beðinn um að vera með tónlistaratriði við þessa athöfn, líkt og undanfarin ár, og flutti ég eitt frumsamið lag auk þess að flytja tvö íþróttatengd ljóð úr Æskumyndunum mínum.
Verðlaunahafar: Patrekur, Jóel, sem tók við verðlaunum fyrir Sölku systir sína og Sigurjón
27.12.2011 12 met á tvennum frjálsíþróttamótum
Ég hélt frjálsíþróttamót fyrir iðkendur mína í frjálsum í nóvember og svo var okkar árlega Jólamót í desember. Rúmlega 20 krakkar tóku þátt í þessum mótum og stóðu þau sig mjög vel. Margir bættu afrek sín og komust inn á afrekaskrár félagsins og Frjálsíþróttasambandsins og alls féllu 12 siglfirsk aldursflokkamet auk þess sem tvö voru jöfnuð. Patrekur var þar að verki í fjórum tilfellum og Elín Helga í tveimur, en hún er á yngra ári í flokki 11-12 ára.
