Þá er það vikan 28. sept - 4. okt og líkt og fleiri vikur hófst hún á rúnti heim til Sigló á leið frá spilamennsku. Sunnudagurinn fór sem sagt að mestu í ferðalag að sunnan eftir ball í borginni en það var sumarfæri og allt í besta. Svo tók við hefðbundin kennsluvika í MTR, svona eins og hægt er að tala um "hefðbundar" vikur í kennslu yfir höfuð, og svo var tónlistin og ljóðlistin ekki langt undan.

Heimsótti dvalarheimilið Dalbæ á Dalvík með gítarinn í hönd og flutti þar bæði eigin ljóð og lög fyrir heimilisfólk og gesti. Ljúf og góð stund sem var vel sótt. Var þessi heimsókn fyrsti liðurinn í ljóðahátíðinni Haustglæður sem ég setti á fót og hef stýrt hér á Tröllaskaganum hvert haust síðan árið 2007. Það er tvö félög sem ég er í forsvari fyrir sem standa að hátíðinni þ.e. Umf Glói og Félag um Ljóðasetur Íslands. Hafa rúmlega 5500 manns notið þeirra viðburða sem þar hafa verið á dagskrá sl. 18 ár og fjölmargt listafólk hefur komið fram á þeim. 

Á laugardagskvöldinu var svo komið að næsta dansleik; stóðréttaball á Rimum í Svarfaðardal og var mikið líf og fjör á dansgólfinu. Við Stulli í góðum gír á sviðinu og lékum lög af ýmsu tagi. Lagalistinn hjá okkur telur tæplega 300 lög svo það er hægt að aðlaga lagasafnið að ýmsum hópum og það er nú galdurinn; að spila lög sem fólk þekkir og getur sungið og dansað með.

 Mynd frá góðri stund á Dalbæ.

Vikan 21. - 27. september var lituð af tónlist, eins og flestar vikur í lífi mínu síðustu áratugina svo sem, sem sagt engar nýjar fréttir. Vikan hófst þó á rólegum sunnudegi þar sem verið var að undirbúa næstu kennsluviku og dudda við eitt og annað eins og að skrifa fréttir og vinna að skrásetningu, huga að heimilinu og svona þessu hefðbundna. Svo tók skólalífið við á mánudegi og á þriðjudegi vorum við með dagskrá í Menntaskólanum á Tröllaskaga í tilefni af Alþjóðadegi friðar. Þar steig Hamingjubandið á stokk og ég sem fyrr sá sem stýrði lagavali, sem var í takti við þema dagsins, og sá um söng, kynningar og gítarspil með flott fólk með mér úr röðum kennara og nemenda. 

Á föstudeginum sátum við, kennarar í MTR, haustþing og ýmsa fræðslu á Sauðárkróki og að henni lokinni renndum við Stína til Reykjavíkur því fyrir höndum var dansleikur hjá mér og Stulla í Danshöllinni í Mjóddinni. Þar var mikið fjör og dansað frá fyrsta tóni. Alltaf gaman að syngja fyrir fólk sem vill dansa. Svo var rennt heim á Sigló á sunnudeginum.

Á myndinni má sjá Hamingjubandið troða upp í MTR.

Vikan 14. - 20. september var stútfull af tónlist og svo var líka verið að vinna fyrir saltinu í grautinn í kennslunni. Fyrri hluti vikunnar helgarðu kennarastarfinu þar sem allt er komið í fastar skorður og rennur ljúft hjá okkur í Menntaskólanum á Tröllaskaga. Við hjónin líka dugleg að rækta kroppana í ræktinni okkar, hjóla í blíðunni og sinna haustverkum í garðinum.

Tónlistin tók svo yfir seinni part vikunnar. Við Stulli komum fram á Kráarkvöldi á dvalarheimilinu Hornbrekku á Ólafsfirði, fórum með vísur og limrur, stjórnuðum fjöldasöng og lékum svo fyrir dansi. Í hádeginu á föstudag var ég með tónleika í menningatrhúsinu Bergi á Dalvík þar sem ég flutti eigin lög við ljóð norðlenskra skálda. Var vel mætt og stemningin notaleg. Á föstudagskvöldinu lékum við Stulli svo fyrir dansi hjá hressu fólki 60+ í félagsmiðstöð þess aldurshóps á Akureyri. Þar var mikið fjör og dansað frá fyrsta tóni. Við Stína gistum svo á Akureyri og notuðum laugardaginn í ýmsa snúninga. - Myndin er frá tónleikunum í Bergi á Dalvík.