05.02.2012  Önnur helgin í röð á frjálsíþróttamót fyrir sunnan
Ég brá mér aftur suður um þessa helgi, nú með tvo drengi að keppa á Íslandsmóti 15-22 ára. Annar þeirra var Patrekur minn og keppti hann í þremur greinum. Hann er ekki alveg búinn að ná upp fullri orku eftir að hafa legið í flensu í viku um daginn en stóð sig þó betur en um síðustu helgi og bætti afrek sín í hástökki og langstökki. Hann varð 5. í hástökkinu og 8. í kúluvarpi og langstökki á Íslandsmótinu í flokki 15 ára pilta og eru allir tiltölulega sáttir við það.

Þarna erum við feðgarnir í frjálsíþróttahöllinni fyrir sunnan

05.02.2012  Gómarnir sungu á þorrablóti í skólanum
Við söngfuglarnir í Gómunum og Stúlli vorum beðin að mæta á þorrablót hjá yngri deildinni í skólanum og syngja nokkur lög. Það gátu 4 af 5 orðið við því svo við létum slag standa og mættum á svæðið sem leynigestir. Það var mjög gaman að syngja fyrir krakkana og þau tóku okkur afskaplega vel. Í lokin stjórnuðum við svo fjöldasöng og var hressilega tekið undir í þorralögunum. Börnin voru með þorranesti með sér og ilmaði íþróttasalurinn af kræsingunum.

 
Gómarnir í full swing (mynd af sksiglo.is)

02.02.2012  Skíðadagar
Að undanförnu hafa verið skíðadagar hjá okkur í skólanum í skíðaparadísinni í Skarðinu. Yngra stigið hér á Siglufirði var í fyrradag og eldra stigið í gær. Ég var einn þeirra kennara sem fór með eldra stiginu og vorum við að frá kl. 9.00 til 12.30. Veðrið var þó ekki eins og best verður á kosið því það rigndi töluvert og blés svolítið líka. En þeir nemendur sem voru klæddir miðað við veður voru mjög duglegir og skemmtu sér hið besta og það gerði ég líka þrátt fyrir veðrið og þungt færi.

31.01.2012  Tvær frjálsíþróttaferðir til viðbótar framundan
Maður verður í stöðugum ferðum á frjálsíþróttamót í næsta mánuði því framundan eru Íslandsmótin hjá iðkendum mínum. Um næstu helgi er Íslandsmótið hjá 15-22 ára og síðustu helgina í febrúar hjá 11-14 ára. Munu nokkrir af iðkendum mínum taka þátt í þessum mótum og að sjálfsögðu fylgir maður þeim eftir.

31.01.2012  Fínt gengi á Stórmóti ÍR
Það gekk vel á Stórmóti ÍR í frjálsum um síðustu helgi í Reykjavík. Iðkendur mínir unnu til fimm verðlauna og settu jafn mörg siglfirsk aldursflokkamet og eitt félagsmet hjá Glóa. Svo var farið í bíó, á Hamborgarafabrikkuna, einhverjir kíktu í skemmtigarðinn og Klifurhúsið svo það var nóg um að vera hjá hópnum, sem taldi 8 krakka.

25.01.2012  Stefnan tekin suður á frjálsíþróttamót
Hugmyndin er að halda suður á bóginn á morgun og aðstoða iðkendur mína í frjálsum á Stórmóti ÍR um helgina. Veðurspáin er þó ekki mjög spennandi svo það verður að sjá til hvort brottför verður á morgun eða á föstudaginn. Átta siglfirskir keppendur verða á þessu fjölmenna móti þar sem keppendur verða líklega um 800 talsins. Börnin mín, Patrekur og Elín Helga, verða meðal keppenda en þar sem Patrekur er rétt að stíga upp úr viku flensu er nú ekki víst að hann verði upp á sitt besta. En það er alltaf gaman að vera með og reyna sig.

22.01.2012  Skemmtilegt blakmót
Fimmta árið í röð héldum við blakarar á Siglufirði Minningamót Bigga Lauga, en það er haldið til minningar um blakarann, skíðamanninn, smiðinn, íþróttafrömuðinn og sómamanninn Birgi Guðlaugsson, sem kvaddi allt of snemma. Mótið er sérstakt að því leyti að þar leika saman í liði konur og karlar og er stigakeppni einstaklinga. Dregið er í lið fyrir hvern leik og hver leikmaður skráir á miðann sinn hversu mörg stig hans lið skorar í hverjum leik. Leiknar voru átta hrinur og svo lagði hver leikmaður saman sín stig. Ég er með 2-3 brákuð rifbein og gat því ekki beitt mér sem skyldi en tókst þó að næla mér í þriðja sætið. Þátttakendur voru 47 talsins að þessu sinni og iðaði íþróttahúsið af lífi frá kl. 14-17. Um kvöldið var svo komið saman, borðaður góður matur, afhent verðlaun og svo að sjálfsögðu sungið langt fram á kvöld við undirleik okkar Danna. 

22.01.2012  Þorrinn byrjar með stæl
Það er ekki hægt að segja annað en maður hafi byrjað Þorrann með krafti, búinn að fara á tvö þorrablót og aðeins liðnir tveir dagar af Þorranum. Það segir frá því fyrra hér að neðan og á föstudagskvöldið bauð tengdapabbi mér á Þorrafund hjá Kiwanisklúbb staðarins, sem er í mikilli sókn um þessar mundir, og voru m.a. þrír nýir meðlimir teknir inn á þessum fundi. Þar var boðið upp á glæsilegan þorramat sem rann sérlega ljúflega niður.

20.01.2012  Gómarnir sungu á sjúkrahúsinu
Í gær var fyrsta framkoma okkar Gómanna á þessu ári. Þá sungum við á þorrablóti á Heilbrigðisstofnuninni hér á Sigló, er þetta þriðja árið í röð sem við gerum það. Ég hóf dagskrána með því að flyta tvö frumsamin lög og fór líka með tvö ljóð úr eigin smiðju. Áheyrendur voru afskaplega þakklátir fyrir þessa heimsókn og svo fengum við þennan dýrindis þorramat í sönglaun, ekki amalegt það.

Syng eigið lag á blótinu við texta eftir Siglfirðinginn Lauga póst (Mynd af sksiglo.is)

17.01.2012  Búinn að "fylla á" náttborðið
Ég hef verið ágætlega duglegur að lesa í haust en ekki eins duglegur að setja bækurnar inn hér á vefnum og segja álit mitt á þeim. En nú er ég búinn að bæta úr því. Í liðnum Á náttborðinu hér til hliðar má sjá allar þær bækur sem ég hef lesið undanfarin ár og álit mitt á þeim, þ.e. fyrir utan barnabækurnar sem ég les fyrir Amalíu. Er með nokkrar bækur á náttborðinu til viðbótar sem bíða lesturs.

17.01.2012  Gómarnir af stað aftur
Þá er sönghópurinn Gómar að hefja æfingar aftur eftir jólafrí og mun kom fram í fyrsta sinn á árinu nú í vikunni. Stefnt er að fleiri landvinningum á árinu og enn meiri gleði.

15.01.2012  Ronja afastelpa í Mbl. sjónvarpinu
Næstu vikurnar verða teknar til sýningar stuttmyndir frá Kvikmyndaskóla Íslands á sjónvarpi Mbl.is á netinu. Fyrsta myndin er myndin Klás og er hægt að sjá hana núna á mbl.is. Hún fjallar um jólasvein sem hefur fengið sér aðeins neðan í því og hyggur á að taka eigið líf. En átta ára stúlka kemur vitinu fyrir hann með góðmennsku sinni og sakleysi. Ronja leikur einmitt þessa átta ára stúlku og stendur sig afskaplega vel. Svo vill svo skemmtilega til að það er mynd af Amalíu dóttur minni líka á Mbl.is. í dag þar sem verið er að auglýsa hið frábæra skíðasvæði okkar hér á Siglufirði. Þar má sjá hana ásamt bekkjarsystur sinni í efstu lyftunni, í 720 metra hæð eða svo.

15.01.2012  Góð kona kvödd í gær
Amma hennar Stínu minnar, Fanney Vernharðsdóttir, lést þann 2. janúar og var jarðsungin í gær. Fanney var af þessari dugnaðarkynslóð sem nú er að kveðja. Henni féll aldrei verk úr hendi; sinnti börnum sínum og stórfjölskyldu allri þannig að eftir var tekið, tók inn á heimili sitt lamaða móðursystur sína og annaðist hana í 36 ár auk þess að vinna úti og sinna prjónaskap af miklum móð, það var bakað, tekið slátur, farið í ber, húsið þrifið hátt og lágt í hverri viku, aldrei stoppað. Það var sama hvenær maður kom í heimsókn til hennar alltaf voru tertur og aðrar veitingar á borðum og mjólkurglasið var hellt barmafullt. Það er söknuður í hjörtum ættmenna en hún var hvíldinni fegin eftir langan vinnudag og erfiða sjúkrahúslegu síðasta árið.

13.01.2012  Fyrsta frjálsíþróttamót ársins framundan
Fyrsta frjálsíþróttamótið sem ég fer með iðkendur mína á er Stórmót ÍR, sem verður haldið í Reykjavík 28.-29. janúar. Við höfum mætt á þetta mót á hverju ári síðan 2007 og alltaf náð fínum árangri. Oftar en ekki komum við heim með verðlaun og erum í baráttu um toppsætin þó keppendur í hverri grein séu allt að 50 talsins í hverjum árgangi. Mótið er stærsta innanhúsmót í frjálsum ár hvert en keppendur í fyrra voru rúmlega 800 talsins. Það verður gaman að sjá hvernig gengur í ár.

11.01.2012  Grasekkill pakkar niður jólunum
Það er nóg að gera á stóru og líflegu heimili, sérstaklega þegar frúin bregður sér suður í námið sitt í Háskólanum eins og þessa vikuna. Við Amalía kláruðum að pakka niður jólunum í gær. Búið að fylla 7 kassa af jóladóti og ég held að ekkert hafi gleymst. Svo þarf að passa að allir mæti á réttan tíma á æfingar og koma liðinu fram úr á morgnana og í skólann, aðstoða börnin við að bera út bæjarblaðið, sjá til þess að allir læri heima og aðstoða við það, fæða og klæða, skúra, skrúbba og bóna, muna eftir afmælisboðum, vaska upp, mata þvottavélina og eitt og annað sem tínist til. Síðast en ekki síst er það svo að lesa fyrir mannskapinn fyrir svefninn. Það er alveg föst regla á þessu heimili að eiga góða lestrarstund áður en boðið er góða nótt. A.m.k. með þeirri yngstu og stundum slást fleiri í hlustendahópinn. Sem sagt nóg að gera á þessum vettvangi í augnablikinu og rólegra á öðrum sviðum.    

08.01.2012  Tónlistarannáll 2011 kominn inn
Þá er tónlistarannáll síðasta árs tilbúinn og er hann undir liðnum Tónlistin hér til hliðar og þar er farið í Tónlistarannálar 2006 - . Helstu tölur eru þær að ég kom fram 52 sinnum á síðasta ári til að flytja tónlist og söng og spilaði fyrir um 5400 manns. 20 sinnum kom ég fram til að flytja frumsamið efni og flutti þar 21 lag. Gómarnir voru yfir og allt um kring og komu 20 sinnum fram á síðasta ári en þar sem ég skrapp erlendis síðasta sumar missti ég af tvennum framkomum með þeim. Annars var árið fjölbreytt og skemmtilegt á tónlistarsviðinu og meðan maður hefur svona gaman af þessu heldur maður áfram.

07.01.2012  Blakmót á Dalvík
Í gær brugðum við siglfirskir blakarar okkur til Dalvíkur og tókum þar þátt í blakmóti. Tvö kvennalið og eitt karlalið mætti til leiks frá Siglufirði. Okkur körlunum gekk nú ekki sem best og lékum um botnsætið, unnum við aðeins þrjár hrinur af átta. Við erum líka að æfa upp nýtt kerfi og því var nokkuð óöryggi í leik okkar, en þegar við höfum náð tökum á því ættum við að verða sterkari en áður. 

06.01.2012  Viðtal í Heima er bezt
Hið fornfræga tímarit Heima er bezt lifir enn góðu lífi og er gefið út í hverjum mánuði. Í sumar kom einn af blaðamönnum tímaritsins til Siglufjarðar, í góðum hópi fólks, sérstaklega til að líta inn á Ljóðasetrið og spurði þá hvort ég væri til í viðtal fyrir tímaritið. Að sjálfsögðu játti ég því og nú milli jóla og nýárs birtist það í 12. tbl. síðasta árs. Viðtalið er hvorki meira né minna en 6 blaðsíður og fjöldi mynda prýðir það. Í því er fjallað um ýmislegt en setrið og starfsemin þar er þó í forgrunni. Einnig ber tónlistina á góma, fjölskylduna, uppvöxtinn fyrir vestan, lífið á Sigló, íþróttirnar o.fl. Viðtalið verður örugglega mjög góð auglýsing fyrir setrið   

06.01.2012  Skíðadrottningarnar í stuði
Skíðaíþróttin hefur verið stunduð grimmt af heimilisfólkinu hér á Hafnargötunni undanfarnar vikur. Dæturnar, Amalía og Elín Helga, eru báðar byrjaðar aftur að æfa skíði og Patrekur og Stína hafa verið mjög dugleg að sækja fjallið. Ég er búinn að skella mér tvisvar sinnum á skíði og svo voru Hrefna dóttir mín og Orri, kærasti hennar, í nokkurra daga heimsókn hér og þau skelltu sér að sjálfsögðu í Skarðið og voru mjög hrifin af aðstæðum og skemmtu sér vel á brettum og skíðum. Færið hefur verið frábært síðustu vikur og nægur snjór.

04.01.2012  Skólastarf hafið að nýju
Þá er skólinn byrjaður aftur eftir jólafríið og lífið gengur sinn vanalega gang. Það gekk furðanlega vel, hjá öllum fjölskyldumeðlimum, að vakna í morgun eftir vökur fram á nætur að undanförnu.  

01.01.2012  Gleðilegt ár gott fólk 
Já, gleðilegt ár og takk fyrir það gamla. Sjáumst hress og kát og brosum framan í heiminn þó ýmislegt gangi á. Lífið er fullt af ævintýrum ef við viljum og nennum.

01.01.2112  Fínasta stemning á Rauðku
Það var bara ágætasta stemning á Rauðku síðasta föstudag þar sem ég sá um spileríið. Ég byrjaði að spila kl. 22.00 og var nú frekar rólegt framan af en svo fjölgaði smám saman og úr varð fínasta stemning og fólk skemmti sér vel. Ég lék tæplega 70 lög m.a. nokkur frumsamin sem ég lét fljóta með vel þekktum slögurum.

31.12.2011  Stórkostlegir styrktartónleikar
Í fyrrakvöld fóru fram hér á Siglufirði hreint út sagt stórkostlegir tónleikar. Þetta voru tónleikar sem haldnir voru til styrktar fjölskyldum Elvu Ýrar og Sölku, sem eiga um sárt að binda eftir hið skelfilega umferðarslys sem varð hér í nóvember. Fjölmargir tónlistarmenn af Norðurlandi komu fram og áhorfendur létu sig ekki vanta því það var þéttsetinn bekkurinn í kirkjunni okkar, um 400 manns. Tónleikarnir stóðu í tvo tíma og tók hvert atriðið við af öðru. Þau voru hvert öðru betra og skemmtilega fjölbreytt þannig að tíminn flaug áfram. Ég kom bæði fram einn og svo með Gómunum. Ég flutti tvö ljóð eftir mig sem mér fannst hæfa tilefninu og söng svo lagið Eitt andartak sem var á plötunni minni Stolnar stundir. Við Gómarnir fluttum þrjú lög og tókst vel upp þó við hefðum verið einir karlanir að þessu sinni. Skipuleggjendur eiga mikinn heiður skilinn fyrir frábært framtak sem og allir þeir sem gerðu þessa tónleika að veruleika.

Gómarnir að flytja Hole in the World eftir Eagles

31.12.2011  Patrekur kjörinn besti frjálsíþróttadrengurinn
Við val á íþróttamanni ársins í Fjallabyggð og vali á íþróttamanni hverrar greinar var Patrekur minn valinn besti frjálsíþróttadrengurinn í flokki 13-18 ára og er þetta annað árið í röð sem hann hlýtur þennan titil. Hann er vel að honum kominn, stóð sig vel á árinu, keppti á 11 mótum og var oftar en ekki í verðlaunasætum. Hann náði góðum árangri í mörgum greinum og á m.a. næstbesta árangurinn í þremur greinum hjá 14 ára strákum á landinu í ár. Ég var beðinn um að vera með tónlistaratriði við þessa athöfn, líkt og undanfarin ár, og flutti ég eitt frumsamið lag auk þess að flytja tvö íþróttatengd ljóð úr Æskumyndunum mínum.

 
Verðlaunahafar: Patrekur, Jóel, sem tók við verðlaunum fyrir Sölku systir sína og Sigurjón

27.12.2011  12 met á tvennum frjálsíþróttamótum
Ég hélt frjálsíþróttamót fyrir iðkendur mína í frjálsum í nóvember og svo var okkar árlega Jólamót í desember. Rúmlega 20 krakkar tóku þátt í þessum mótum og stóðu þau sig mjög vel. Margir bættu afrek sín og komust inn á afrekaskrár félagsins og Frjálsíþróttasambandsins og alls féllu 12 siglfirsk aldursflokkamet auk þess sem tvö voru jöfnuð. Patrekur var þar að verki í fjórum tilfellum og Elín Helga í tveimur, en hún er á yngra ári í flokki 11-12 ára.

24.12.2011  Gleðileg jól kæru lesendur og vinir 
Við fjölskyldan sendum ykkur bestu jólakveðjur með von um gleðileg jól og farsæld á komandi ári. Þökkum samskiptin á árinu og hlökkum til að sjá ykkur hress og kát á nýju ári.

22.12.2011  Jólafrí og afmæli
Þá erum við kennarar í Fjallabyggð komnir í jólafrí, en síðasti kennsludagur var 20. des og við mætum aftur til starfa 3. janúar. Ég er einnig með jólafrí í frjálsíþróttunum því það hefur sýnt sig gegnum árin að mæting á æfingar í jóla- og páskafríum er afar dræm. Í gær hélt maður svo upp á enn einn afmælisdaginn, var það allt í rólegheitum og yfirvegun. Sett á tvær, þrjár tertur og vinir og tengdó litu inn í kaffi. 

17.12.2011  Rólegt á Rauðku
Það var frekar rólegt á Kaffi Rauðku í gærkvöldi, en ég var að spila þar eftir að við Stína höfðum gætt okkur á kræsingum af Suður-Amerísku jólahlaðborði á Hannes Boy, ásamt vinafólki okkar. Það var mjög afslöppuð stemning í spilerínu, fólk að hlusta og spjalla saman. Ég lék nokkur jólalög í bland við vel þekkta slagara og læddi inn einu og einu frumsömdu lagi. 

16.12.2011  Nóg að gera í tónlistinni á næstunni
Það verður í mörg horn að líta í tónlistarlífinu hjá mér það sem eftir lifir árs og er það nú aldeilis skemmtilegt. Ég mun troða upp með gítarinn tvisvar sinnum á Kaffi Rauðku, í kvöld og svo aftur þann 30. des, við Gómarnir munum a.m.k. koma einu sinni enn fram á árinu, ég verð með eitthvað opið á Ljóðasetrinu næstu tvær vikur og líklega mun gítarinn eitthvað fara á loft þar og eitthvað fleira er í deiglunni.

16.12.2011  Glæsilegt lista- og menningarlíf
Það er óhætt að segja að lista- og menningarlíf sé með miklum blóma á Siglufirði um þessar mundir og verður blómlegra með hverju árinu. Á miðvikudaginn var hin árlega Listganga Ferðafélags Siglufjarðar haldin og að þessu sinni var komið við á 8 stöðum. Litið var inn í vinnstofur handverks- og listamanna og skoðað hvað þeir eru að fást við þessa dagana og þó nokkrir notuðu tækifærið til að versla jólagjafir. Einnig var litið inn á Ljóðasetrið til mín þar sem ég sagði frá starfseminni og las ég fyrir fólk nýju jólasveinavísurnar mínar sem og úr nýja gamansagnaheftinu við góðar undirtektir. Göngunni lauk á Kaffi Rauðku þar sem göngugestir þáðu kakó og piparkökur, skoðuðu glæsilega myndlistarsýningu og svo sungum við Gómarnir í rúman klukkutíma jólalög og annað efni í bland. Það má svo bæta því við að lista- og menningarlífi staðarins er heldur betur að bætast liðsauki því Aðalheiður Eysteinsdóttir opnar vinnustofu sína í Alþýðuhúsinu næsta vor. En þar ætlar hún að standa fyrir fjölþættri menningar- og listastarfsemi. Er það gríðarlegur fengur fyrir okkur að fá hana á staðinn og mun hún, og öll hennar skemmtilegu verk, sannarlega auðga hjá okkur menningarlífið.

Það var fjölmenni í Ljóðasetrinu í listgöngunni

Gómarnir skemmta göngufólki í Kaffi Rauðku (myndir af sksigló)

11.12.2011  Þessi þrá til Færeyja!
Eins og sumir hafa heyrt eða lesið munu björgunarsveitirnar á Íslandi styrkja björgunarsveitirnar í Færeyjum vegna þeirra hamfara sem gengu yfir Færeyjar í veðurhamnum þar um daginn. Þessi styrkur er í því fólginn að hérlendar björgunarsveitir gefa sveitunum í Færeyjum 1000 eintök af geislaplötunni Neyðarlögin 2011 sem verða svo seldar í Færeyjum til fjáröflunar fyrir sveitirnar þar. Þar með mun textinn minn og lagið hans Bjarna Þórs, Þessi þrá, hljóma víða hjá frændum okkar í Færeyjum ef að líkum lætur. Gaman að þessu og vonandi mun framlagið reynast vinum okkar vel.  

11.12.2011  Gómarnir syngja enn á Króknum
Í gærkvöldi komum við í Gómunum í þriðja sinn fram á jólahlaðborði á Sauðárkróki og eins og í hin tvö skiptin var hörku stemning. Við sungum rúmlega 20 lög og fengum alla til að syngja og dansa með okkur. Mikið fjör og Skagfirðingarnir afskaplega ánægðir með okkur.  Líklega munum við koma fram tvsivar í næstu viku hér á Sigló. Nánar af því síðar.

09.12.2011  Lesið úr nýjustu verkunum
Að undanförnu hef ég og fleiri lesið úr nýjustu verkum mínum á ritvellinum. Á þriðjudagskvöldið las ég úr nýjasta heftinu af 50 Gamansögum á fjölmennu prjónakvöldi á Bókasafni Fjallabyggðar á Siglufirði og í morgun var ég m.a. að lesa nýju jólasveinavísurnar mínar fyrir krakkana í 1. og 2. bekk sem komu í heimsókn á Ljóðasetrið. Þessar vísur fer Logi bróðir reglulega með þessa dagana í jólaleikritinu sem hann er að sýna fyrir vestan. Á sunnudaginn síðasta var lesið úr nýjum bókum og væntanlegum hjá foreldrum mínum á veitingastaðnum  Vegamótum á Bíldudal og þar var m.a. lesið úr handriti sem ég er með í smíðum og ber vinnuheitið Fortíðin kveður dyra. Hvað úr þessu handriti verður á svo eftir að koma í ljós.

 
Lesið úr nýja heftinu af 50 Gamansögum á Bókasafninu á Sigló

05.12.2011  Stuð og stemning á Króknum
Það var heldur betur líf og fjör hjá okkur Gómunum á Króknum um helgina. Við sungum á jólahlaðborði bæði á föstudags- og laugardagskvöld og náðum upp þessari svaka stemningu. Það var smá beygur í okkur að syngja fyrir Skagfirðingana, enda kalla þeir ekki allt ömmu sína þegar kemur að vönduðum söng, en söngur okkar og lagaval féll heldur betur í kramið og fólk skemmti sér greinilega mjög vel. Við sungum nokkur jólalög og síðan lög héðan og þaðan og var fólk staðið upp til að dansa og syngja með áður en yfir lauk. Ætlunin var að flytja dagskrá með 12 lögum en við vorum klöppuð nokkrum sinnum upp og fengum ekki að hætta fyrr en við höfðum sungið um 20 lög. Maturinn var afbragðs góður hjá Óla yfirkokki og Gestur Einar sá um veislustjórn.

02.12.2011  Líflegur laugardagur framundan
Það verður í nógu að snúast á morgun, laugardag. Dagskráin hefst uppi í skóla í fyrramálið þar sem við ætlum nokkrir félagar að undirbúa jóladöndur fyrir 1. og 2. bekk. Klukkan eitt til tvö mun ég árita gamansögurnar mínar á bókamarkaði Tunnunnar og klukkan tvö hefst svo markaður hjá Rauðku þar sem ég verð með afurðir mínar til sölu. Um miðjan dag verður kveikt á jólatrénu og mun maður líta á það húllumhæ með börnunum. Markaðnum lýkur ekki fyrr en klukkan sex og þá verður brunað upp á Sauðárkrók að syngja með Gómunum á jólahlaðborði. Líf og fjör!

02.12.2011  Sungið á Króknum í kvöld
Í kvöld og annað kvöld munum við í Gómunum syngja á jólahlaðborði á Sauðárkróki. Herlegheitin verða í Frímúrarahúsinu og er mikil aðsókn. Gestur Einar, leikari og útvarpsmaður, er veislustjóri, við sjáum um sönginn og Óli kokkur töfrar fram veislumat eins og honum er lagið. Nokkur jólalög eru í farteskinu ásamt gömlum og góðum íslenskum sem erlendum lögum. 

30.11.2011  Platan komin í dreifingu
Þá er plata þar sem ég á einn texta komin í dreifingu. Platan heitir Neyðarlögin 2011 og er seld um allt land til styktar björgunarsveitunum í landinu. Ýmsir þekktir tónlistarmenn flytja lög á þessari plötu t.d. Raggi Bjarna, Ingó veðurguð, Bjartmar og Bergrisarnir, Ómar Ragnarsson, The Charlies o.fl. o.fl. Á plötunni eru alls 16 lög og málefnið er gott. Þór Breiðfjörð syngur lagið hans Bjarna Þórs sem ég samdi textann við og heitir það Þessi þrá.

27.11.2011  Jólasveinavísurnar "frumsýndar" í gær
Í gær frumsýndi Logi bróðir nýjasta einleikinn sinn fyrir vestan. Þetta er jólaleikrit sem heitir Bjálfansbarnið og bræður og hans og fjallar um nokkra gamla vestfirska jólasveina sem hafa staðið í skugganum af þessum 13 sem Grýla hefur sent til byggða undanfarna öld eða svo. En hún Grýla á sko mikið fleiri gemlinga og í þessu leikriti er varpað ljósi á nokkra þeirra sem getið er í vestfirskum þjóðsögum. Þar koma þó aðeins fram nöfn þeirra  en engin sérkenni, þó nöfnin gefi manni einhverjar hugmyndir. Þarna má t.d. finna Lækjarræsi, Ref, Langlegg og Froðusleiki svo einhverjir séu nefndir og hjálpaði ég Loga að varpa mynd á þessa kappa með því að semja um þá nokkrar vísur sem notaðar eru í verkinu. Logi túlkar svo þessa fýra með grímum sem sýna sérkenni sveinkanna. Uppselt var á frumsýninguna í gær og sala á næstu sýningar gengur ljómandi vel. 

27.11.2011  Frúin fertug í gær
Frúin komst á þennan góða aldur í gær og ljóst að nú eru henni allir vegir færir, eða svo segir máltækið alla vega. Í ljósi þess sem á undan hefur gengið hér á Siglufirði síðustu daga voru veisluhöld í lágmarki en áhersla lögð á að eiga góðar stundir með fjölskyldu og vinum. 

24.11.2011  Þriðja heftið af 50 Gamansögum frá Siglufirði komið út
Þá er þriðja heftið í ritröðinni 50 Gamansögur frá Siglufirði komið út. Heftið er til sölu í Siglósport og bóksölu Tunnunnar auk þess sem hægt er að versla það hjá höfundi. Ég verð einnig með það til sölu á markaðnum hjá Rauðku þann 3. des ásamt fyrri heftum og öðrum afurðum mínum. Verðið er aðeins 1.000 kr. sem fyrr og ef öll heftin þrjú eru keypt eru þau á 2.500 kr. Fyrir áhugasama utan Siglufjarðar er hægt að panta heftin á netfanginu hafnargata22@hive.is 

24.11.2011  Ekki gekk það í ár
Líkt og í fyrra átti ég texta við lag sem sent var inn í undankeppni Eurovision hér á landi. Höfundur beggja þessara laga er Bjarni Þór, félagi minn og frændi frá Bíldudal, og höfum við marga fjöruna sopið saman í tónlistinni, þá aðallega með gleðisveitinni Græna bílnum hans Garðars. Lagið fékk ekki náð fyrir eyrum dómnefndar frekar en lagið í fyrra en það lag er nú að koma út á safnplötu sem seld verður um allt land til styrktar góðu málefni. Reyndar átti þessi plata að vera komin út en einhverjar tafir hafa orðið í framleiðslunni og er ekki vitað á þessari stundu hver útgáfudagurinn er. Svo er bara að sjá hvort lagið í ár á sér eitthvert framhaldslíf líka.

Við Bjarni fluttum nokkur lög í giftingunni hjá Loga og Billu í Haukdal hér um árið

23.11.2011  Ljóðasetrið fær styrki og góðar gjafir
Ljóðasetrið hefur fengið mikið af góðum gjöfum undanfarið. Þar er aðallega um að ræða bókagjafir og haf nokkrar merkar bækur bæst í safnkostinn á undanförnum vikum. Það eru bæði bæjarbúar og utanaðkomandi sem hafa fært eða sent setrinu þessar bækur. Eins fékk setrið merka teikningu um daginn, um 100 ára gamla af Hallgrími Péturssyni þar sem útgáfuár Passíusálmanna fyrstu aldirnar eru tiltekin. Einnig hefur setrið fengið tvo veglega styrki að undanförnu, 100.000 kr frá Samkaupum og í dag mun ég veita móttöku 150.000 kr styrk frá KEA. Það gæti því farið svo að maður þyrfti ekki að greiða allt of mikið úr eigin vasa á næsta ári til rekstursins en vinnan er að sjálfsögðu öll í sjálboðavinnu.

21.11.2011  Mikil sorg - Mikill samhugur
Það er eins og tíminn hafi staðið kyrr undanfarna daga. Bæjarbúar hafa verið líkt og í móki eftir hið hörmulega slys sem varð hér í síðustu viku og mikil sorg ríkir í bæjarfélaginu okkar. En samhugurinn er mikill og fólk reynir að styðja hvert annað og hugga eins og kostur er. Unga stúlkan sem slasaðist illa í slysinu er systurdóttir hennar Stínu minnar og er hún enn á gjörgæsludeildinni á Akureyri. Hún er þó á ágætum batavegi og heimsóttum við fjölskyldan hana í gær. Þökkum við góðar kveðjur sem okkur hafa borist undanfarna daga og þann stuðning sem okkur hefur verið veittur en hugur okkar er hjá þeim sem hafa um sárast að binda.
  
12.11.2011  Góð viðbrögð við viðtalinu á N4
Í vikunni var sýnt, á sjónvarpsstöðinni N4, viðtalið sem tekið var við mig hér á Sigló í september sl. Það var í þáttaröðinni 2 gestir og spjallaði hún Rósa á Síldarminjasafninu við mig um ýmis af mínum hugðarefnum; íþróttirnar, tónlistina, ljóðlistina o.fl. Auk þess sem við ræddum um uppvaxtarár mín fyrir vestan, lífið á Siglufirði og eitt og annað. Hef ég fengið mjög góð viðbrögð við þessum þætti og greinilegt að margir hafa séð hann.

12.11.2011  Frjálsíþróttamót á Akureyri í gær
Í gær fór ég með nokkra iðkendur til þátttöku í frjálsíþróttamóti sem UFA hélt í Boganum á Akureyri. Rúmlega 100 keppendur tóku þátt í mótinu  og náðist ágætis árangur í ýmsum greinum. Mínum krökkum, þ.e. iðkendunum, gekk ljómandi vel og voru þau 12 sinnum í verðlaunasætum í þeim 23 greinum sem þau tóku þátt í og settu alls 7 siglfirsk aldursflokkamet. Patreki mínum gekk sérstaklega vel; keppti í fjórum greinum, bætti sig í þeim öllum og setti aldursflokkamet í þeim öllum einnig. Elín Helga setti eitt aldursflokkamet, bætti eigið met í skutlukasti í sínum flokki. Flottur árangur hjá krökkunum. 

11.11.2011  Gómarnir heilluðu ferðaþjónustuaðila
Í gærkvöldi sungum við í Gómunum fyrir ferðaþjónustuaðila á Norðurlandi, alls um 130 manns, sem voru í sinni árlegu ferð að kynna sér eitt og annað í ferðaþjónustu á Norðurlandi. Hópurinn endaði ferðina á Siglufirði þar sem litið var inn í Síldarminjasafnið og þar var auk þess boðið upp á síldarsöltun. Að henni lokinni var haldið á Kaffi Rauðku og þar beið dýrindis kvöldverður og söngskemmtun af bestu sort hjá okkur Gómunum, eða svo sögðu áheyrendur a.m.k. Okkur var mikið hrósað og þakkað fyrir skemmtunina og nokkrar fyrirspurnir bárust um að fá okkur til að skemmta í nærliggjandi sveitarfélögum. Það verður gaman að sjá hvað kemur út úr því.

 
Ég brá aðeins á leik og söng Svona er á síld úti í sal við mikinn fögnuð

08.11.2011  Gamansögurnar farnar í prentun
Þá er 3. heftið af 50 Gamansögum frá Siglufirði farið í prentun og verður vonandi komið í sölu í næstu viku. Þarna má finna margar skemmtilegar sögur sem hægt er að hlæja að og upplagt er að lesa upp úr þessum heftum í góðra vina hópi. Svo eru þessar bækur kjörnar í jólapakkana til burtfluttra sem annarra Siglfirðinga.
 
08.11.2011  Íþróttafjölskylda
Eins og hjá svo mörgum fjölskyldum á landinu eru íþróttir stór liður í lífi okkar á Hafnargötunni. Þar spilar náttúrulega inní að húsbóndinn er íþróttakennari og þjálfari og hefur það að sjáfsögðu sitt að segja. Sú yngsta æfir aðeins skíði eins og sakir standa, Elín Helga æfir frjálsar, skíði og badminton og var einmitt að keppa í badminton um síðustu helgi inn á Akureyri, Patrekur æfir einnig frjálsar og svo er hann stökkvandi út um allan bæ í svokölluðu parkour, þar sem menn fara ýmiskonar stökk ofan af veggjum, stökkva yfir hindranir o.fl. Ég æfi aðeins blak um þessar mundir og er að þjálfa frjálsar tvisvar í viku auk íþróttakennslunnar. Líklega förum við um næstu helgi á frjálsíþróttamót inn á Akureyri.

02.11.2011  Uppskera
Það má segja að það sé nokkurs konar uppskeru tími framundan hjá mér næstu vikurnar. Margt af því sem ég hef verið að fást við að undanförnu mun þá líta dagsins ljós:
#  Á rit- og ljóðlistarsviðinu má nefna að ég á texta við dægurlag sem kemur út á safndiski núna næstu daga og verður hann seldur um allt land, ég setti saman nokkuð margar vísur fyrir jólaleikrit sem verður frumsýnt á Ísafirði í lok mánaðarins og einnig verða þær prentaðar í vandaðri leikskrá verksins og svo kemur 3. heftið af 50 Gamansögum frá Siglufirði út núna um miðjan nóv.
#  Það má segja að það verði líka nokkurs konar fjölmiðlafár næstu vikurnar. Í þessari viku kemur út vandað blað um list á Vestfjörðum þar sem ýmsir vestfirskir listamenn eru kynntir til sögunnar og er ég einn þeirra, verður blaðinu dreift í öll hús á Vestfjörðum og víðar, í næstu viku verður á sjónvarpsstöðinni N4 ítarlegt viðtal við mig um lífið og tilveruna og hin ýmsu viðfangsefni mín s.s. íþróttir, tónlist, ljóðlist og fleira og svo á næstu vikum birtist viðtal við mig í tímaritinu Heima er best þar kastljósið beinist fyrst og fremst að ljóðasetrinu en ýmislegt fleira ber á góma.
#  Ber á góma, já þá má ekki gleyma því að við í sönghópnum Gómum erum bókuð á þrjár skemmtanir næstu vikurnar. Í næstu viku á Kaffi Rauðku og svo á tvö jólahlaðborð í Skagafirði í desember.

31.10.2011 Sumarlandið - hugljómun
Ég hef alltaf haft töluverðan áhuga á andlegum málefnum og hefur hann aukist frekar en hitt eftir því sem árunum fjölgar. Ég hef þó ekki sinnt þessum áhuga af neinum sérstökum krafti, hef af og til lesið um þessi mál og farið þrisvar til miðla. Þær heimsóknir voru allar mjög gleðilegar og áhugaverðar. Þessi áhugi hefur komið svona í lotum en svo hafa önnur áhugamál orðið fyrirferðameiri. Ég hef lengi haft þá trú að okkar bíði annað líf eftir að við ljúkum vist okkar hér á móður jörð og það hvernig við ræktum garð okkar hér muni eitthvað hafa að segja á næsta viðkomustað. Á dögunum las ég afar áhugaverða bók. Þetta var bókin Sumarlandið, sem kom út 2010. Í þessari bók má lesa frásagnir að handan sem Guðmundur Kristinsson á Selfossi hefur skráð, en frásagnirnar hafa borist í gegnum transmiðla. Þarna má lesa afar athyglisverðar og samhljóma frásagnir af því sem bíður okkar þegar við hverfum héðan. Þetta er holl lesning öllum sem hafa áhuga á lífinu og tilverunni, hvort sem þeir trúa á framhaldslíf eða ekki. Í bókinni eru m.a. frásagnir ýmissa presta og kom þeim töluvert á óvart það líf sem beið þeirra hinumegin. 

Það sem mér þótti einna athyglisverðast var það að við verðum áfram þjóð á nýja staðnum - í Sumarlandinu og allt okkar fólk og vinir verða í kringum okkur. Listir ýmiskonar, söngur og tónlist eru helsta dægradvöl fólks og starf allra er að hjálpa öðrum á einn og annan hátt. Það er margt hægt að læra af þessum frásögnum en þó fyrst og fremst það að leggja áherslu á að rækta andann. Hætta þessum blessaða dansi kringum gullkálfinn. Líkamann og glingrið skiljum við eftir hér á jörðinni en andann tökum við á næsta stig. Ég skora á ykkur að lesa þessa bók. Hún hreyfir örugglega við ykkur og getur jafnvel breytt viðhorfi ykkar til þess hvað skiptir máli í þessu lífi. Því það skiptir máli í því næsta hvernig við verjum þessu.  

25.10.2011  Lokahönd á 3. bindi af 50 Gamansögum
Þessa dagana er ég að leggja lokahönd á ritun 3. bindis af 50 Gamansögum frá Siglufirði. Stefni ég að útgáfu þess um miðjan nóvember. Sem fyrr eru þarna sögur úr ýmsum áttum, bæði gamlar og nýjar en allar stórskemmtilegar. Fyrri bindin nutu töluverðra vinsælda og hafa selt ágætlega og vona ég að Siglfirðingar haldi áfram að safna þessum heftum. Meðan svo er held ég áfram að safna að mér sögum og skrá þær.

23.10.2011  Letihelgi
Þessi helgi hefur verið afskaplega róleg. Frúin var að koma heim á föstudaginn eftir viku dvöl í háskólanum, þar sem hún var að sinna þroskaþjálfanámi sínu, og var ljúft að fá hana aftur heim. Göngutúrar, lestur góðra bóka, sjónvarpsgláp og samverustundir með fjölskyldunni hafa verið efst á baugi en rólegt á öðrum sviðum. Nema þá helst í kollinum á manni, þar er allt á fleygiferð eins og stundum áður og ýmsar hugmyndir í gangi. Spurning hvort eitthvað af því kemst í framkvæmd. Þar eru það eins og ávallt tveir þættir sem spila höfuðrulluna: tími og peningar. Sjáum hvað setur.

21.10.2011  Frjálsíþróttaæfingar komnar á fullt
Þá eru inniæfingar í frjálsum komnar á fullt, einn veturinn enn. Stór hópur efnilegra krakka er að æfa hjá mér, um 20 krakkar mæta reglulega á æfingar, sem eru tvisvar sinnum í viku. Að vanda er mikið líf og fjör og í mörg horn að líta því þarna eru krakkar frá 9-15 ára, byrjendur sem lengra komnir. Fyrsta mótið í vetur verður um miðjan nóvember en þá höldum við mót hér heima fyrir þessa krakka.

17.10.2011  Flutti erindi um hagyrðinginn sr. Bjarna
Einn af dagskrárliðunum á afmælishátíðinni vegna 150 ára afmælis sr. Bjarna Þorsteinssonar, sem haldin var hér á Siglufirði uim helgina, var málþing í Siglufjarðarkirkju. Málþingið var á laugardeginum og samanstóð af stuttum erindum og söng þar sem lög og textar sr. Bjarna hljómuðu. Ég flutti erindi um hagyrðinginn sr. Bjarna, fyrir hönd Ljóðasetursins, en hann var mikið latínuskáld og orti einnig nokkuð á íslenska tungu. Sá texti hans sem okkur er tamastur á tungu er líklega textinn við hinn vinsæla rútubílasöng: Það liggur svo makalaust ljómandi á mér .. Já, þessi afburðamaður kemur sífellt á óvart. Hann var prestur Siglfirðinga í 47 ár, bjargaði fleiri hundruðum íslenskra þjóðlaga frá glötun og gaf út bók með þúsund þjóðlögum, var eitt af vinsælustu tónskáldum landsins fyrri hluta síðustu aldar auk þess að kynna erlend sönglög fyrir þjóðinni með því að skrifa þau upp og gefa út, samdi nýja hátíðasöngva fyrir íslensku kirkjuna sem enn hljóma á stórhátíðum, sat í bæjarstjórnum á Siglufirði, skipulagði miðbæinn og vann að ýmsum framfaramálum fyrir bæinn sinn, svo eitthvað sé talið.

15.10.2011  Blakmót á Dalvík
Í morgun skelltum við blakarar okkur til Dalvíkur á blakmót. Við karlarnir fórum með eitt lið en konurnar með tvö. Þetta var fyrsta mót vetrarins og smá haustbragur á spilamennskunni en samt var gengi okkar alveg þokkalegt. Ég náði að leika þrjá leiki af fjórum svo þurfti ég a drífa mig heim vegna afmælishátíðarinnar sem haldin var vegna 150 ára afmælis sr. Bjarna Þorsteinsson.

15.10.2011  Gómagrill
Í gærkvöldi áttum við góða stund saman söngvararnir í Gómum og hljóðfæraleikarar ásamt mökum. Við komum saman hjá Bigga (efri góm), grilluðum, spjölluðum og sungum og var verulega glatt á hjalla. Mikið hlegið og mikið sungið og maturinn alveg afbragð hjá listakokkunum Bigga og Friðfinni (neðri góm).  

15.10.2011  Sungið fyrir Landann
Á dögunum var tekið upp innslag fyrir þáttinn Landann, sem sýndur er á RÚV, hér á Siglufirði í tilefni af því að 150 ár eru frá fæðingu sr. Bjarna Þorsteinssonar þjóðlagasafnara og tónskálds. Vegna þessa var smalað saman hóp af fólki niður á Kaffi Rauðku til að syngja texta Bjarna Það liggur svo makalaust ljómandi á mér ... en þetta lag og texti er líklega einn vinsælasti rútubíla og veislusöngur sem settur hefur verið saman á landinu. Bjarni á sem sagt textann en ekki er vitað um lagahöfundinn. Þátturinn verður sýndur annað kvöld og þar munu koma fram óvæntar upplýsingar. Svo það er um að gera að fylgjast með. 

11.10.2011  Bíósýningar á ný á Siglufirði
Þá eru bíósýningar hafnar á ný á Siglufirði eftir rúmlega áratugs hlé. Það er Rauðka ehf sem stendur fyrir þessu framtaki og er það vel. Fyrsta myndin sem sýnd var var íslenska myndin Eldfjall og var hún sýnd þrisvar sinnum um síðustu helgi. Aðalhlutverkið leikur Theódór Júlíusson og fer hann á kostum í myndinni. Ég skellti mér á sýningu á sunnudagskvöldið og skemmti mér vel, þó svo að myndin sé svo sem ekkert léttmeti, en hún er mjög áhugaverð, vel leikin og gerð. Hún verður framlag Íslands til Óskarsverðlaunanna í ár og hefur hlotið verðlaun á einhverjum hátíðum að undanförnu. Svo er bara spurning hvaða mynd verður sýnd næst.

10.10.2011  Veturinn er mættur
Það er bara allt orðið hvítt hérna á Sigló, og rúmlega það. Jafnfallinn snjór mælist orðið 5-10sm og börnin mætt út með snjóþoturnar sínar. Þeir sem eldri eru eru ekki eins ánægðir með þessa ofankomu en hugga sig við að hitinn á að fara í rúmar 10 gráður seinni part vikunnar.

09.10.2011  Sungið fyrir káta Kiwanismenn
Í gær hélt Kiwanisklúbburinn Skjöldur upp á 40 ára afmæli sitt með mikilli veislu á Siglufirði. Um 120 manns frá Siglufirði og nágrenni fögnuðu með afmælisbarninu. Við í sönghópnum Gómum voru beðin að skemmta gestum með söng í veislunni sem fór fram í Kaffi Rauðku í gærkvöldi. Þar var glatt á hjalla og fengum við frábærar móttökur, vorum klöppuð tvisvar sinnum upp og mikið stuð á fólki.

Gómarnir á sviði í Rauðku 

08.10.2011  Fyrsti leikþátturinn minn
Á ljóðahátíðinni á dögunum var frumsýndur leikþáttur um ævi og kveðskap Lauga pósts, sem var Siglfirðingum að góðu kunnur. Þennan leikþátt setti ég saman og vann hann upp úr viðtölum sem tekin voru við Lauga og birtust m.a. í Vísi og Þjóðviljanum á sínum tíma. Einnig var söngur áberandi í verkinu, en Fjallahnjúkarnir kváðu nokkur íslensk þjóðlög við vísur Lauga og ég setti saman tvö lög við ljóð hans sem Stúlli hjálpaði mér að flytja. Danni Pétur lék Lauga og ég lék blaðamann sem var að spjalla við hann. Leikþátturinn er tæpur hálftími í flutningi og fékk hann fínustu viðtökur gesta á hátíðinni. Til stendur að sýna hann aftur fljótlega.

04.10.2011  Byrjað að blaka
Þá er vetrarstarfið hafið hjá blakklúbbunum á Siglufirði, við karlarnir byrjuðum í gær en konurnar fyrir tveimur vikum eða svo. Það er mikið líf í blakinu hér um þessar mundir, iðkendum hefur fjölgað mikið síðustu ár, sérstaklega konunum og nokkur endurnýjun er líka að vera hjá körlunum. Í vetur eru um 40 konur að æfa blak hér og 24 karlar hafa skráð sig til leiks svo það má búast við miklu fjöri í vetur. Svo má ekki gleyma því að við erum með risavaxið og spennandi verkefni í vor því við munum halda Öldungamótið hér fyrir norðan í samvinnu við blakara á Dalvík. Búast má við um þúsund eldhressum blökurum hingað og er það skemmtilegur hópur að taka á móti.

01.10.2011  Veislustjórn og söngur
Haustþing kennara og skólastjórnenda á Norðurlandi vestra fór fram hér á Siglufirði í gær. Þar var margt um manninn og boðið upp á áhugaverða fyrirlestra og málstofur. Að loknum aðalfundum var komið saman í Bátahúsinu og síðan var haldið í Kaffi Rauðku þar sem þinggesta beið dýrindis kvöldverður og svo skemmtun þar sem hver skóli kom með skemmtiatriði. Eins og stundum fyrr var ég beðinn um að stjórna veislunni og lék einnig nokkur lög undir fjöldasöng. Atriðin frá skólunum voru frábær og mikið var hlegið. Við í kvæðamannafélaginu Fjallahnjúkum stigum á stokk og fluttum tvö lög og kennarahópur Fjallabyggðar söng texta sem ég setti saman. Allir skemmtu sér vel og í lokin var stiginn dans. Flottur dagur hjá flottum hópi kennara.

26.09.2011  Gómarnir að fara í gang
Þá er sönghópurinn Gómar að fara að hefja æfingar á ný eftir um tveggja mánaða hlé. Hituðum okkur upp í Ljóðasetrinu um daginn, þegar við sungum á Kósíkvöldinu, og nú er búið að óska eftir okkur með söngdagskrá við tvö tilefni næstu vikurnar svo það þarf að fara að liðka raddböndin og æfa upp ný lög.

Gómarnir, ásamt Helenu Eyjólfsdóttur, á góðri stund