21.03.2010  Glaumur og gleði á Gógleði
Það var líf og fjör hjá okkur starfsfólki í Grunnskóla Siglufjarðar þegar við gerðum okkur glaðan dag og héldum okkar árlegu Góugleði.  Sem fyrr var mjög rífleg skemmtidagskrá sem tók um þrjár klukkustundir í flutningi, snæddur var dýrindis matur og svo stiginn dans.  Ég lék undir fjöldasöng sem og í nokkrum skemmtiatriðum að vanda.

21.03.2010  Dæturnar spiluðu á tónfundi
Dæturnar á heimilinu, þær Amalía og Elín Helga, eru báðar í píanónámi og komu fram á tónfundi í Tónlistarskólanum á föstudaginn.  Það gekk ljómandi vel hjá þeim að spila og þær ætla að vera duglegar að æfa sig áfram.

4 frænkur - Anna Brynja, Margrét Brynja, Amalía og Elín Helga

21.03.2010  Rúmlega 30 bætingar á Góumóti á Króknum
Síðasta fimmtudag fór ég með 16 af iðkendum mínum í frjálsum upp á Sauðárkrók þar sem við tókum þátt í Góumóti UMSS.  Krakkarnir stóðu sig mjög vel og alls litu rúmar 30 bætingar dagsins ljós í þeim 5 greinum sem þau kepptu í og settu þau 3 aldursflokkamet hjá félaginu þeirra Umf. Glóa.  Um páskana höldum við svo mót hér heima þar sem tækifæri gefst til að bæta sig enn frekar.
 
17.03.2010  Gómarnir æfa grimmt
Sönghópurinn Gómar æfir stíft þessa dagana enda verðum við með stórskemmtun hér á Siglufirði um páskana þar sem vandaður söngur og grín mun verða allsráðandi.  Lög frá hinni sígrænu hljómsveit Herman Hermit´s munu verða áberandi sem og lög frá Eagles og svo að sjálfsögðu íslensk dægurlög frá ýmsum tímum.  Get ég lofað vandaðri og stórskemmtilegri dagskrá.

17.03.2010  Lokahönd lögð á 2. bindi af 50 Gamansögum
Þessa dagana er ég að leggja lokahönd á 2. hefti af 50 Gamansögum frá Siglufirði, en það fyrsta kom út í fyrra.  Ætla ég að reyna að koma því út fyrir páska.  Ég hef fengið töluvert af sögum frá góðu fólki og svo átti ég eitthvað á lager frá því ég var að vinna að fyrsta heftinu.  Þarna verða margar góðar sögur, gamlar og nýjar af skemmtilegu fólki.
 
17.03.2010  Á ferð og flugi
Um síðustu helgi fór ég með fjóra krakka til Reykjavíkur að taka þátt í Íslandsmóti 11-14 ára í frjálsum.  Þau kepptu samtals í 12 greinum og gekk alveg ágætlega, náðu best 4. sæti, tvisvar í 7. sæti, 11. sæti og svo eitthvað niður eftir töflunni.  Í gær þurfti ég að bregða mér til Akureyrar að hitta lækni og á morgun fer ég með 15 manna hóp að keppa í frjálsum upp á Sauðárkrók.

12.03.2010  Íþróttabörn
Íþróttalífið á Siglufirði er sérlega blómlegt og mikið um að vera hjá siglfirsku íþróttafólki á öllum aldri.  Börnin mín eru virkir þátttakendur í því og um helgina verða tvö þeirra að heiman að keppa.  Patrekur er að fara suður með mér að keppa á Íslandsmóti 11-14 ára í frjálsum og Elín Helga er að fara inn á Akureyri að keppa í fótbolta.  Líf og fjör.

11.03.2010  Nóg að gera að vanda
Það hefur verið í nógu að snúast eftir að við komum að utan.  Það er búið að afgreiða nokkra fundi og nokkrar íþrótta- og söngæfingar á þessum fjóru dögum sem liðnir eru og svo er stefnan sett suður enn á ný, nú með frjálsíþróttakrakka á Íslandsmót 11-14 ára og verður lagt í ´ann á morgun.  Í kennslunni er allt á fullu enda styttist þessi blessaði vetur svo hratt í annan endann að maður hefur ekki undan að telja og páskafrí handan við hornið.

Sönghópurinn Gómar æfir stíft fyrir páskana

09.03.2010  Líf og fjör í landi Betu
Það var líf og fjör hjá okkur starfsfólki grunnskólans á Siglufirði í Englandi á dögunum.  Við flugum út á miðvikudegi í síðustu viku, lentum í London og keyrðum upp til Birmingham.  Við gistum í miðborginni sem er mjög lífleg, nóg af verslunum og slíku sem sumir hafa gaman af að skoða.  Á fimmtudegi og föstudegi skoðuðum við The Education Show, sem er risastór árleg námsgagnasýning og þar var sko af nógu að taka.  Töluvert af nýungum bar fyrir augu og ýmsar hugmyndir kviknuðu, eitthvað var verslað af námsgögnum sem nýtast okkur í kennslunni og auka fjölbreytni og gæði hennar.  Við vorum þarna í hópi 100 kennara frá Íslandi, en árlega sækir einhver hópur þessa sýningu ofan af Fróni.  Á kvöldin var svo snæddur góður matur og spjallað um heima og geima.  Á laugardagsmorgni keyrðum við svo aftur til London og áttum laugardaginn þar.  Það var rölt um Oxford Street og mannlífið skoðað og eitthvað verslað.  Síðan var flogið heim á sunnudegi og keyrt til Sigló þar sem við lentum um 23.00 og voru allir frekar slæptir eftir ferðalagið, en með góðar minningar og góð ráð í farteskinu.

 
02.03.2010  Á leiðinni til Birmingham
Næstu daga er vetrarfrí í skólanum hjá okkur á Siglufirði og stór hluti starfsfólksins ætlar að nota tækifærið og skella sér á risastóra námsgagnasýningu í Birmingham.  Við keyrum suður að lokinni kennslu í dag og fljúgum út í fyrramálið.  Sýningin er fimmtudag og föstudag og á laugardag keyrum við svo til baka til London og gistum þar síðustu nóttina.  Þetta verður örugglega mjög fróðlegt og skemmtilegt í góðra vina hópi.

01.03.2010  Magnaður fjöldasöngur
Að lokinni keppni á Siglómótinu í blaki var haldið í Bátahús Síldarminjasafnsins samkvæmt venju þar sem fram fór verðlaunaafhending og söngur og gleði fylgdi með í ómældu magni.  Eins og venjulega var fólk dolfallið yfir þessu glæsilega safni og þeirri umgjörð sem það veitir þessum þætti mótsins.  Við Danni vorum með gítarana á lofti og lékum hin og þessi lög og var hressilega tekið undir.  En það var nú bara byrjunin því síðan var haldið á Allann í hátíðarkvöldverð og þar var að sjálfsögðu meiri söngur og ég hef sjaldan eða bara aldrei leikið fyrir jafn fjörugum, kraftmiklum og glæsilegum fjöldasöng eins og þar braust út.  Þetta var bara geggjað!  Síðan mætti á sviðið sönghópurinn góði, Gómar frá Gvendeyri, og fluttum við nokkur lög við afar góðar viðtökur og uppklapp.  Þá var loks komið að því að dansa en orkan var nú reyndar ekki mjög mikil í það hjá öllum eftir frábæran dag.

Sungið og spilað í Bátahúsinu

01.03.2010  Flott blakmót
Siglómótið 2010 í blaki, sem var haldið síðasta laugardag, tókst ljómandi vel hjá okkur þrátt fyrir að fjöldi liða hafi aldrei verið meiri.  Alls tóku 23 lið þátt í mótinu og var spilað stanslaust frá kl. 7.30 - 18.30.  Það voru margir sem lögðu hönd á plóginn og þannig tókst að gera mótið að eftirminnilegum viðburði.  Gestir voru mjög ánægðir með heimsóknina á Siglufjörð, vel tókst til með að raða liðum í deildir og riðla þannig að fólk fékk hörkuleiki, spilamennskan var lífleg og drengileg og kvöldið var svo kapítuli út af fyrir sig sem við komum að síðar.  Þar sem ég gat ekki blakað sjálfur vegna meiðsla aðstoðaði ég við mótsstjórnina og dæmdi einhvern slatta af leikjum og svo kom ég talsvert við sögu þegar kom að söng og spileríi að lokinni keppni.

Fylgst náið með hreyfingum leikmanna og bolta

26.02.2010  Aðeins of mikið ...
Það hefur verið aðeins of mikið að gera að undanförnu og ekki gefist tími til að segja frá helstu viðburðum á þessum vettvangi en hér kemur smá yfirlit.  Það hefur verið annatími í skólanum, ganga frá niðurstöðum námsmats vegna annaskipta sem voru í vikunni, foreldraviðtöl og fleira sem fylgir slíkum tímamótum, áfram hefur verið fundað vegna Síldarævintýris og verður það með veglegasta móti í ár í tilefni að 20 ára afmælinu því áætlað er að þetta verði afmælisvika með ýmsum atburðum og listviðburðum fyrir alla fjölskylduna, einnig var fundur í menningarnefnd þar sem afgreiddir voru styrkir til menningarmála í sveitarfélaginu og ákveðið var að auglýst yrði eftir umsóknum um bæjarlistamann sveitarfélagsins í fyrsta sinn, þjálfun í frjálsum og í íþróttaskóla hefur verið samkvæmt venju og svo er verið að undirbúa stærðarinnar blakmót sem verður hér á morgun en um 25 lið eru skráð til leiks og þar er ég í stjórn.  Ég get nú ekki spilað blak að þessu sinni vegna meiðslanna sem ég hlaut um daginn en ég verð þarna allt um kring í dómgæslu, aðstoða við mótsstjórn, sem liðsstjóri auk þess að leika og syngja fyrir fjöldasöng því að sjálfsögðu verður matur og skemmtun þegar blakarar eru á annað borð komnir saman.  Sem sagt nóg á minni könnu og stundum flóir upp úr!!

20.02.2010  Nýtt lag sett saman og frumflutt
Spilamennskunni á fimmtudaginn var ekki lokið, sjá hér að neðan, því á fimmtudagskvöld kom ég fram við útnefningu á íþróttamanni ársins á Siglufirði fyrir árið 2009.  Var hátíðin vel sótt því um 140 manns voru viðstaddir.  Ég flutti tvö frumsamin lög með aðstoð þeirra Stúlla og Steina Sveins og var blekið á pappírnum rétt ný þornað í öðru þeirra, því textinn var kláraður fyrr um daginn.  Það er nokkurs konar íþróttasöngur Siglufjarðar þar sem öll íþróttafélögin á staðnum koma við sögu. Hlaut það lag mjög góðar viðtökur og í kjölfarið fylgdi söngurinn um vinsemdina af Dyggðaplötunni enda bindast menn sterkum vinaböndum í gegnum íþróttirnar.  Ég flutti einnig ávarp á þessari hátíð sem fulltrúi stjórnar Ungmenna- og íþróttasambands Fjallabyggðar.  Það var knattspyrnukappinn Ragnar Haukur Hauksson sem var útnefndur íþróttamaður ársins 2009 og er hann vel að því kominn eftir frábæra frammistöðu á knattspyrnuvellinum sl. sumar sem og undanfarin ár.

Armurinn á Stúlla, ég og Steini

20.02.2010  Kennarabandið enn á ferð
Enn tróð Kennarabandið upp og í þetta sinn á þorrablóti hjá nemendum í eldri deild Grunnskóla Silgufjarðar sl. fimmtudag.  Krakkarnir höfðu útbúið sviðasultu, rúgbrauð, flatkökur, rófustöppu og kartöflumús í matreiðslutímum í vikunni og komum svo með annan þorramat með sér þannig að úr varð dýrindis veisla.  Við lékum og sungum nokkur lög og var ágætlega tekið undir, en unglingarnir voru þó nokkuð feimnari en krakkarnir í yngri deildinni sem við sungum með á dögunum enda í fyrsta sinn sem slíkt blót er haldið hjá unglingunum.  Það verður örugglega meira fjör næst.

Kennararnir mættu í lopapeysum að þjóðlegum sið
 
17.02.2010  1 gull, 2 silfur og slitinn vöðvi
Já, þetta var uppskeran á Íslandsmóti öldunga í frjálsum í Reykjavík um síðustu helgi.  Ég náði aðeins að keppa í þremur greinum því í þeirri þriðju, langstökkinu,  þá gaf vinstri kálfinn sig, maður er greinilega eitthvað farinn að tréna.  En áður en að þessu kom þá keppti ég í hástökki og kúluvarpi og í hástökkinu náði ég besta árangri sem náðst hefur í mínum aldursflokki frá upphafi á landinu er ég fór yfir 1.65m og átti mjög góðar tilraunir við 1.70m en það gekk ekki að þessu sinni.  Í langstökkinu náði ég aðeins að klára tvö stökk og það dugði til silfurverðlauna.  Uppskeran var því aðeins einn Íslandsmeistaratitill að þessu sinni og hvíld frá íþróttum í nokkrar vikur.
 
15.02.2010  Enn fundað um Síldarævintýri og íþróttamál
Fundahöldin halda áfram og í vikunni sat ég m.a. fund hjá undirbúningshópi fyrir 20asta Síldarævintýrið sem verður í sumar og þar fæðast margar góðar hugmyndir í hvert sinn sem við hittumst.  Allt stefnir í að dagskráin verði hin glæsilegasta, þ.e. ef hugmyndir okkar ná fram að ganga, og Síldarævintýrið verði á nokkuð öðrum nótum en undanfarin ár.  Svo var fundur hjá hinu nýja íþróttasambandi UÍF og þar var m.a. rætt um skiptareglur vegna fjármagns frá bænum, samkeppni vegna merki fyrir hið nýja samband og ýmislegt fleira.
  
15.02.2010  Fleiri ljóðabækur berast til Ljóðasetursins
Ég er enn að fá ljóðabækur héðan og þaðan frá góðu fólki sem munu koma að góðum notum á Ljóðasetrinu sem ég stefni að að opna í sumar hér á Siglufirði.  Kann ég þessu fólki bestu þakkir fyrir hlýhug og hjálpsemi við að láta þennan draum minn verða að veruleika. 

15.02.2010  Frjálsíþróttamót
Jæja, þá er loksins tími til að segja fréttir frá síðustu viku.  Sunnudaginn 10. var ég með frjálsíþróttamót fyrir iðkendur mína í frjálsum og þar tóku þátt 14 iðkendur.  Keppt var í 5 greinum og alls litu rúmlega 20 bætingar dagsins ljós en þó var aðeins sett 1 aldursflokkamet.  Ég tók sjálfur þátt í langstökki og þrístökki án atr. og náði að bæta árangur minn frá því fyrir jól nokkuð svo átökin í ræktinni hafa einhverju skilað.